جرت العادة زمان لما الأم تستقبل مولود جديد إنه بعد أسبوع من الولادة بالتمام والكمال بيحتفلوا بيه ويتعمل له سبوع ليه طقوس خاصة مش عشان الفرحة باستقباله وبس، لأ عشان كمان يحموه من الحسد والشر.. دلوقتي الوضع اتغير بالنسبة للسبوع وبقى فيه Baby Shower أو حفلة استقبال المولود وكمان فيه Gender Reveal party أو حفلة لمعرفة نوع الجنين، أومال يعني هيبقى إيه يا ولد يا بنت مش هيبقى مهجن بقوة سلاحف النينجا هو! الدنيا اتغيرت خالص يا لينا D: بس بالرغم من التقاليع الجديدة دي، لسه فيه ناس بتحاول تحافظ على العادات الحلوة للسبوع حتى لو مزجت بين الجديد والقديم. ولو هتعملي سبوع قريب اتعرفي أكتر على أهم مظاهر السبوع زمان على طريق جداتتنا الحلوين في المقال ده.
أبرز مستلزمات السبوع على الطريقة القديمة
من عظمة المشاهد في السينما المصرية هو مشهد الشبوع في فيلم الحفيد اللي ما سابش ولا أي تفصيلة من تفاصيل السبوع والولادة، مشهد الفراخ عشان الأم تستقوى وتحضيرات السبوع من الشمع والملبس.. فلو عايزة بجد تعملي سبوع على طريقة زمان اتفرجي على المشهد ده وهتنزلي درب البرابرة تجيبي الآتي:
10 بودكاست تتعلمي منهم حاجات على الماشي
الغربال
الغربال عبارة عن صنية بيها شبكة وبيتشال فيها المولود وقت الاحتفال وفيه منه أشكال جديدة دلوقتي وبيتعمل من اللونين الروز واللبني عشان يناسب جنس المولود.
الهون
الهون بتاع زمان اللي الناس كانت بتستخدمه في الأكل وفيه منه أشكال مزينة دلوقتي للسبوع وبيستخدم في الدق وقت السبوع وقت النصايح والغنا.
المبخرة
زمان كانوا بيستخدموها عشان يحطوا فيها بخور ويلفوا بيها البيت عشان الريحة الحلوة ويبعدوا الشر.
الشموع والحلويات
ودي هدايا الناس اللي جايين يباركوا ومعاهم المغات مشروب الام عشان زيادة اللبن وكمان الضيوف يشربوا منه.
الملح
عشان عادة رش الملح في السبوع عشان تحمي الطفل من العين والحسد.
10 أماكن للفسح والخروجات في القاهرة مش متعودين عليها
ازاي تحتفلي بالسبوع على طريقة جدتك زمان؟
أول حاجة كانت بتتعمل هي إن المولود بيلبس لبس جديد ويحطوه في الغربال عشان زمان وتحديدًا أيام الفراعنة كانوا بيعتقدوا إن وضعه في الغربال هينقيه من الفساد من الصغر. بعد كده البيبي بيتحط بالغربال قدام جدة الطفل من الأب أو الأم أو حد من كبار السن الحكماء وبيدقوا الهون برضو عشان اعتقاد إن الصوت العالي بينبه المولود والجدة بتبتدي تدي نصايح زي اسمع كلام أمك واوعى تسمع كلام أبوك D:
بعد النصايح ودق الهون البيبي بيتحط على الأرض بالغربال والأم بتخطي وتسمي فوقه ٧ مرات عشان تبعد عنه الشر.
بعد كده بيتحط في مكان عالي بالغربال والأهل والأقارب والجيران والاصدقاء بيلفوا حواليه ومعاهم الشموع والبخور وبيغنوا أغاني السبوع الحلوة زي حلاقاتك برجالاتك حلقة دهب في وداناتك يا رب يا ربنا تكبر وتبقى قدنا 🙂
اعرفي من هنا أضرار السكريات للأطفال أقل من سنتين
التعليق باستخدام حساب فيس بوك