عنف المدرب مشكلة مش صغيرة لازم كل الأمهات تأخد بالها منها.. طيب هو إحنا بنعلم ولادنا رياضة ليه؟ بنودي ليه تمارين أصلا ونفضل قاعدين بالساعات من تمرين لتمرين مسحولين وساحلين الولاد معانا! فيه طبعًا ناس مننا بيكون طموحهم بطل أوليمبي وشايفين في ولادهم مقومات لده وفيه كتير مننا برده بيكون الهدف الأكبر والأول هو حياة صحية متوازنة ونفسية سليمة وبس. بس في الحالتين وباختلاف أهدافنا ما ينفعش نوصل بولادنا لأهدافنا دي واحنا بنضرب حاجة تانية عندهم زي إننا نسيبهم يتهزؤوا أو يتهانوا من المدربين بتوعهم! لدرجة إنهم يكرهوا التمرين وتتهز شخصيتهم.
طيب امتي أستجيب لرغبة ابني لما يرفض يروح التمرين تاني؟ وأقدر أدعم ابني إزاي وأتدخل في طريقة الكابتن ولا لأ؟ ولحد فين نقدر نتقبل شد المدربين على ولادنا من أجل الرياضة؟
بالفيديو: تمارين الأطفال .. تلامس طبيعي ولا تحرّش؟
-
نتدخل إمتي .. لو فيه عنف من المدرب؟
فيه حاجات معينة كده ما ينفعش نعديها لما نلاحظها بتحصل مع ولادنا وهمّ بيتمرنوا. فيه فرق كبير بين الحزم وبين الإهانة، لازم أتدخل لما ألاقي ابني بيتشتم\ بيتضرب\ بيتقلل منه ومن مجهوده\ أو بيتعمل عليه أي وصم أو label
مفيش أي مشكلة إن المدرب يكون شديد وحازم مع الأطفال في التمرين لكن شديد باحترام من غير إهانة الطفل بأي صورة.
-
أتدخل ازاي؟
طيب هل معنى إن ولادنا رافضين التمرين بسبب طريقة الكابتن يبقى أسمع كلامهم؟ هو مهم جدًا إننا نظهر لولادنا دعمنا ليهم وتقديرنا لمشاعرهم ورفضنا التام لأي إهانة أو كريقة مش مقبولة، لكن مهم كمان نعلمهم الالتزام والمثابرة وإن هنقابل ناس في الدنيا كتير مختلفين قوي عننا.
فلو الطريقة فيها شدة فقط وحزم باحترام ممكن أشجع طفلي وأحمسه بتخيل لأهدافه والغرض من اللي بيعمله، وفي نفس الوقت اتكلم مع المدرب إن الطفل بدأ يكره التمرين. فلو هو صارم زيادة، يبقى محتاج شوية يمزج بين اللين والحزم. لكن طبعًا لو المدرب بيستخدم العنف اللفظي أو الجسدي مهم جدًا إننا نتدخل فورًا وقصاد الطفل نرفض ده تمامًا ونتعامل مع مدرب مختلف أو رياضة مختلفة لو لزم الأمر.
-
ازاي اتطمن إن طفلي ما يقبلش الإهانة ويقدر يتصرف في عدم وجودي؟
ده بقى بدايته الأولي والأهم من “البيت” لو الطفل متعود في بيته إن مش مسموح أي حد يمد إيده عليه أو يشتمه مثلًا، عشان هو “كبير” أو له سلطة عليه أو بيعلمه حاجة.
أنا عن نفسي باشوف أطفال كتير في التمارين المختلفة بتتزق وتتقرص وتتشتم ومش شايفين إن في ده مشكلة مستسلمين عادي جدا، عشان بيحصل معاهم كدة في البيت ومتخيلين غن ده الطريقة الطبيعية للتعامل من الكبار!
فبدايتنا من البيت حتى لو أنا كأم أو أب انفعلت زيادة عليه، مهم إننا نعتذر ونقول لهم “مش مسموح لحد يشتم أو يتكلم معاك بالطريقة دي وأنا غلطت وباعتذر”. فهو بره البيت، أوتوماتيك بيبقى عارف إن ده مش مسموح من أي حد كبير أو صغير.
وفي النهاية، ما تنسوش لما تدخلوا عشان تدعموا ولادكم مهم يكون تدخلنا مع المدرب قصادهم “باحترام” ما نقومش نتخانق ونعلي صوتنا احنا كمان لأن كل فعل ورد فعل بنعمله هو تصور وتمثيل للطبيعي والمفروض في الحياة بالنسبة لولادنا.
التعليق باستخدام حساب فيس بوك