جرت العادة في الجواز من سنين السنين إن الراجل لازم يكون أكبر من الست بكام سنة حلوين عشان يتجوزها وكان دايما يتقال لنا عشان يكون قد المسؤلية وتفكيره كبير مش عيل أصغر منك أو حتي قدك. بس الحقيقة مع مرور الوقت ومع تجارب الناس المختلفة بقي واضح لينا إن الكلام ده مش شرط يكون صح، وإن مفيش معادلة واحدة لفرق السن المناسب بين الزوجين ولا مين فيهم أكبر ومين أصغر. لأن نجاح الجواز في الأخر بيعتمد علي حاجات كتير تانية وإن أوقات فرق السن بين الزوجين لما بيكون كبير عيوبه بتكتر.
طيب إيه بقي مميزات وعيوب فرق السن الكبير بين الزوجين؟
مميزات فرق السن بين الزوجين
- الزوج لما بيكون أكبر ممكن يكون عنده خبرات حياتيه اكتر وممكن ده يكون مصدر جذب لزوجته او إلهام وإرتباط بيه أكبر.
- لما الزوجة بتكون أصغر في السن بتقدر تضيف للبيت والحياة حيوية وطاقة وكمان شكلها لما بيكون أصغر ده بيديها ثقة اكتر في نفسها.
- فرق السن الكبير بيكون الطرف الأكبر عنده من الحكمة لحل الخلافات بصورة أكبر واللي بيساعد علي تقليل نسب الطلاق.
عيوب فرق السن بين الزوج والزوجة
- لما فرق السن بيكون كبير بين الأزواج وبيعدي فترة طويلة من الجواز ممكن يبدأ الطرف الأكبر في إنه يخسر طاقته ويبقي مش قادر يجاري الطرف الأصغر منه بسنين في نشاطاته وحياته الإجتماعية.
- ممكن يبدا يكون فيه تباعد فكري كبير وده بيقلل التفاهم لحد كبير بين الزوجين واللي بيحصل لو الفرق في السن واصل إنه فرق أجيال مش بس كام سنة.
- يبدأ يدخل ملل في حياتهم الزوجية ولو إن الملل ممكن يدخل مهما كان فرق السن لو الزوجين مش قريبين لبعض.
- الراجل اللي بيتجوز من ست أكبر منه بسنين كتيير ممكن يكون فرصة إنه أب تكون أقل وبالتالي ده هيأثر علي العلاقة بينهم.
بس في النهاية مهم نعرف إن ده كلها تكهنات ومش شرط تحصل ولا تتحقق في أي حالة جواز.
لأن في النهاية الجواز ده شركة قايمة علي حب ومودة ومجهود من عمودين الشركة ده واللي لازم يكون في بينهم توافق من جميع النواحي وأه السن مهم لكن فرق السن مش العامل الأكبر والمؤثر في التوافق ده.
What’s your Reaction?
التعليق باستخدام حساب فيس بوك