” إزاي أساعد إبني العصبي سريع الغضب إنه يهدى! ” الغضب شعور طبيعي وصحي وحق مكفول لكل بني أدم، الغلط احيانا بيبقي عندنا إحنا لما بنبقي مش عايزين ولادنا يغضبوا او يزعلوا من الأساس بدل ما نشوف طرق صحية وأهدي نقدر إحنا وولادنا نعبر بيها عن اللي حاسينه وقت الغضب فبنفضل نحاول في السكة الغلط!
مهم إننا نعرف إن وقت الغضب علميا مخ البني أدم بيبقي بيتعامل بمشاعره بس من غير أي تفكير منطقي عشان كدة لو مش متمرن علي طرق ينفس بيها غضبه طبيعي إن المشاعر تسوق ونعمل تصرفات نندم عليها بعد كدة.
في المقال ده هقولكوا علي أهم tips تقدري تمرني طفلك بيها للتعامل مع الغضب بصورة صحية مش إنه ما يغضبش أصلا:
بتتعصبوا إزاي في البيت
طبعا إنتوا عارفين أول حاجة وأهم حاجة هقولها كالعادة، إحنا في البيت ظروفنا إيه؟ بنعبر عن غضبنا إزاي؟ بنزعق أو نشتم ونرزع الأبواب؟ لأن الطفل معندوش قدرة ولا مهارة كفاية عشان يتعامل مع الغضب فأول حاجة بيعملها إنه يقلد اللي بيشوفوا! فعايزين نفتكر دايما إنه قبل مل نطلب من ولادنا ما يتعصبوش، إننا نسيطر علي عصبيتنا ونراقب ردود أفعالنا قدامهم ونركز في طريقتنا وإحنا بنعبرعن الغضب.
نعلم الطفل المشاعر والفرق بين مشاعرنا وتصرفاتنا
من مهارات الذكاء العاطفي اللي لازم نعلمها لولادنا هي أسامي المشاعر المختلفة “غضبان\ سعيد\ خايف\ متوتر..”، عشان يبقوا قادرين يحددوا أصلا هما حاسين بإيه ويعبروا عنه ويطلبوا المساعدة كمان لو محتاجين.
الطفل اللي مش عارف يحدد ويقولنا إنه متضايق جدا اوحاسس بالغضب، هيضظر يلجأ إنه يوصل لنا غضبه بتصرفات تعرفنا اللي حاسس بيه، سواء نوبة غضب أو عياط أو صوت عالي.
بعد ما الطفل يبقي عمده وعي باللي حاسس بيه هنقدر نعلمه إن مشاعره من حقه ومرحب بيها في أي وقت بس التعبير عنها بتصرفات غلط او مؤذية ليه او لغيره هي ده اللي مش مسموحة.
الراجل ما بيعيطش \ بلاش تبقي دراما كوين
التريقة أو الإستخفاف بالغضب أو رفض التعبير عنه بطرق مريحة للطفل زي “الراجل مش من حقه يعيط” ده من اكتر الحاجات اللي بتزود طاقة الغضب والطفل بيضطر يخبيها عشان محدش يتريق عليه فتطاع بصورة غلط تماما بعد كدة.
-
عجلة التحكم في الغضب
من ادوات التربية الإيجابية المفيدة في تمرين الأطفال علي التعبير عن الغضب بصورة صحية، هي إننا نرسم للطفل عجلة زي اللي في الصورة ده ويكون فيها إختيارات مختلفة للتنفيس عن الغضب زي إنه ينط \ يجري \ يعمل تمارين تنفس \ يلون أو يقطع ورقة وغيرها كتير “نخللي الطفل يختار إيه البدايل اللي ممكن تساعده يهدي وقت الغضب ونحطها” المهم بدايل تكون سهلة ومتاحة في اي مكان.
وقت بدأ العصبية نفكر الطفل باتفاقنا ونخليه يختار حاجة واحدة ويجربها كذا مرة خلال الإسبوع ونشوف بتساعده فعلا يهدي أو محتاج يجرب غيرها.
المصدر: pinterest – التحكم في غضب الأطفال
-
ترموميتر الغضب
نرسم ترمومتر للطفل فيه 3 ألوان بيعبروا عن حدة الغضب بتاعه بسيط \ متوسط \ قوي ونسأل الطفل إزاي بيعبر في كل مرحلة لو الغضب بسيط بيعيط مثلا لو متوسط صوته يبدأ يعلي لو شديد يحدف حاجة من إيده أو يشتم!
الطريقة ده بتساعد مخ الطفل يبقي واعي إنه بيتصرف بالطريقة ده نتيجة الشعور ده وبالتالي يقدر يتجه للبدايل اللي يعبر بيها عن نفسه بصورة أسهل.
المصدر: pinterest – التحكم في الغضب
ده اداة مفيدة لكل البشر مش للأطفال بس الحقيقة، وقت غضب الطفل مش محتاجين نتكلم كتير عشان يهدي ولكن محتاجين نأكد علي اللي حاسه “مش علي اللي بيعمله”، بكلمات زي “أنا فاهمة إنت أد إيه غضبان” \ “موقف يضايق اوي فعلا”\ “ممكن أساعدك إزاي عشان تهدي؟”.
-
عواقب للتعبير عن الغضب بطريقة غلط
بعد ما نبدا نمرن الطفل ونساعده بأدوات كفاية للتعبير عن الغضب، مهم جدا الحزم في عدم قبول التصرفات الغلط نتيجة للغضب زس رزع الأبواب أو التكسبر أو الضرب، لازم الطفل يعرف إنه مسؤل عن تصحيح اخطاؤه الناتجة عن التصرفات ده وإنه مقبول عادي يغضب لكن مش مقبول إساءة السلوك بسبب الغضب عشان ميكبرش زي ناس كتير مستخبية تحت جملة “أنا مش بشوف قدامي وقت الغضب”!
-
قصص وحواديت
نستخدم حواديت قبل النوم وقراية قصص أطفال عن الغضب والمشاعر عامة نساعد بيها الطفل علي الوعي أكتر بفكرة المشاعر.
-
ماتخافوش من غضبهم وتستسلموا له
مهم أوي إن الطفل مايحسش إننا بنعمله اللي عايزه لما يغضب أو بيفلت من عواقب مثلا، عشان ما يستسهلش ومايحاولش أصلا يسيطر علي عصبيته.
واخيرا لازم نكون عارفين ومتأكدين غن التعامل مع مشاعر الغضب ده رحلة من التدريب طويلة وبتاخد وقت ومش هتحصل فجأة، إحتفلوا بخطواتهم الصغيرة لو عرف يعبر عن غضبه بصورة اهدي مرة من عشر مرات أشكريه عليها وفكريه إنه يقدر وخللي بالك طويل وماتستعجليش النتيجة.
التعليق باستخدام حساب فيس بوك