دلوقتي ظروف الحياة الصعبة اللي كلنا بنواجهها خلت أسر كتير يلجأوا لحل السفر وبقى في الغالب كمان الأب بيسافر لوحده من غير الأم والأولاد وبتفوت السنين وتزيد صعوبة رجوع الأب وسفر ولاده ليه وتفضل من أكثر الأسباب اللي بتوتر الأطفال وبتحسسهم بالقلق أو بعدم الأمان والاستقرار هي عدم وجود الأب في حياتهم باستمرار ومشاركتهم تفاصيل وأحداث حياتهم اليومية بسبب سفره.
في المقال ده، هأقول لك على شوية خطوات بسيطة بس تأثيرها كبير على الطفل في حالة غياب الأب:
- أول وأهم حاجة إنه لازم يكون فيه تواصل يومي بين الأب وأولاده. بعد الانفتاح التكنولوجي دلوقتي وسهولة التواصل، ما بقاش صعب إنهم يشوفوا باباهم عن طريق video call. حافظوا على مكالمة بينهم كل يوم الصبح أو بالليل قبل النوم يحكوا فيها اللي حصل في يومهم وياخدوا رأي باباهم لو عندهم مشكلة عشان يحسوا إنهم متطمنين ومسنودين عليه حتى لو مش عايش معاهم طول الوقت.
- الأطفال الصغيرة اللي بتبقى قلقانة وحزينة لسفر باباهم، اعملي لهم جدول لأيام السفر وخليهم يشطبوا على كل يوم يعدي من الأيام دي لحد ما يوصلوا ليوم رجوعه بالسلامة حتى لو فترة السفر هتعدي السنة. الأطفال بيحبوا يشوفوا حاجة ملموسة قدامهم مش مجرد كلام عن معاد رجوع الأب. ده بيهديهم ويخليهم حاسين بالأمان أكتر.
- ما توقفيش حياتكم عشان باباهم مسافر وتقفلي عليكم زي إنك تلغي التمرين أو تأجلي سفر أو خروج لحد ما يرجع، لإن كده بيوصل لولادك رسالة إن حياتنا هتقف وهنعمل pause لكل حاجة عشان مش هنعرف نعيش بدون وجود بابا وده رسالة مقلقة جدًا للأطفال وعكس اللي محتاجة توصليه لهم في الفترة دي عشان يطمنهم.
- عوّدي ابنك/بنتك إنهم يلجأوا لباباهم ويستشيروه في كل حاجة محتاجينها يعني لو طفلك عايز يطلع رحلة مع المدرسة حتى لو انتي موافقة وعارفة إن باباه موافق. قولي لابنك محتاجين ناخد رأي بابا الأول، وهكذا في باقي مواقف حياتكم عشان طفلك يفضل حاسس إن باباه له دور مهم وواضح في حياته وده من أهم الحاجات اللي بتحسس الطفل بالأهمية والانتماء، وعشان تفضل حبال التواصل مفتوحة بينهم مش فجأة يرجع بعد سنين الغربة يظهر في حياتهم.
- أوقات سفر الاب بيسبب تدخل من أفراد العيلة في تربية الأطفال بغرض الدعم ومساعدة الأم. ده بيشتت الأطفال وبيحسسهم بعدم الاستقرار بسبب اختلاف القواعد وطرق التربية من بيت للتاني. فبننصحك تكوني صارمة بطريقة لطيفة وذكية وتحافظي على تربية أطفالك بطريقتك انتي وباباهم بس بدون تدخل من حد.
وأخيرًا بننصحك بإن أول وأهم حاجة محتاجة تحافظي عليها هي حق نفسك عليكي. اهتمي بنفسك عشان تعرفي تهتمي بولادك لأن الأم اللي بتربي ولادها لوحدها بيكون مجهودها مضاعف وبتقوم بدور اتنين. فلو سبتي نفسك لضغوطات الحياة اللي ما بتخلصش وللتوتر والعصبية وفضلتي بالصورة دي دايمًا قدام ولادك، ده هيضغط عليهم هم كمان وهينقل لهم إن سفر باباهم وغيابه مسبب لك أزمة وبالتالي هيسبب لهم ده.
وأحب أفكر كمان كل أب مسافر وعايش بعيد عن ولاده بحثًا عن لقمة العيش وتوفير مستقبل أحسن لولاده إنه ما ينساش إن علاقته بولاده أهم حاجة في مستقبلهم وإن دوره في حياة ولاده مالهوش بديل. محدش غيره يقدر يديه الاحتياج النفسي اللي محتاجه من وجوده في حياتهم. خليك دايمًا على تواصل وتدخل في أدق تفاصيل حياتهم وشاركهم أوقاتهم الحلوة والصعبة على قد ما تقدر رغم بعد المسافات.
التعليق باستخدام حساب فيس بوك