العيد خلاص على الأبواب وكل سنة وإنتم طيبين، والتجهيز والتحضير للعيد في كل حتة دلوقتي، والسنة ده العيد بإذن الله هيكون مختلف لأننا بقى لنا كام سنة خايفين من التجمعات والاختلاط بسبب موجات فيروس كورونا القوية اللي عدت علينا. بس السنة دي بما إن الحمد لله الدنيا أهدى، ففرصتنا نحسس ولادنا بطقوس العيد اللي بتميزه واللي اتربينا وكبرنا عليها وأهمها “صلاة العيد”. عشان كده، في مقال النهارده، بنشجعك على اصطحاب الأطفال لصلاة العيد وهنقول لك إيه فايدتها التربوية والنفسية على الأطفال.
شرح كيفية صلاة العيد للأطفال خطوة بخطوة
ليه مهم اصطحاب الأطفال لصلاة العيد معانا؟
- اصطحاب الطفل لصلاة العيد معانا بيزوّد فرحة وبهجة وإحساس العيد من أول اليوم وسط الناس، ده غير إن مواظبة الطفل على صلاة العيد بتربط العيد معاه بذكريات مميزة مش بتحصل غير في العيد، يعني نقدر نخرج في أي يوم \ نشتري لبس جديد \ نقابل العيلة، لكن طقس صلاة العيد ده مش بيحصل غير مرتين بس في السنة.
5 مساجد لازم تجربي فيهم صلاة التراويح
- بيعوّده على الطقوس الدينية وبيسهل ارتباطه بيها من صغره.
- بيربطه كمان بالمسجد والصلاة بصورة مبهجة وبيكون فرصة يتعود تدريجي على آداب الصلاة بطريقة مختلفة وأسهل من صلاة التراويح.
- فرصتنا إننا نقدر نتكلم معاهم ويتعلم بسهولة عن بعض تعاليم الدين من زكاة الفطر اللي لازم تطلع قبل صلاة العيد وإكسابهم عادات الطهارة والنظافة بالذات قبل الصلاة.
- ويا سلام لو قعدنا مع ولادنا حضرنا سوا أكياس فيها بلالين وهدايا بسيطة للأطفال في صلاة العيد تتوزع عليهم بعد ما يخلصوا، ده له تأثير إيجابي كبير جدًا على شخصية الطفل وبيدي له ثقة في نفسه وبيعلمه العطاء والمشاركة كمان مع أطفال ما يعرفهاش، وبيتعلم كمان مبدأ إدخال السرور على قلب مسلم وبيعرف بالتجربة قد إيه ده له أهمية في الدنيا وعند ربنا.
صلاة العيد بتخلي بداية يوم العيد مختلفة ومميزة جدًا، وبتعلم ولادنا إن طقوس أعيادنا مش بس لبس العيد وبيجاما جديدة وعيدية وعادات إجتماعية، لكن هي كمان طقوس دينية ولما بنعملها بنفرح ونحس بالعيد اكتر وبناخد عليها ثواب وحسنات كمان.
التعليق باستخدام حساب فيس بوك