محتويات المقال
فيه خطأ شائع في حياتنا اسمه إن فترة الخطوبة فترة رومانسية. وبسبب الخطأ ده، بيكون فيه اكتشافات مرعبة بعد الجواز، لأنه على الرغم من كل العلامات اللي بتكون واضحة وباينة جدًا في الخطوبة، إلا إن كتير من الناس بتتعمد تجاهلها تحت شعار إن فترة الخطوبة لازم تكون فترة حلوة أو لما هانتجوز هاعرف أصلّحه، وده طبعًا غلط تمامًا.
الخطوبة اتعملت علشان حقيقي نكتشف بعض، وده لازم يتم في إطار مش أقل من 6 شهور، من غير أي كلام عن تجهيزات البيت، لأن انتي وقتها هتكتشفي أمور مذهلة عنه، ده قبل طبعًا الدخول في حرب المصاريف بتاعت تجهيز بيتكم، في الـ6 شهور التانية اللي هتاخدوها في تجهيز البيت، هتظهر لك جانب تاني خالص منه.
بس علشان ما تضيعيش وقت كبير من حياتك، هنقول لك على واحدة من أسوأ صفات الرجل، اللي لو لاقيتي إنها موجودة في خطيبك يبقى لازم الخطوبة دي تنتهي، ألا وهي البخل. البخيل على فكرة مش بخيل فلوس بس، البخيل بخيل فلوس ووقت ومشاعر، واحدة من أهم الحاجات عند أي راجل هي فلوسه اللي تعب فيها، فلما يبخل عليكي، يبقى تعرفي إن قيمتك عنده أقل بكتير من قيمة فلوسه.
علامات البخل في فترة الخطوبة هتخليكي تعيدي حساباتك في العلاقة
-
مافيش خروج
هتلاقي دايمًا الرجل البخيل مش عايز يخرجك يفسحك أبدًا، بيتحجج إن البيت مريح أكتر، دايمًا يجي يقعد معاكم في البيت، عايز فشار وشاي ولب ويتفرج على التلفزيون ويمشي بالليل، علشان مش عايز يدفع أبدًا تمن النسكافيه في الكافيه.
-
مافيش فلوس
لو حصل لأي سبب كان وطلبتي منه يدفع تمن حاجة، هتلاقيه عمل من بنها، أو يقول لك إنه مش معاه فلوس، ما عملش حسابه، نسي المحفظة، وهكذا يعني.
-
نظام إنجليزي
عمره في حياته ما يعزم أبدًا إنه يدفع الحساب حتى لو كانت بسيط، وبيدّعي بكل ألاطة إنه بيتبع النظام الإنجليزي إن كل واحد يدفع حسابه بنفسه.
-
بحب الكشك
مفهوم الشراء عنده من المحلات الشيك أو حتى إنه يروح هايبر ماركت بتضربه في قلبه، هو هيقول لك أنا باشتري من عم عبده البقال كل اللي أنا عايزه من باب الإنسانية، بس هو في الحقيقة بيخاف من عم الهايبر علشان ما يسيبش فرصة لشراء أي حاجة زيادة أو رفاهية.
-
أوتوبيس النقل العام صديقه
انسي تمامًا فكرة أوبر أو كريم أو حتى تاكسي أبيض أو أسود حتى معاه، هيقول لك أنا آخر الشهر حتى لو لسه وارث من عمه في البرازيل، مفهوم التاكسي ده مرفوض في حياته، هتلاقي نفسك راكبة معاه مواصلات عامة من منطلق الإنصهار مع طبقات الشعب المطحون، والتآخي مع الأخرين، بصي .. هيبهدلك وهيدفعك كمان تذكرتك.
-
المشي رياضة
ده شعار المرحلة بتاعته معاكي، بدل ما تخرجي في أي مكان شيك معاه من نفسك حتى، هتلاقيه بيمشي بيكي الجبال والوديان تحت مسمى نتفرج على الطبيعة زي ما هي، طبعًا مش محتاجة أقولك إن المشي مجاني، وكعب جزمتك وصوابع رجلك هما اللي هيدفعوا تمن عم الرياضي.
-
كان على عيني
ده رده الأساسي في نقطة إنه مش بيساعد أهله نهائي ماديًا ولا أي حد من أخواته، وكل ما حد يطلب منه، يقول “كان على عيني، مش معايا” وهو معاه جوه عادي، دايمًا مدعي الفقر ومافيش فلوس معاه.
-
فاضل إتنين جنيه فكة
مستحيل بمعنى مستحيل يسيب الفكة كبقشيش حتى، يعني ممكن تلاقي نفسك واقفة مستنية الإتنين جنيه باقي الـ10 علشان هو مؤمن إنه دفع تمن الخدمة اللي أخدها، فليه يسيب 2 جنيه للسايس مثلًا.
-
يعني إيه أجازة؟
لو فكرتي لا قدر الله تكلميه عن مفهوم السفر لحتة من باب الترفيه، أو حتى تحوّشوا لأسبوع أجازة في السنة كلها، هتلاقي قدامك خطبة عصماء إن الأجازة والسفر دول للأغنياء بس، لكن انتي معاه على باب الله عادي.
-
الهدايا من عند الله
مستحيل تلاقيه جاب لك هدية قيمة بجد، قدرة غير طبيعية على الاسترخاص بشكل محرج، يعني الدبدوب الأحمر في أسود مع الوردة البلاستيك هيكون لوجو العلاقة دي، كلامه دايمًا على إن الهدايا تبذير وإن من الأفضل ندور على آخرتنا الأول.
أظن لو حسيتي إن العلامات دي موجودة في خطيبك، انتي عارفة مفروض تعملي إيه، لإن لازم تشوفي بعين الخيال شكلك انتي وعيالك وانتم عايشين بره المجرة بسبب بخل جوزك، وده عذاب مافيش مبرر للدخول فيه، اهربي يا بنتي، الواحد بيعيش يومين عايز يعيشهم في أحسن وضع، لإنك هتفقدي كل حاجة حقيقي مع الراجل البخيل.
المصادر
www.standardmedia.co.ke
www.femina.in
www.economictimes.indiatimes.com
التعليق باستخدام حساب فيس بوك