فترة النفاس أحكامها الفقهية من طهارة وصلاة وصيام، بتلخبط سيدات كتير، وعلشان إحنا في رمضان فأكتر معلومة مهمة، هي إمتي النفساء (اللي هي السيدة في فترة النفاس) تقدر تصوم في رمضان؟ ده اللي هنقوله ليكي ببساطة وتفصيل في المقال ده، خلينا نعرف إيه هي فترة النفاس وإمتى يبدأ صيام النفساء.
-
إيه هي فترة النفاس؟
فترة النفاس هي من أول لحظة بعد الولادة، سواء ولادة طبيعية أو قيصرية، لحد ما يتقطع نزول الدم، والفترة دي بتكون حوالي 30 يوم لـ 60 يوم.
-
ليه الستات بيتلخبطوا في فترة النفاس؟
لإن المعلومة الأشهر، إن فترة النفاس 40 يوم، فلو السيدة الدم اتقطع قبل الأربعين، أو طوّل بعد الأربعين، بتحس باللخبطة، ومش عارفة تغتسل للطهارة وتمارس عباداتها من صلاة وصيام ولا لأ.
-
إيه هي المدة الصحيحة لفترة النفاس؟
مدة فترة النفاس، عاملة زي مدة الدورة الشهرية بالظبط، بتختلف من ست للتانية، مش في ناس الدورة الشهرية عندهم 3 أيام، وفي ناس بتوصل لـ 9 أيام؟ النفاس كده في سيدات ممكن الدم ينقطع بعد 20 يوم من الولادة، وفي ناس ممكن يوصل لـ 60 يوم، ورقم أربعين ده رقم متوسط وتقريبي، وبيكون لأغلب السيدات.
-
صيام النفساء: إمتى النفساء تقدر تصوم؟
لما الدم يتقطع تمامًا، أيًا كان عدد الأيام اللي مرت، بس لازم تتأكد إن الدم اتقطع فعلًا، مش يوم مثلًا الدم مانزلش الصبح، وتقدر تتأكد من انقطاع الدم، عن طريق تنضيف المنطقة الحساسة تمامًا، وتحط فوطة جديدة ونضيفة وتستنى يوم كامل، وتشوف هل فيه أي آثار دم ولا لا، لو لقت حتى لو نقاط بسيطة، فهي كده لسه في فترة النفاس، لو الفوطة فضلت نضيفة، فتقدر تغتسل للطهارة وتصوم تاني يوم، مع اعتبار إذا كان ده مناسب للرضاعة الطبيعية بالنسبة لها بالنسبة لمولودها ولا لا.
وده فيديو بفتوى صيام النفساء، لواحد من شيوخ دار الإفتاء:
مع تمنياتنا ليكي بصحة جيدة، وصيام مقبول.
التعليق باستخدام حساب فيس بوك