محتويات المقال
مشكلة بتواجه كتير من الأمهات اللي بيكتشفوا فجأة مع مرحلة إنتقال ولادهم للحياة الجامعية، إن ولادهم كبروا وبقي ليهم حياتهم ومشغولين او مش موجودين معظم الوقت في البيت وبيلاقوا نفسهم فجأة فضيوا والحمل خف عليهم ومحور وأهم حاجة في الحياة مبقاش معتمد عليهم زي زمان. المشكلة هنا لو إنتي كأم في الوضع ده ما كانش ليكي حياتك واهتماماتك الخاصة قبل كده في الغالب هتحسي ان الدنيا فضيت من حواليكي وهتلاقي فراغ كبير مستنيكي. في مقال النهارده، هنقول لك ازاي تخلقي لنفسك روتين وحياة جديدة لنفسك من تاني بعد ما مسؤولياتك كأم قلت كتير.
نصائح لعدم الشعور بالفراغ
-
دوري على نفسك:
في حياتنا كأمهات لما بنسيب نفسنا نتسحل في حياة ولادنا وتمارينهم ومذاكرتهم وكل تفاصيلهم بننسى نفسنا، بنبدأ مع الوقت ننسي احنا كنا بنحب إيه ومش بنحب إيه، طب كنا مميزين في إيه أو شاطرين في إيه غير الأمومة! فدلوقتي بدل ما تقعدي حزينة على الفراغ الكبير اللي بقيتي فيه، ارجعي دوري تاني عليكي واسألي نفسك الأسئلة دي “قبل ما اكون أم كنت بتبسط إزاي؟” \ “قبل ما أكون أم كنت شاطرة في إيه” \ “إيه الحاجة اللي لو عملتها دلوقتي بعيدا عن ولادي ممكن أفضل أعملها طول الوقت من غير زهق ومن غير مقابل”.
أفكار مشاريع صغيرة مربحة وناجحة من المنزل.
-
ادخلي في مجتمع شبهك:
إبدإي أخرجي برة دايرتك الصغيرة اللي أغلبها برده امهات أصحاب ولادك، شوفي الناس اللي زيك وظروفهم قريبة منك، دلوقتي المجتمعات النسائية الإيجابية مفيش أكتر منها، أبدإي إدخلي وسط ناس جديدة قريبة في الفكر منك ممكن عن طريق كورس \ حلقات دروس دين\ مجموعات تمشية ورياضة.
-
اتعلمي حاجة جديدة:
أكبر معروف ممكن تعمليه لنفسك الفترة الجاية من حياتك هو إنك تبدإي تكتشفي الدنيا من جديد وتتعلمي من تاني، عمر ما السن ولا الوقت ممكن يبقي كتيرأو متاخرعلي العلم والمهارات الجديدة، ومش لازم الحاجات ده تبقي بفلوس كتير دلوقتي الكورسات الأونلاين والمجانية في كل مكان، إختاري حاجة واحدة تشدك اتعلميها وإبدأي تطبقيها وعلميها لغيرك كمان وبعدين شوفي غيرها بحيث إنك تفعي حب التعلم عندك وفي نفس الوقت تشغلي وقتك بحاجة مفيدة ليكي ولغيرك.
-
اعملي روتين ليومك:
ما تسيبيش اليوم يمشي زي ما يمشي كدة من غير تخطيط وترتيب منك والأخر تلاقي اليوم خلص من غير ما تعملي حاجة وتفضلي تلفي في دايرة الفراغ، غعملي روتين يومي لنفسك تغذي بيه كل جوانب حياتك الروحانية والإجتماعية.
وفي النهاية بفكرك إنك حياتك ماوقفتش بانشغال ولادك بالعكس يمكن خف الحمل عنك ده يكون هو بداية حياة جديدة ليكي إوعي تضيعيها في الفراغ والزهق، إتبسطي بشكل حياتك الجديد وإختلاف دورك في الدنيا.
التعليق باستخدام حساب فيس بوك