بنشوف كتير في محلات منتجات التجميل، فُرش خشبية وخشنة، والحقيقة إن شكلها شيك وأنيق، بس لما الواحد بيشوفها خشنة كده بيكون مش متخيل هتستخدم ازاي على البشرة، فلو انتي محتارة زيي، هنقولك في المقال ده كل حاجة محتاجة تعرفيها عن فرشاة التقشير الجاف للجسم Dry Brushing
-
إيه هو التقشير الجاف للجسم؟
تدليك يومي لبشرة الجسم بفرشاة بشعيرات خشنة مصنوعة من مواد طبيعية.
-
إيه فوائد التقشير بالفرشاة الخشنة؟
الحقيقة إن في فوايد كتير جدًا بتتقال عن التقشير الجاف، بس مش كلها علمي وحقيقي، زي إنها بتعالج أو بتخفف من السلوليت، لكن مفيش أي إثبات طبي على الكلام ده، لكن هنقولك على أهم الفوايد المعروفة عن التقشير الجاف:
- تنشيط الدورة الدموية في الجسم، وده بيساعد في إزالة السموم من الجسم.
- التخلص من الجلد الميت.
- التخلص من الانتفاخات الزايدة في الجلد، وده اللي بعض الناس بيتلخبطوا بينه وبين السلوليت.
- تحفيز الجهاز العصبي.
-
إيه نوع الفرشاة المناسبة للتقشير الجاف؟
- يُفضل تكون الفرشاة بمقبض طويل، علشان تقدري توصلي لأماكن في جسمك مش هتعرفي توصلي لها لو مقبض الفرشاة قصير.
- لازم تكون من مواد طبيعية علشان ما تسببش تهيجات لبشرتك.
- اختاري فرشاة تكون شعيراتها متثبتة كويس وقوية، علشان تكون فعّالة في الاستخدام وعمرها طويل.
-
إيه موانع التقشير الجاف؟
- لو بشرتك حساسة أو شديدة الحساسية.
- لو عندك -لا قدر الله- تشوهات جلدية في منطاق معينة، أو أمراض جلدية لا ينصح معاها بالتقشير الجاف.
- الحبوب والدمامل والبثور.
- الجروح والحروق وتهيجات والتهابات الجلد.
- الوجه والأماكن الحساسة.
-
إيه أحسن وقت للتقشير الجاف؟
أفضل وقت لاستخدام فرشاة التقشير الجاف، هو قبل الاستحمام، بدون التعرض للمياه السخنة، لإنها بتسحب الدهون من الجسم وبتسيب البشرة جافة، وده بيسبب احمرار وحكّة.
-
إيه هي طريقة التقشير الجاف بالفرشاة؟
- البداية بتكون من القدم والساق، وبعدين الضهر والجذع، وكل لما تقربي من مناطق الثدي والرقبة والأماكن الحساسة لازم تخففي الضغط، ممكن تكون الحركات بالفرشاة مستقيمة على الساق، ودائرية على الضهر والبطن.
- ماتكرريش التقشير في نفس المنطقة لأكتر من مرة، علشان البشرة ما تتضررش.
- لازم تستحمي بعدها على طول.
- بعد الاستحمام استخدمي مرطب محترم للجسم.
ودي مجموعة مقالات عن البشرة هتفيدك أكيد:
سكراب القهوة حلك المثالي والسحري لعلاج السيلوليت
دليل التقشير الكيميائي للبشرة .. وأفضل منتجات التقشير في المنزل
بالفيديو: طريقة عمل مساج الوجه خطوة بخطوة
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر:
التعليق باستخدام حساب فيس بوك