أغلب الأمهات بيحتاجوا يعملوا دايت لفترة طويلة، بسبب نمط الحياة غير الصحي، وكمان مع زيادة الوزن بسبب الحمل والولادة والرضاعة الطبيعية، لكن في أخطاء بنعملها لما نقرر نمشي على رجيم، بتسبب فشل الرجيم وعدم خسارة الوزن أو تحسي بالتخسيس، وده يسبب احباط كبير لنا، وممكن يخلينا نرجع ننتكس.
أسباب فشل الرجيم (الدايت)
- الحرمان
- رجيم اليوم الواحد
- نقاط الضعف
- الاعتماد على منتجات الدايت
- التغيير السريع بين الرجيمات
طريقة عمل عصير دايت طبيعي .. 3 عصائر هتحبيهم
ما الذي يفشل الرجيم؟
-
الحرمان من الأكل
كتير مننا بيكونوا فاكرين، إن تقليل الأكل بيخسس، لكن في الحقيقة إن كميات الأكل المتوازنة مهمة جدًا في الدايت، لإنها بتحفز عملية الحرق في الجسم، وفي نفس الوقت بتمنع عنك شراهة الأكل اللي بتحصل بسبب الحرمان، ده غير إن صحة الجسم بتتعب، وده هيأثر على ممارستك للرياضة.
-
رجيم اليوم الواحد
وده من أنواع الرجيم، اللي بتعتمد على أكل نوع واحد بس من الأكل أثناء اليوم، مثلًا أول يوم خيار وتاني يوم جبنة قريش وتالت يوم تفاح. الريجيمات دي ممكن تتعمل لفترة قصيرة جدًا، لكسر ثبات الوزن، بين أيام طويلة من الدايت الصحي والمتوازن، لكن ما ينفعش تعتمدي عليها كنوع رجيم مستمر، لإنها هتفقد جسمك كتير من العناصر والمعادن المهمة. وأول لما ترجعي تاكلي بشكل طبيعي، وزنك هيرجع يزيد تاني.
-
نقط الضعف
لو انتي في بداية الرجيم وفي أكلات معينة بتحبيها جدًا، ومش بتقدري تمسكي نفسك وتاكلي منها كميات معقولة، ما تروحيش لها بنفسك، وخصوصًا لو في لمّة، فمثلا لوا انت بتحبي البيتزا، واصحابك خارجين ياكلوا في مطعم بيتزا، متقوليش هروح بس مش هاكل، لإن ده تحدي كبير للإرادة مش دايما بينجح، وخصوصًا في البداية، لكن تقدري تلاقي خيارات بديلة، زي انك تخرجي معاهم بعد ما يخلصوا أكل، أو تطلبي لنفسك أكلة لذيذة وصحية ومناسبة لرجيمك.
-
الاعتماد على منتجات الدايت
المربى اللي بدون سكر، وبسكوت الشوفان، وغيرها من متجات الدايت، بتكون كويسة كبدايل متاحة عندك في البيت أو في الخروج، لكن ما ينفعش تعتمد عليها كنظام غذائي، لإن الأكل الصحي المتوازن أفضل بكتير وأرخص من الأكلات المُصنعة.
-
التغيير السريع بين أنواع الرجيم
الإسبوع ده إنتي عاملة كيتو، واللي بعده عامله اليوم الواحد، وبعدين تاخدي يومين فري، وبعدين تاخدي نظام متوازن، وترجعي للصيام المتقطع، كل ده من الأخطاء الكارثية في الدايت، لإن الجسم بيحتاج وقت مناسب لحد ما يتأقلم على كل نظام دايت، وبعديين يبدأ يستحيب لنزول الوزن، فاللي انتي بتعمليه، إنك كل لما الجسم يبدأ يستجيب، تصدميه بنظام جديد، وللأسف ممكن مش بس الرجيم يفشل، لأ ووزنك يزيد كمان.
التعليق باستخدام حساب فيس بوك