محتويات المقال
الرجل البخيل بيبان من الخطوبة، ويمكن من قبلها كمان. بس ساعات السكينة بتكون سارقانا أو مخدوعين بحاجة تانية. وساعات برضه بيكون الرجل نفسه مش بخيل في الخطوبة بيشد رجل، وبيبان بعد الجواز. أيًا كان بخل الرجل ظهر امتى، لازم تعرفي ازاي تتعاملي مع الزوج البخيل.
الأول نفهم ليه زوجي بخيل
قبل ما تبدأي تتعاملي مع الزوج البخيل، مهم تعرفي هو أصلًا بخيل ليه. هل هو مثلًا مر قبل كده، سواء في طفولته أو في شبابه قبل الجواز، بضائقة مالية كبيرة؟ أوقات الطفل الصغير لما بينشأ في ظروف اقتصادية صعبة، لما ربنا بيفرجها عليه ويبقى معاه فلوس، بيكون بخيل جدًا لإنه خايف يواجه مصير زي اللي هو عاشه قبل كده. في الحالة دي بيكون الحرص أو البخل نتيجة للإحساس بعدم الأمان. وهنا هيكون أفضل لو توجهتوا لمتخصص عشان يتعالج من أثر الأزمة عليه ويبدأ يتحرر من فكرة عدم الأمان.
الخلافات الزوجية .. ينفع نتخانق قصاد ولادنا عادي؟
بس هو ما كانش كده
لو الموضوع مش إن فيه ضائقة أثرت عليه وخلته يتقشف، فبصي حواليكم. أوقات الإحساس بانعدام الأمان ما بيكونش بسبب الطفولة، لكن بسبب القلق المرضي من المستقبل. فكري في ظروف عمله وشوفي لو هو في شركة من اللي معرضين في أي وقت لإنهم يقفلوا أو يقللوا العمالة. في الحالة دي، هيكون الزوج البخيل ده بيفكّر إنه لازم يشيل فلوس على جنب للزمن لإنه مش ضامن يستمر في الشغل ده.
بالفيديو: المساحة الشخصية في العلاقات الزوجية
كيفية التعامل مع الزوج البخيل
- التواصل
- التفكير في النفقات
- التفكير في طرق استثمار ذكية
- التنازلات المتبادلة
- حدود التنازلات
5 أفكار لـ توفير مصروف البيت والميزانية
التواصل مع الزوج البخيل
الحقيقة أنا لا أكلّ ولا أملّ إني تقريبًا كل مقال أقول لك إن المفتاح السحري بتاع أي علاقة في الدنيا هو التواصل. التواصل بيقرب أميال! اتكلمي مع جوزك، كإنه صاحبك، أو صاحبتك حتى، فضفضي معاه واشتكي له من ضيق الحال. من غير إهانة! الحل مش إنك تقولي له “يا بخيل” خالص. هتلاقي المشكلة كبرت أكبر بكتير وبقيتوا في مكان أسوء من اللي انتم فيه. اتكلمي معاه إنك نفسك تعملي حاجات للبيت أو لنفسك ومش عارفة لإن الفلوس قليلة. وحاولي ما تقوليش حاجات رفاهية عشان غالبًا هيتقال لك إنك عايزة تضيعي الفلوس على الكلام الفارغ. حددي إيه اللي ناقص في البيت، إيه الضروري اللي انتي محتاجاه ومش عارفة توصلي له، وقولي إن السبب في ده إنك ما بيوصلكيش فلوس كفاية.
التفكير في النفقات
مع الزوج، افتحي كشكول أو كراسة أو هاتي ورقة وقلم، واحسبي كل بند من بنود ميزانية البيت. وميزانية الولاد. وميزانيته الشخصية. وميزانيتك الشخصية. لو انتي بتشتغلي، احسبي انتي بتحطي قد إيه فلوس في البيت، أو إنك ببساطة شايلة من عليه هم ميزانيتك الشخصية. لو مش بتشتغلي، فكريه إنك قصاد إنك ما بتشتغليش برا البيت، بتشتغلي جوا البيت على توفير مكان آمن وجميل وهادي ونضيف له ولولادكم. مش معنى إنك قاعدة في البيت إنك مش محتاجة فلوس! انتي برضه محتاجة هدوم وموبايل وإنترنت وشنط وإكسسوارات ومحتاجة تروحي للكوافير. ودي مش كماليات، دي أساسيات عشانك وعشان نفسيتك وعشانه هو كمان.
أجمد 10 تطبيقات mobile apps لوضع ميزانية ومصروف البيت
التفكير في طرق استثمار ذكية
فيه دلوقتي شهادات استثمار عائدها المادي مش وحش أبدًا. وفيه طرق استثمار ما كانتش موجودة زمان. لو جوزك عنده عربية، ومش بيستخدمها طول اليوم، ممكن يستثمرها مع شركة من شركات الرحلات زي أوبر وكريم وغيرها. حتى لو مش هو اللي هيسوق، الشركات دي بتوفر له نسبة ربح، وهتفضل العربية موجودة معاه وبيجي لكم دخل من وراها. اقترحي عليه يشترك في جمعيات بحيث يكوّن مبالغ على بعضها ويستثمرها في شرا أسهم في شركات أو يشتري حاجة قيمتها بتغلى مع الوقت زي الدهب مثلًا. بكده، هو هيفهم إنك فعلًا بتفكري في مصلحته. ثانيًا: فكرة الخوف من الإفلاس دي هتخف لإن الاستثمارات المضمونة هتخليه يقدر يتحكم في باقي فلوسه بنوع من الأريحية.
التنازلات المتبادلة
لو لسه بعد كل ده شايف إن برضه انتي بتتكلمي في حاجة من الكماليات وإنه عايزك تتنازلي عن حاجة، وافقي! لكن بشرط: انتم الاتنين هتتنازلوا. أوقات الزوج بيكون بخيل بس مع زوجته. يعني تلاقيه بيصرف على القهوة والكافيه وفي النادي والبلاي ستيشن بكل سخاء وييجي عندك انتي ويعطل. في الوقت ده، قرري مع نفسك إيه الشيء اللي انتي ممكن تتنازلي عنه في مقابل إنه يصرف أحسن في بند تاني. وقولي له قرارك بهدوء، ولما يقول لك إن الشيء مش مستاهل، هتلاقي اللي تقوليه له عن القهوة والبلاي ستيشن.
حدود التنازلات مع الزوج البخيل
لما قلت لك قرري مع نفسك، كان قصدي إنك تكوني لوحدك عشان تفكري كويس ومن غير ضغط إيه هو الشيء اللي ممكن تتنازلي عنه وإيه الشيء اللي ما ينفعش تتنازلي عنه. يعني لو كريم البشرة ممكن يتبدل بكريم أوفر، الحفاض مش هينفع يتبدل بنوع أوفر لإن مش هاعرض ابني لتسلخات عشان الطرف التاني مش حابب يتنازل. ممكن تتنازلي إنكم تتغدوا في مطعم غالي، بس ما ينفعش تتنازلي إنكم تخرجوا مرة في الأسبوع أصلًا. وهكذا.
في النهاية، باتمنى لك علاقة زوجية هادية وسعيدة.
التعليق باستخدام حساب فيس بوك