محتويات المقال
الأفوكادو من الفواكه اللي نقدر نقول إنها حديثة الظهور في السوق المصري. هي فاكهة استوائية وعلى الرغم من فوائد الأفوكادو العظيمة بس إحنا لسه بنتعرف عليها جديد. أصبح لها محبين ووصفاتها انتشرت جدًا على الإنترنت. من الفواكه المرنة في طعمها وسهل تشكيلها، والنهارده هاقول لك على مدى أهمية وفوائد الأفوكادو اللي ممكن فعلًا تكون سبب إنك تعتبري الأفوكادو جزء رئيسي في نظامك الغذائي.
الأفوكادو مغذي بشكل رائع:
هتقولي كل الفواكه مفيدة؟ صح كلامك! بس اللي مختلف في الأفوكادو عن غيرها من الفواكه إنها غنية جدًا بالدهون الصحية على عكس غيرها من الفواكه الغنية بالكاربوهيدرات. ده غير إن من فوائد الأفوكادو إنها مليانة بالعناصر الغذائية المهمة زي حمض الفوليك، البوتاسيوم، الحديد والماغنسيوم.
الأفوكادو بتحتوي على البوتاسيوم أكتر من الموز:
دي من فوائد الأفوكادو المهمة، لأن بطبيعة الحال ناس كتير جدًا عندها نقص في العنصر المهم ده. واللي دوره الرئيسي هو تحسين التواصل الكهربائي بين الخلايا العصبية والعضلات. فبينما ثمرة فاكهة الأفوكادو بتقدر تقدم 14% من الاحتياج اليومي من البوتاسيوم، ثمرة الموز بتقدم أقل من 10% منه. ده غير إن دراسات كتير جدًا ربطت بين ارتفاع نسبة البوتاسيوم في الدم وبين انخفاض ضغط الدم اللي له آثار سلبية على صحة القلب والمخ والكلى. والسببين إللي فاتوا بيخلّوا الأفوكادو مفيد جدًا في الكيتو دايت أو ريجيم الكيتو
من فوائد الأفوكادو إنها مليانة بالدهون الأحادية غير المشبعة:
يعني إيه أصلًا دهون أحادية غير مشبعة؟ النوع ده من الدهون مهم جدًا لصحة القلب، بالخصوص لأنه بيعمَل على تقوية عضلة القلب والأوعية الدموية. ده غير إنه النوع اللي بيساعد على امتصاص الفيتامينات في الجسم. علشان كده، هتلاقي النوع ده من الدهون موجود في الأفوكادو وزيت الزيتون. والنوع ده من الدهون تم ربطه بمقاومة السرطان وفي نفس الوقت مضاد للأكسدة. علشان كده، بيُنصح بشدة بتناول الأفوكادو لأصحاب أمراض القلب.
اعرفي فوائد زبدة الشيا للشعر والبشرة
فاكهة الأفوكادو مليانة بمضادات الأكسدة:
أيضا من فوائد الأفوكادو الأساسيةإنه مضاد للأكسدة وبيحتوي على مادتين همّا carotenoids lutein ومادة zeaxanthin. اللي دورهم الرئيسي حماية العين والحفاظ عليها من مرض الإعتام، وده من الأمراض اللي بيعاني منها كبار السن بشكل كبير. علشان كده أطباء العيون بينصحوا بتناول فاكهة الأفوكادو أسبوعيًا لحماية العين والحفاظ عليها.
الأفوكادو مضاد لالتهاب المفاصل:
من الأمراض الشائعة في عصرنا الحديث التهاب المفاصل اللي أصبح مش بس مرتبط بكبر السن، إنما فيه شباب بيعانوا منه مع قلة الحركة وقلة التعرض للشمس. عشان كده، الباحثين لقوا إن مستخلص زيت الأفوكادو مع زيت الفول الصويا لهم دور كبير جدًا في تخفيف آثار النوع ده من الالتهابات بل والقدرة على الشفاء منه.
فوائد الأفوكادو في فقدان الوزن:
نظرًا لأن فاكهة الأفوكادو زي ما قلت لك بتحتوي على محتوى دهني صحي عالي، وُجد أن الأشخاص اللي بيتبعوا أنظمة غذائية بهدف تخفيف الوزن إن شعورهم بالشبع والامتلاء أعلى بـ25% من الوقت اللي بيتبعوا فيه نظام خالي من الأفوكادو. ده غير شعورهم بإن حركة أمعائهم منتظمة ومش بيعانوا من الإمساك. علشان كده، بينصح بيه بشدة لأنه كمان له ميزة إنه منخفض الكاربوهيدرات.
الأفوكادو مقاوم للسرطان:
العلماء لقوا إن ثمرة الأفوكادو لها دور فعال في مقاومة السرطان، وفي نفس الوقت التخفيف من آثار العلاج الكيميائي للخاضعين له. ده غير قدرتها على وقف نمو خلايا سرطان البروستاتا.
كده نكون وصلنا لإننا لازم نخلي فاكهة الأفوكادو جزء أساسي من نظامنا الغذائي مش بس للكبار وإنما كمان للصغيرين. كل الفوائد اللي فيه سبب كافي لاستهلاكه ده غير طعمه اللذيذ. تقدري تعمليه عصير، وتقدري تعمليه في السلطة. هتلاقي له وصفات سهلة ولذيذة كتير هتخليكي تحبيه جدًا. جربيه في أكلك وقولي لنا بتحبيه في أنهي صورة.
3 تعليقات
[…] اعرفي هنا فوائد الأفوكادو إللي هتخليكي تفكرّي تاكليه […]
to7faaaa
thanks