محتويات المقال
البصل واحد من أكتر الخضروات المليانة فوايد جبارة لصحتنا ولمناعتنا، ومهم جدًا إننا ندخّله في معظم أكلاتنا خصوصًا واحنا داخلين على فصل الشتاء. وبالرغم إن سعراته الحرارية قليلة جدًا، تكاد تكون لا تذكر، إلا إنه بيضيف المذاق المميز لأغلب الأكلات والشوربات واليخنات وكمان السلطات، وكمان بيحتوي على نسبة مذهلة من الفيتامينات والمعادن. والبصل كان بيستخدم قديمًا كنوع من أنواع العلاج لأمراض كتير منها الصداع، ألم الأسنان، وأمراض القلب.
فوائد البصل
المصدر healthline
- بيحتوي على نسبة عالية جدًا من فيتامين سي اللي بيعمل على تقوية وتعزيز مناعة الجسم.
- يحتوي على نسبة عالية من فيتامين B المهم جدًا لعملية التمثيل الغذائي في الجسم، وإنتاج خلايا الدم الحمراء.
- تشير الأبحاث لإن تناول البصل بيساعد على تقليل خطر الإصابة بأمراض زي ارتفاع ضغط الدم، وارتفاع نسبة الدهون الثلاثية وكمان مضاد للالتهابات.
- مفيد جدًا لمرضى السكر.
- مليان بمضادات الأكسدة.
- بيحتوي على مركبات بتساعد في الوقاية من الإصابة بالأمراض السرطانية.
- بيساعد على تنظيم نسبة السكر في الدم.
- له خواص مضادة للبكتيريا.
- البصل يعتبر مصدر غني جدًا بالبروبايوتيكس اللي بيساعد على تعزيز صحة الجهاز الهضمي والأمعاء.
شوفتي قد إيه فوايد البصل مذهلة، عشان كده جيبنا لك النهاردة وصفة لذيذة جدًا البصل فيها هو البطل، شوربة البصل الفرنسية كما قال الكتاب سهلة وبسيطة، لكنها بتدفي القلب ومليانة فوايد ليكي ولعيلتك.
طريقة عمل شوربة البصل
المقادير
المصدر cafedelites
- 6 حبات بصل أبيض أو أحمر أو مزيج بين الاتنين مقطعة شرايح.
- 2 لتر مرقة (خضار أو لحم ويفضل استخدام مرقة محضرة منزليًا).
- 4 معالق كبيرة زيت زيتون.
- 2 معلقة كبيرة زبدة.
- 3 فصوص توم مهروسين.
- أعواد الزعتر الطازة (ممكن يستبدل بالمجفف).
- 2 ورقة لورا.
- ملح وفلفل أسود.
- 2 معلقة كبيرة من الدقيق.
- 1 معلقة كبيرة خل العنب الأبيض.
للتقديم:
- شرايح خبز الباجيت محمصة في الفرن.
- جبنة جرويير (تقدري تستبدليها بأي نوع جبنة فرنسية)
طريقة عمل شوربة البصل
- في حلة على النار، ضيفي زيت الزيتون والزبدة وسخنيهم. بعدها ضيفي كل كمية شرايح البصل وقلبيهم على نار هادية، لحد ما يتغلف كل البصل بالزيت والزبدة، غطي الحلة وسيبي البصل لمدة 20 دقيقة، لحد ما يبدأ يطرى مع التقليب من وقت للتاني.
- شيلي الغطا من على البصل وابدأي عملية الكرملة، ضيفي رشة من الملح والسكر للبصل، وقلبيه باستمرار لحد ما يبدأ يتكرمل ويتغير لونه للون البني المكرمل ويفضل طري. العملية دي ممكن تستغرق منك حوالي 15 دقيقة.
- ضيفي التوم المفروم، وقلبيه مع البصل لحد ما تظهر ريحته، بعدها ضيفي الدقيق واطبخيه على نار هاديه لحد ما يختفي مع البصل.
- هدّي النار، وضيفي الخل، أعواد الزعتر، ورق اللورا، والمرقة مع التقليب وحاولي تحركي قاع الحلة بمعلقة خشب عشان تستخلصي كل الطعم اللي لازق فيها من كرملة البصل.
- غطي الحلة وسيبي الشوربة تستوي على نار هادية لمدة من 30-40 دقيقة لحد البصل ما يذوب تمامًا ويتقل القوام.
- جهزي شرايح الباجيت، بمسحة من الزبدة حمصيها في الفرن ورشي عليها الجبنة المبشورة.
- اغرفي الشوربة في بولات قابلة لدخول الفرن، وحطي فوق كل بولة قطعة باجيت، ودخليها الشواية لحد ما تسيح الجبنة.
- قدميها من رشة من أوراق الزعتر واستمتعي.
ملحوظة:
شوربة البصل الفرنسية الأصلية بتتحضر بدون كريمة. لكن لو حبيتي، تقدري تضيفي 200 مل من الكريمة بعد ما تستوي الشوربة.
التعليق باستخدام حساب فيس بوك