صيف يعني فواكه، فواكه الصيف الرائعة اللي بنستناها من الصيف للصيف وطبعًا ملك فواكه الصيف هو البطيخ، هذا الكائن المدور الأخضر اللي لما بنشوفه بنحس إننا هنتروي مياه وهنبعد عننا العطش، شكلها وهي على رخامة المطبخ واقفة بشموخ كده مالوش حل، أنا علاقتي بيه معقدة شوية لإني مش بحب أقشره كل شوية. علشان كده، باعمل حاجة تخلّصني من الموضوع ده، باجيب علبة كبيرة بغطاء محكم وباقطّع البطيخ قطع كبيرة وأحفظها في العلبة دي في التلاجة. طبعًا بيخلّي الدنيا سهلة جدًا بس عيبه الوحيد بيخلّي البطيخة تخلص في أقل من 24 ساعة، وده شيء مؤلم في حد ذاته، بس احنا هنتخطى أحزاننا، وهنتكلم في فوائد البطيخ اللي هي كتيرة ومهمة وتخلي الصيف ما يعديش عليكي من غير ما تاكليه، فتعالي نشوف إيه هي أهم فوائد البطيخ الصحية.
هنا ممكن تشوفي 5 مشروبات صيفية منعشة لتقوية وزيادة مناعتك
فوائد البطيخ الصحية:
- بيساعد على ترطيب جسمك:
انتي متخيلة إن 92% من البطيخة دي عبارة عن مياه، الصيف بتحتاجي فيه تشربي كميات من المياه علشان تعوضي النقص اللي بيحصل في جسمك بسبب الحر، فواكه الصيف كلها بتتميز بارتفاع نسبة المياه فيها. ده غير على فكرة أكل الخضروات والفواكه الصيفية بتديكي إحساس بالشبع بسبب المياه والألياف اللي فيها، وده بيفرق مش بس في ترطيب جسمك إنما كمان في وزنك.
- مليان عناصر غذائية:
البطيخ من أكتر الفواكه المنخفضة السعرات الحرارية، يعني كوباية واحدة منه فيها حوالي 47 سعر حراري، اللي هو أهلًا بمذابح البطيخ اللي هيتاكل في الصيف ده، غني جدًا بفيتامين C يعني مفيش خوف على المناعة لو فيه حد بيفكر إن الفيتامين ده موجود في فاكهة الشتاء بس، لا هو عادي مكمل معانا في الصيف.
- بيحمي من السرطان:
من الحاجات الحلوة في البطيخ إنه مليان مضادات أكسدة، اللي لها دور فعال وحقيقي في محاربة الجذور الحرة اللي بتعتبر سبب أساسي لظهور علامات الشيخوخة والتقدم في السن والإصابة بالأمراض المستعصية زي السرطان.
- بيحسن الهضم:
من أهم فوائد البطيخ إنه فعلًا بيساعد على تحسين الهضم، ومقاوم كويس جدًا للإمساك، يعني لو بتعاني من مشكلة في الإمساك، فالبطيخ والقراصيا كمان من أفضل الخيارات الطبيعية والصحية والفعالة في نفس الوقت.
- مفيد جدًا للشعر والبشرة:
البطيخ في نوعين من الفيتامين اللي هم C & A، ودي هي الفيتامينات رقم واحد للشعر والبشرة، فيتامين C بيكون الكولاجين اللي هو بروتين أساسي في نضارة البشرة وقوة الشعر.
وفيتامين A أساسي في تكوين الخلايا وبالتالي الحفاظ على شباب البشرة والشهر بشكل ملحوظ، وطبعًا الألياف والمياه اللي في البطيخ مش هنقدر نغفل عن ذكر مدى أهميتهم في الحفاظ على صحة ونضارة البشرة والشعر.
تقدري دلوقتي تتأكدي إن البطيخ فاكهة مفيدة لكل جوانب حياتك، ده غير إنها فعلًا فاكهة منعشة وبتعتبر الإختيار الأفضل في الصيف ليكي ولأولادك، في نفس الوقت أي حاجة الكتير منها مضر، أوقات المبالغة في استهلاك البطيخ ممكن تجيب حالات من الإسهال قد تكون مميتة.
عمومًا ما تنسيش لو عايزاها تطلع “أحمر على أبوه يا بطيخ” اختاري دايما الثمرة الكاملة الاستدارة، لونها قوي، لو على القشرة بقعة فاتحة، فاعرفي إن ده مكان ورقة النبات نفسه واختاري البقعة المايلة للأصفر لإن دي بيدل على حلاوتها، ولما تخبطي عليها يكون صوتها شبه صوت الطبلة الجديدة، وما تتحرجيش تطلبي من الفكهاني يفتحها لك.
التعليق باستخدام حساب فيس بوك