محتويات المقال
حقيقي لما بدأت أدور على فوائد التفاح ذهلت من قد إيه فوايدها كتير جدًا وكتير منها مش معروف. بجانب إنه واحد من أكتر الفواكه شعبية – تقريبًا مفيش حد مش بيحب التفاح سواء أحمر أو أصفر أو أخضر – طعمها لذيذ جدًا وتحسي دايمًا كل لون له طعم وشخصية مختلفة عن التاني. والنهارده جمعت لك مجموعة من فوائد التفاح، وغالبًا بعد المقال ده، هتلاقي نفسك بتاكلي التفاح كل يوم. فتعالي نعرف إيه هي الفوائد دي مع بعض:
أهم فوائد التفاح الصحية
قيمة التفاح الغذائية العالية (ملكة الفواكه):
خبراء التغذية بيوصوا بتناول ما قيمته كوبين من الفواكه يوميًا. فتخيلي إنك لما تتناولي تفاحة متوسطة في اليوم، فالقيمة الغذائية اللي هتحصلي عليها هتساوي كوباية بحالها. وده بسبب ما يتميز به التفاح من قيمة غذائية عالية جدًا وهقول لك هي إيه.
- سعرات حرارية: 95 سعر (كالوري)
- كربوهيدرات: 25 جرام
- فيتامين سي: 14% من الكمية الموصى بيها يوميًا
- بوتاسيوم: 6% من الكمية الموصى بيها يوميًا
- فيتامين ك: 5% من الكمية الموصى بيها يوميًا
وده طبعًا غير نسب بسيطة تانية من عناصر تانية زي الماغنسيوم والنحاس. وبانصحك بتناول التفاح بقشره علشان تحصلي على كل الفوائد اللي فيه.
اعرفي هنا فوائد الأفوكادو إللي هتخليكي تفكرّي تاكليه
التفاح للتخسيس .. بيساعد على خفض الوزن (صديق الدايت):
وزي ما انتي شايفة، السعرات الحرارية للتفاح منخفضة جدًا. يعني يعتبر واحدة من أهم الأغذية اللي بتساعد على انخفاض الوزن لأنها بتشبع وبسعرات حرارية لا تذكر وفي نفس الوقت مليان بالألياف. علشان كده، بينصح بيه دايمًا في أغلب الأنظمة الصحية المعتمدة لتخفيض الوزن. الدراسات وجدت إن الأشخاص اللي بدأوا وجباتهم الرئيسية بأكل شرحتين من التفاح، انخفض استهلاكهم في الأكل تقريبًا 200 سعر حراري. ومع إجراء التحليل للأشخاص دي، لاقوا إن انتظامهم في استهلاك التفاح في نظامهم الغذائي مش بس ساعد على خفض أوزانهم. لأ ده كمان ساعد على خفض الدهون الثلاثية والكوليسترول الضار وحسّن من وظائف القلب بنسبة كبيرة.
فوائد التفاح لصحة القلب:
خبراء التغذية وأطباء القلب بيربطوا دايمًا ما بين التفاح وقوة القلب. ويمكن السبب الرئيسي للربط ده إن التفاح بيحتوي على نوع من الألياف اسمه ألياف سهل إذابتها في المياه. واللي هي واحدة من أهم الطرق المستخدمة لخفض الكوليسترول الضار في الدم. واللي كمان مميز في التفاح إن قشره هو اللي فيه الفايدة الغذائية الأكبر.
التفاح ومرض السكر:
من خلال الأبحاث الطويلة اللي اتعملت على فوائد التفاح، العلماء وجدوا إن التفاح له دور مش ممكن إنكاره في تخفيض مقاومة الأنسولين وبالتالي تقليل خطر الإصابة بمرض السكر من النوع التاني. ده غير قدرته على الحفاظ على خلايا البنكرياس وبالتالي حماية أكتر. لدرجة إن العلماء قالوا إن الانتظام في أكل التفاح له تأثير بيوصل 28% في تقليل خطر الإصابة بمرض السكر.
التفاح يعزيز الهضم ونمو البكتيريا النافعة:
يا ترى تعرفي إن في أمعائنا بتنمو أنواع من البكتيريا النافعة اللي من غيرها بنتعرض لمشاكل صحية خطيرة جدًا. في التفاح فيه نوع من الألياف اسمه pectin. المميز بخصوص الألياف دي إنها بتتحول لنوع من أنواع المضاد الحيوي وبالتالي البكتيريا النافعة في الأمعاء بتتغذى عليها وبتتكاثر أكتر. بس خلي بالك الامتصاص ده مش بيتم في الأمعاء الدقيقة لأنها مش بتمتص الألياف إنما دي وظيفة القولون علشان كدة أغلب المنتظمين في أكل التفاح عندهم مشاكل أقل مع القولون.
التفاح يقاوم السرطان:
وجدت بعض الدراسات إن العناصر من مضادات الأكسدة ومضادات الإلتهاب المتواجدة في التفاح لها دور في الحماية من الإصابة بالسرطان.
التفاح يقاوم الربو:
في حياتنا الحالية، أصبح التعرض المستمر للملوثات والأجواء اللي مليانة بعوادم سيارات وحتى معادن ثقيلة له دور في زيادة عدد المصابين بمرض الربو. ده غير طبعًا الأشخاص المصابين بالمرض ده وراثيًا. علشان كده التفاح بكل ما يتميز بيه من مضادات للأكسدة يقدر فعليًا يحمى الرئة من التأكسد. ولازم تعرفي إن أكبر كمية من مضادات الاكسدة دي موجودة في قشرة التفاحة نفسها. علشان كده خليكي حريصة على تناول التفاحة كاملة من غير تقشير لأنه فيها كل المواد اللي جسمك محتاجها لتقوية جهازك المناعي.
فوائد التفاح لعضمك ومخك:
من خلال التجربة على عدد كبير من السيدات، العلماء لاقوا إن المنتظمات في تناول التفاح في نظامهم الغذائي كان عندهم نسبة فقد أقل في الكالسيوم في عظامهم وبالتالي تمتعوا بعظام صحية أكتر وأقوى من مثيلاتهم. وفيما يخص صحة المخ، وجد العلماء إن عصير التفاح له دور فعال في الحفاظ على الخلايا العصبية في المخ وكمان تحسين وظيفة التبادل العصبي بينهم وبين بعض بالشكل اللي بيساعد على زيادة قوة الذاكرة.
أعتقد دلوقتي انتي مش هتعدي يوم من غير تفاح! لأنه هيكون مفيد ليكي ولكل أفراد أسرتك. خلي دايمًا اهتمامك المستمر بصحتك زي ما بتهتمي بصحة أسرتك كلها. تناول الفواكه مش بس مفيد جسديًا، وإنما له تأثير إيجابي على النفسية لأن فيتامينات الفواكه اسمها فيتامينات السعادة. ما تحرميش نفسك من السعادة والصحة والفرفشة دايمًا. أشوفك في المقال اللي جاي ومعاكي تفاحة.
التعليق باستخدام حساب فيس بوك