فوائد الحلبة ممكن ما تتعدش فعلًا، تحسي معاها إنها بتاعة كله. أو في قول آخر، سبعة صنايع والبخت ضايع. وسبب ضياع البخت ده طبعًا هو ريحة الجسم لما تشربي كوباية حلبة حصى معتبرة. ريحة الجسم بتكون مش محببة خالص وبتخليكي عايزة تحلفي للناس إنك لسه واخدة شاور من ساعة. بس فيه حل جميل جدًا دلوقتي وهو إنك تقدري تطلبي مكملات غذائية مكونة من مستخلص الحلبة. ده حل عبقري إنك بتستفيدي من كل فوائد الحلبة بدون رائحتها المزعجة. بس سواءً كنتي من أنصار المكملات الغذائية أو old school، لازم أعرّفك مجموعة بسيطة من فوائد الحلبة اللي هتأثر عليكي وعلى كل أفراد أسرتك.
فوائد الحلبة
- فوائد الحلبة للأم والطفل:
وجد العلماء إن الحلبة لها تأثير إيجابي وآمن جدًا على الأم اللي قررت تستخدم الرضاعة الطبيعية كوسيلة لتغذية طفلها. لاقوا إن الأمهات المنتظمة في تناول الحلبة أو مكملات غذائية بتحتوى على مستخلص الحلبة بيكون إنتاج اللبن وحتى دسامته أكتر، وده بينعكس بدوره على تغذية طفلها وبتساعد على زيادة وزنه.
- فوائد الحلبة للرجل:
من خلال الأبحاث، وجد المتخصصين إن الرجال اللي انتظموا في تناول الحلبة، كان لها أثر إيجابي في زيادة هرمون التستستيرون اللي انعكس على الرغبة الجنسية، وفي نفس الوقت القوة العضلية خلال ممارستهم للرياضة. علشان كده، بيُنصَح بالانتظام في تناول الحلبة للرياضيين.
- خفض السكر:
من زمان والحلبة بتستخدم كعلاج منزلي آمن وفعال لأصحاب مرض السكر من النوع التاني. وده بسبب قدرتها العالية جدًا على تحسين وظائف البنكرياس ورفع حساسية الخلايا لاستقبال الأنسولين. بس على الرغم من ده، بينصح إن لو مريض السكر انتظم في تناول الحلبة، لازم يراجع طبيبه في جرعات الدواء علشان قدرتها الحقيقية في تخفيض سكر الدم.
- تخفيض الكليسترول وضغط الدم:
وجد الباحثون إن المنتظمين في تناول الحلبة انخفض عندهم معدل الكوليسترول الضار اللي بدوره أثر بشكل إيجابي على ارتفاع ضغط الدم، وفي نفس الوقت تقوية جدار الأوعية الدموية. علشان كده، أصحاب الأمراض المزمنة زي السكر وضغط الدم المرتفع عليهم الانتظام في تناول الحلبة، وإنها تكون جزء أساسي من نظامهم الغذائي.
- التحكم في الشهية:
من الحاجات اللي لوحظت على الأشخاص المنتظمين في تناول الحلبة هو انخفاض شهيتهم واستهلاكهم الأقل لوجبات عالية السعرات، وده كان له أثر إيجابي على خفض أوزانهم.
اتعرفي على وصفات للتخلص من الإمساك
- للشعر:
الحلبة من زمان معروفة إن زيتها له قدرة ممتازة على ترميم الشعر وتطويله وترطيبه في نفس الوقت. بس لازم تعرفي إنه مش زيت للاستخدام اليومي، إنما هو زيت بيستخدم كماسك للشعر. وبانصحك به جدًا لو فعلًا شعرك بيعاني من تلف سواء من إهمال أو صبغة أو أي سبب تاني.
وفي النقطة دي، هاوصف لك وصفة زيت الحلبة اللي باستخدمها. أوقات بيكون صعب إني ألاقي مصدر موثوق فيه للحصول على زيت حلبة أصلي. علشان كده، باجيب زيت زيتون أصلي معصور على البارد وباحط فيه مقدار أربع معالق حلبة حصى وأربع فصوص توم متقطعة، وأحطهم في برطمان وفي مكان مظلم، زي دولاب في المطبخ مثلًا لمدة أسبوعين على الأقل. خدي بالك من الريحة لما تفتحيه، وحاولي تتغاضي عنها وتحطيه على شعرك من ساعتين لتلاتة قبل غسيله. وانسي خالص إنك طبق فتة متحرك في البيت. بس حقيقي التأثير بيظهر من أول مرة وخصوصًا الترطيب والنعومة. جربي وقولي لي نفعت معاكي الوصفة دي ولا لأ.
التعليق باستخدام حساب فيس بوك