ما كفاية فلوس وتمارين بقي لكده، وقعّدي الولاد يذاكروا أحسن، إيه فوائد الرياضة يعني؟!
جملة باسمعها كتير وأعتقد غيري كتير كمان من الأمهات اللي من جيلي بيسمعوها عن ولادهم والتمارين، يا تري ليه بقي معظمنا رايح جاي علي التمارين بالعيال كل يوم والتاني، بقينا مقضيين نص اليوم في النادي والتمارين، طب ياتري ليه بنعمل كدة في نفسنا وفي العيال! هل كلنا نفسنا يطلعوا ولادنا أبطال عالمية واللا إحنا غاوين فرهدة وصرف فلوس واللا إيه فوائد الرياضة في حياة ولادنا!!
فوائد الرياضة للأطفال
- الرياضة بتعلم الطفل إزاي يتعامل مع مبدأ المكسب والخسارة وإزاي يستحمل الخسارة ومشاعر الإحباط بعدها.
- الرياضة بتعلم الطفل يكون شخص إجتماعي ويتعايش مع أي مجتمع يتحط فيه.
- الرياضة بتعلمهم “الصبر” بيفضلوا سنين وسنين يتمرنوا ويحاولوا ويجهزوا في نفسهم عشان يوصلوا لهدف سواء كان صغير أو كبير بس بيتعلموا إزاي يقعدوا سنين يخططوا له ويصبروا عشان يوصلوا له.
- الرياضة بتشغلهم، بالنسبو لي كفاية إن التمارين بتشغل ولادنا في حاجات مفيدة بعيدة عن التلفزيون وبعيدة عن أي إكتشاف غلط ممكن فضولهم يوديهم له.
- الرياضة بتعلم الطفل غزاي اوقات ممكن يعمل حاجات مش عايزها، عشان ده قواعد الفريق او أوامر الكابتن
- الرياضة بتعلمهم إن life is not fair وإن مش دايما اللي بنسعي له نقدر نحققه، وإن اه ربنا مش بيضيع مجهود حد بس في نفس الوقت إحنا بنعمل اللي علينا والنتيجة ده مش بتاعتنا.
- الطفل اللي بيلعب رياضة من صغره ثقته في نفسه وفي قدراته بتبقي واضحة في مرحلة المراهقة عن غيره من الأطفال، لأنه بيكون عدي بتجارب أكبر من سنه في أوقات كتير بسبب ممارسته للرياضة.
وآه الرياضة طبعا هدف من أهدافها المشروعة إن الطفل يحس بحلاوة المكسب وإنه يدخل بطولات ويكسب وياخد ميدليات ويمثل بلده كمان، لكن مهم نعرف إن مش ده الأساس ومش ده الفايدة الوحيدة اللي هتوصل لولادنا من التمارين وممارسة الرياضة المستمرة.
والأهم من ده كله في ممارسة الرياضة إن الطفل هو اللي يختار الرياضة اللي بيمارسها ويبقي حابب اللي بيعمله ونفضل فاكرين إننا نشجع مجهودهم مش النتيجة، ومانضغطش عليهم أو نعاقب أو نزعق عشان خاطر البطولات او التمارين، لأن ده هيجي بنتيجة عكسية تماما وهيكره الرياضة من أساسها.
التعليق باستخدام حساب فيس بوك