محتويات المقال
في الفترة الأخيرة، الكلام عن فوائد ممارسة الرياضة بشكل منتظم أصبح كتير جدًا. هتلاقي دايمًا حواليكي كلام لمدى تحسن الحالة الجسدية والنفسية لناس انتظموا في الرياضة، إعلانات عن ملابس الرياضة بمختلف تصميماتها وأوقات فيه لوم في الكلام للناس اللي مش بتمارس رياضة وده بيشكل عبء نفسي على اللي بيسمع. والحقيقة ده مش صحيح أبدًا. انتي مش محتاجة نهائي لفكرة الجيم والالتزام بيه علشان تمارسي رياضة. مش محتاجة تبذلي مجهود مرسوم لممارسة الرياضة. انتي محتاجة تمارسي الرياضة اللي تناسبك، هنقول لك ازاي.
حقيقي الرياضة بتفرق في الحالة النفسية للشخص اللي بيمارسها، وبتفرق معاه بشكل كبير لكن الاختيارات متعددة، وفيه منها المريح غير المكلف. زي إنك تنزلي تمشي في الشارع في وقت هادي من اليوم. التزامك بحاجة بسيطة زي دي لمدة نص ساعة تلات مرات بس في الأسبوع هتفرق معاكي كتير. وعلشان تتشجعي أكتر وأكتر، هنقول لك الرياضة بتفرق في الصحة النفسية قد إيه من خلال النقاط دي.
-
بتحسن من مزاجك
من الحاجات اللي بتعتبر أساس في ممارسة الرياضة هي إن لها قدرة على مساعدة المخ على إفراز هرمونات السعادة واللي بدورها بتبدل من مزاجك تماما .. حاولي تجربي الرياضات الجماعية .. بمعنى اللي بيشاركك فيها مجموعة مختلفة من الناس .. هتخلق بينكم روح منافسة جميلة وشعور بالإنجاز والتواصل الإنساني اللي كلنا بنحتاجه .
-
بتساعد على تحسين التركيز
مع التقدم في العمر من الحاجات اللي بنلاحظها على نفسنا إن قوتنا الجسدية بتنخفض وقوة ذاكرتنا بتضعف فعلا .. علشان كدة كانت ممارسة الرياضة لمدة نص الساعة يوميا ليها مفعول مباشر على تقوية عضلات الجسم وتحسن مستوى التركيز بشكل ملحوظ جدا.
-
بتحسن من نومك
لو كنتي من النوع اللي بدأ يظهر عليه إضطراب في النوم فده الوقت الأنسب للمارسة الرياضة .. لو سبب الإضطراب ده مش عضوي وهي مجرد ضغوط طبيعية يومية فالرياضة هتقدر تساعدك على بذل المجهود اللي هتخرجي فيه الضغط أو الكبت اللي جواكي وتحسن مزاجك وتخلي الجسم قادر يدخل في النوم بشكل أعمق وأسرع .. بس ما تمارسيش أي شكل من أشكال الرياضة العنيفة في الساعات المتأخرة من اليوم لأن ده هيصعب عليكي النوم جدا .. لو هتمارسي بليل أي رياضة خليها خفيفة وهادي علشان أعصابك تكون مسترخية.
-
بتساعد على التعامل مع الإحباط
من الحاجات اللي بتعلمها الرياضة خصوصا لو جماعية هي فهم وإستيعاب إن مش دايما هنكسب ..لأ ده هيجي أيام وهيكون فيها خسارة هنتحملها كلنا كفريق وبالتالي تعلم تحمل النتيجة والسعي كفريق لتجاوز الخسارة ومحاولة العودة من جديد .. يعني هتتعلمي إزاي يكون عندك مرونة في التعامل مع المواقف المحبطة وأي إنتكاسة في الحياة.
-
طاقة أعلى
لو أبتديتي تحسي إن مستوى طاقتك منخفض فالحل في ممارسة الرياضة .. تحريك الجسم بشكل منتظم بيساعد على شد وتقوية العضلات بحيث إن قدرة التحمل تكون أكبر وبالتالي الإنتاجية أعلى حتى لو مجرد نص ساعة في اليوم .
الرياضة مهمة ليكي مش علشان بس تحافظي على شكل جسم متناسق .. حاليا اللي محتاجة تركزي فيه في حياتك مش بس شكلك الخارجي إنما صحتك النفسية الداخلية اللي محدش يعرف تفاصي تعبها غيرك .. ممارسة الرياضة شكل من أشكال العلاج النفسي اللي هترفق جدا في قدرتك على التعامل مع تحديات الحياة وهتلغي الإحساس بأي دراما في حياتك .. جربي في الاول رياضة بسيطة وبالتدريج .. ما تخليش الرياضة وسيلة ضغط عليكي إنما دايما وسيلة تفريغ ضغط .. قولي لنا هتبدأي بممارسة رياضة إيه؟
التعليق باستخدام حساب فيس بوك