محتويات المقال
في الفترة الأخيرة، انتشر اسم الزبادي اليوناني في وطننا العربي. احنا كلنا عمومًا متعودين على الزبادي العادي، واللي فيه ناس بتسميه الزبادي البلدي. بس في الفترة الأخيرة على قد فوايده، عرفنا إن الفوايد دي بتختلف على حسب نوع الخميرة اللي بيتعمل منها الزبادي، وإنه رغم فوايده له أضرار ممكن نتجنبها عن طريق تناول الزبادي اليوناني، اللي هو على فكرة قديم مش نوع مستحدث بس احنا اللي كنا مش عارفينه. والحلو إنك دلوقتي سهل عليكي تلاقيه في أي سوبر ماركت كبير لأسماء ماركات لمنتجات ألبان احنا عارفينها ومتعودين عليها. والنهارده، جبنا لك مجموعة فوائد للزبادي اليوناني هتخليكي تقتنعي باستخدامه. بس قبل الفوايد دي هنقول لك على شوية فروق بينه وبين الزبادي العادي.
الفرق بين الزبادي العادي وبين الزبادي اليوناني
- الزبادي اليوناني متماسك أكتر من الزبادي العادي، وده بسبب استخلاص مصل اللبن منه اللي بيكسب اللبن أصلًا القوام السائل. المصل ده بيتشال من الزبادي اليوناني.
- الزبادي اليوناني بيحتوي على كمية بروتين أعلى من الزبادي العادي.
- الزبادي اليوناني بيحتوي على كمية كربوهيدرات وسكر أقل من الزبادي العادي، علشان كده بيعتبر الاختيار الأفضل لإنقاص الوزن.
- الزبادي اليوناني بيحتوي على كمية دهون أعلى من الزبادي العادي، وعلشان كده يعتبر مصدر ممتاز للطاقة.
هي دي الفروق الأساسية بينهم، ودلوقتي تعالي اعرفي أهم فوائد الزبادي اليوناني.
فوايد الزبادي اليوناني
- بيعزز من قوة العظام.
- بيساعد على تسريع الحرق.
- تحسين صحة الأمعاء.
- هتحصلي على احتياجك من B12.
- أفضل وجبة بعد التمرين.
-
بيعزز من قوة العظام
بسبب احتواء النوع ده من الزبادي على نسبة عالية من الكالسيوم والبروتين، وجد الباحثون إن الانتظام في تناوله بيساعد على تحسين صحة العظم وتقويته.
-
بيساعد على التحكم بالشهية وتسريع الحرق
ارتفاع نسبة البروتين فيه بتساعد جدًا على زيادة عدد ساعات الشبع بعد تناوله، وبالتالي استهلاك أقل للسعرات الحرارية، وفي نفس الوقت ومع نظام غذائي متوازن، البروتين ده بيساعد على زيادة الحرق في الجسم.
-
تحسين صحة الأمعاء
لإن الزبادي اليوناني بيحتوي على البروبيوتيك probiotics اللي هي في حد ذاتها خمائر مفيدة تعمل على زيادة البكتيريا المفيدة في الأمعاء واللي ليها دور في تحسين عملية الهضم وحركة الأمعاء وسهولة امتصاص المواد المفيدة في الطعام علشان يستفيد منها الجسم.
-
هتقدري تحصلي على احتياجك من الـ B12
الـB12 من أهم العناصر لصحة الأعصاب والمخ والزبادي اليوناني بيتميز إنه مصدر طبيعي غني جدًا له. هو في العادي متوفر في اللحوم والبيض لكن بالنسبة للناس اللي بتتبع نظام عذائي نباتي بيعانوا من نقصه بشكل حاد علشان يعتبر الزبادي اليوناني بديل طبيعي ممتاز ليهم.
-
أفضل وجبة بعد التمرين
من أفضل الأمور في الزبادي اليوناني إنه بيحتوي على البروتين اللي بدوره بيكون أفضل وجبة تعوض جسمك على كل المجهود اللي بذلتيه في التمرين وبالتالي إعادة بناء العضلات من تاني.
دي تعتبر أهم مميزات الزبادي اليوناني لصحتك، واللي فعلًا مفروض تفكري بكل جدية إنك تدخليه في نظامك الغذائي أكتر من الزبادي العادي. فهو بديل ممتاز، له بفوايد أكبر وطعم لاذع شوية. احرصي على اختياره سادة بدون إضافات علشان تحصلي على قيمته الغذائية كاملة. واستخدميه كبديل لأنواع كريمة الحلويات اللي مليانة سكر.
التعليق باستخدام حساب فيس بوك