كل يوم بنفكر إزاي نخرّج ولادنا من جو التوتر اللي عايشينه بسبب الكورونا والقعدة من المدرسة. وبندور علي أي أنشطة للأطفال تبعد الولاد عن التلفزيون وتشغلهم وتحسّن مزاجهم شوية. الجميل إننا قدامنا حاجة سهلة وبسيطة ممكن نستفيد بيها كتير في الوقت ده وهي “الزراعة”. أيوة الزراعة للأطفال هتعلمهم حاجات مهمة جداً. تخيل أن زرعة واحدة للطفل يكون بيتابعها ويهتم بيها ممكن تساعده يتعلم مهارات حياتية كتير، هنا هنكلمكم عن ايه هي فوائد الزراعة اللي هتخليكي تجربيها مع أولادك.
فوائد تعلم الزراعة للأطفال
- الاهتمام بالزرع بيساعد في تعلمهم المسؤولية وبتعزز ثقتهم بنفسهم: لما الطفل بيهتم بزرعته ويعتني بيها ويبقى عارف إنها مسؤوليته ويسقيها كل يوم، ده بيدي إحساس للطفل إنه مهم وله دور ومتحمل مسؤولية حياة الزرعة ده.
- بتعلمهم الصبر: بما إن الأطفال دايمًا مستعجلين وعايزين طلباتهم تتنفذ حالًا، فالاهتمام بالزرع من الحاجات اللي هتساعدهم يتعلموا الصبر من غير تدخل مننا، لإنهم بيضطروا يتابعوه ويراقبوه ويهتموا بزرعتهم كل يوم ويشوفوا كمية الوقت والمجهود المطلوبين عشان يشوفوا النتيجة بعد فترة قدام عينيهم وهي بتكبر وبتتفتح ويحسوا بالإنجاز بعد صبرهم.
- بتعلمهم مهارة التخطيط والتنظيم: اللي متعود يهتم بالزرع ويكبّره بيبقي محتاج إنه يفهم عن أنواع الزرعات والورود المختلفة وامتي الموسم اللي بيزدهر فيه كل نوع، لو الطفل اتعود يهتم بالزرع الخاص بيه ويفهم طبيعة كل نوع وينظم زرعاته ويخطط حسب موسم تزهيرها كإنه بيرسم لوحة فنيه محتاجة تنميق وإبداع، ده بيفيد الطفل من سن صغير على تحفيز مخه على الإبداع وتمرينه علي مهارات التخطيط والتنظيم.
- بتزود التركيز وكفاءة الذاكرة وبتحسن المزاج والحالة النفسية: من أهم الفوايد للاهتمام بالزرع من وجهة نظري الأيام دي بالذات هي تحسين الحالة المزاجية وترويق العقل وفصله عن التوتر. ده غير إن وجود الزرع حوالين ولادنا بيقلل القلق، وبيتهيأ لي، دي من أكتر الحاجات اللي احنا محتاجينها لينا ولولادنا في الظروف دي. ده غير إن فايدته معروفة في تنقية الجو وزيادة الأكسجين واللي بالتالي بيزود نشاط وتركيز عقل الطفل.
- بتعوّدهم يقضوا وقت مفيد بعيد عن الشاشات: طبعًا مع الفراغ والوقت الفاضي الكبير دلوقتي، تقضية الوقت في الاهتمام بالزرع والتركيز في مواعيد ريه من وسائل الترفيه المفيدة اللي ممكن ولادنا يتشغلوا بيها بعيد عن الشاشات وكمان لما نشاركهم ويكون لكل واحد في البيت الـ pot بتاعته بأنواع الورد أو الزرعات المفضلة عنده ونقضي الوقت واحنا بنهتم بيهم وبنتكلم، ده من احلي أفكار الكواليتي تايم quality time اللي ممكن نقضيها بروقان مع الولاد.
ياللا اتشجعوا وابدأوا تجربة الزرع مع ولادكم وشاركونا تجربتكم.
مصادر:
mommy university
teach starter
What’s your Reaction?
1 comment
[…] فوائد الزراعة للأطفال […]