محتويات المقال
عشبة الزعتر أول ما بنسمع اسم العشبة العطرية دي تقريبًا أول حاجة بتيجي في دماغنا هو استخدامه في تتبيل الأكل زي اللحوم وشويها. وفيه ناس بتفتكر العطور خصوصًا لو هم من محبي العطور اللي روائح الأعشاب فيها واضحة. في الحقيقة، عشبة الزعتر لها أكتر من الاستخدامين دول بكتير وفوائد الزعتر متنوعة وصحية وتستخدم كتير في الطب البديل. عمومًا هو بيتوفر في الأسواق على شكل نبات أخضر طازج أو مجفف أو زيت الزعتر. كل واحد منهم ليه الاستخدام الخاص بيه. ومن مميزاته إنه واحد من العلاجات المنزلية الآمنة اللي بتستخدم في بيوتنا من زمان جدًا لدرجة إنه يعتبر عشبة تاريخية. فتعالي أقول لك على شوية من فوائد الزعتر وطريقة استخدامه.
أهم فوائد الزعتر الصحية
الزعتر بيخفض ضغط الدم
نظرًا لإن الزعتر بيحتوي على زيوت عطرية مهدئة، فكان من الشائع جدًا استخدامه كمشروب دافيء ومهديء، بيساعد على خفض ضغط الدم. والباحثين لقوا إن المرضى اللي انتظموا في شرب كوب من الزعتر يوميًا كانت معدلات انخفاض ضغط الدم عندهم أفضل بكتير من المرضى الآخرين.
شوفي هنا فوائد التفاح: فوائد مذهلة لو كلتي تفاحة واحدة في اليوم
فوائد الزعتر كمهدئ للسعال
من أفضل استخدامات الزعتر، وبيتشرب على شكل شاي. لو انتي أو حد من أفراد أسرتك عانى من التهاب في الحلق أو التهاب في الشعب الهوائية أو أي أمراض صدرية عمومًا هيعتبر شاى الزعتر واحدة من أفضل العلاجات المنزلية اللي تقدميها له مخلوطة بزهر البابونج أو زي ما بنسميه شيح بابونج.
زيت الزعتر كمطهر
العفن – وهو نوع من أنواع الفطر – ممكن تكتشفي إنه عايش في بيتك. وده له آثار سلبية جدًا على الصحة، غير الرائحة غير المستحبة ولا مقبولة أبدًا. علشان كده بينصح الخبراء باستخدام طريقة طبيعية قادرة على تخليصك من العفن ده للأبد، متمثلة في استخدام زيت الزعتر نظرًا لتركيز المادة المطهرة فيه. بمجرد غسلك للمكان المصاب بالتعفن، قومي برشه بمحلول مخفف من الزعتر والمياه، هتلاقي إنك تخلصتي من مشكلة العفن كرائحة وككائن حي مضر عايش عندك في البيت.
فوائد الزعتر لتقوية المناعة
من العناصر المتوفرة في الزعتر وكانت مفاجأة بالنسبة لي إنه غني جدًا بفيتامين C، وفي نفس الوقت غني بالنحاس والحديد والمنغانيز. علشان كده بيوصف دايمًا في علاجات أدوار البرد والأنيميا.
فائدة الزعتر للتخلص من الآفات
نظرًا لأن الزعتر بيتميز برائحته القوية النفاذة خصوصًا في صورته كزيت أو عشب أخضر غير مجفف، كانت الستات زمان بيستخدموه كواحدة من العناصر القادرة على التخلص من الحشرات والآفات. وطبعًا لو عندك حديقة أو حتى زرعتيه على الشباك، مش هيكون كافي. علشان كده، بينصحوا إنك تفركي العشبة بإيدك علشان تقدري تحرري رائحته أكتر وتمنعي دخول الحشرات للبيت. ولو عايزة تحصلي على نتيجة أفضل، حطي دايمًا مع الزعتر لافندر، لأن ريحتهم العطرية النفاذة قادرة على إبعاد الحشرات أو أي شكل من الآفات اللي مش بنحب نشوفها في بيوتنا.
الزعتر لتعديل الحالة المزاجية
زيت الزعتر بيتميز باحتوائه على مادة الكارفاكرول carvacrol اللي هي في حد ذاتها بتتصف كواحدة من الروائح القادرة على التأثير على كيمياء المخ بشكل إيجابي وبالتالي تحسين الحالة المزاجية. جربي تحطيه في فواحة البيت أو حتى تجيبي بخور برائحة الزعتر وشوفي بنفسك الفرق.
أضرار الزعتر
وجد المختصون إن الاستخدام المعتدل للزعتر يعتبر آمن، لكن في نفس الوقت أطلقوا بعض التحذيرات زي إن الزعتر بيزوّد في العموم من سيولة الدم. علشان كده، لو كنتي مقبلة على عملية جراحية يفضل توقفي شرب الزعتر. ولو كنتي بتعاني من أمراض الثدي أو أي أمراض بتتأثر بزيادة الأستروجين بينصح برضه بالتخفيف من تناول الزعتر.
عمومًا الزعتر من الأعشاب اللطيف جدًا تواجدها في البيت. خليه موجود دايمًا في تلاجتك. ممكن تشتريه أخضر طازة من أي هايبر ماركت وحاليًا ممكن تلاقيه عند بياعين الخضار. شيليه دايمًا في الفريز، صحيح لونه بيغمق شوية، لكن الريحة القوية اللي فيه بتفضل موجودة. أنا بحب أستخدمه جدًا في تتبيل اللحوم الحمراء لما أحب أشويها، قولي لي بتستخدمي الزعتر في إيه؟
التعليق باستخدام حساب فيس بوك