محتويات المقال
غير الانبساط والدلع والتأكيد على الحب اللي بيحصل لنا في كل مرة بنمارس فيها العلاقة الحميمة، فيه كمان فوائد لممارسة العلاقة الزوجية مش كتير مننا يعرفوها. طبعًا الطبيعي إن مش طول الوقت هيكون ليكي مزاج تمارسي العلاقة الحميمة، وبننصحك ما تضغطيش على نفسك في الموضوع ده لأن الهدف من ممارسة الجنس أصلًا هي المتعة المشتركة. في المقال ده، هنقول لك فوائد العلاقة الحميمة للمرأة اللي ممكن تفتح نفسك شوية.
أولًا: المناعة
د. إيفون فولبرايت خبيرة الصحة الجنسية كتبت في WebMD إن ممارسة العلاقة الحميمة بانتظام بتقوي المناعة وبتقلل الأمراض. وده لأن مقاومة الجسم ضد الجراثيم والفيروسات بيكون أعلى. ده أثبتته دراسة في جامعة بنسلفينيا قالت إن اللي بيمارسوا الجنس مرة أو اتنين أسبوعيًا كان عندهم أجسام مضادة أكتر من غيرهم. لكن عشان تستفيدي فعلًا من الفائدة دي، لازم تكوني بتاكلي كويس وبتتريضي وبتنامي كويس.
ثانيًا: تحكمك في المثانة
لأن عضلات الحوض وعضلات المثانة بيحصل لهم تمرين في عملية الجماع، فتحكمك في المثانة بيكون أحسن، خاصةً لو بتعاني من أعراض وسع المهبل زي تسرب البول أو غيرها. كمان، الوصول لرعشة الجماع (الأورجازم) بتسبب انقباضات في المهبل بتخلي عضلاته تتشد أكتر من الأول.
ثالثًا: ضغط الدم
لو بتعاني من ضغط الدم المرتفع، فالدراسات أثبتت إن ممارسة العلاقة الحميمة بتقلل ضغط الدم، على عهدة د. جوزيف بينزون.
رابعًا: صحة القلب
د. جوزيف بينزون بيقول إن ممارسة العلاقة الحميمة بتحسن ضربات القلب وبتعدل مستويات الإستروجين والتستسيرون بحيث يفضلوا متوازنين وده بيقلل خطورة الإصابة بأمراض القلب.
خامسًا: تخفيف الأوجاع
ممارسة العلاقة الحميمة والوصول لرعشة الجماع (الأورجازم) بديل قوي للمسكنات. د باري كوميساروك الأستاذ في جامعة نيو جيرسي بيقول إن الأورجازم بيمنع الألم لأنه بيفرز هرمون قادر إنه يعلي مقاومة الجسم للألم. كمان د. باري بيقول إن تحفيز المهبل حتى لو ما وصلتيش للأورجازم بيمنع وجع الضهر والرجلين وبيقلل تقلصات البطن وساعات حتى بيساعد على التخلص من الصداع.
غير كل الفوايد دي، فيه كمان فايدة اعتبريها بونس، د. شيني آمباردار الطبيبة النفسية في ويست هووليود بتقول إن الأورجازم بيفرز هرمون برولاكتين المؤول عن الإحساس بالاسترخاء والنعاس.
نتمنى نكون أفدناكي بالموضوع، ونتمنى لك حياة جنسية سعيدة وصحية.
التعليق باستخدام حساب فيس بوك