محتويات المقال
أي حد بيعاني من ضغط دم مرتفع، لازم يسمع جملة “اشرب كركديه”، والحقيقة إن مشروب الكركديه من الأعشاب المفيدة جدًا للصحة، بس زي ما احنا عارفين إن الأعشاب زي الأدوية، ما ينفعش ناخد منها كميات كبيرة، ولا ينفع ناخدها بدون استشارة طبيب، وخصوصًا لو الشخص مصاب بأمراض معينة، أو سيدة حامل. وفي المقال ده، هنقول لك على فوائد الكركديه البارد والساخن، لمرضى ضغط الدم، وهل ينفع تناول الكركديه في الحمل ولا لا.
-
فوائد الكركديه الساخن والبارد
فيه معلومة مغلوطة إن الكركديه البارد بيفرق عن الساخن أو إن واحد فيهم بيعلي الضغط وواحد بيوطي الضغط. دي خرافة والحقيقة إن الكركديه في كل أحواله له نفس التأثير على الضغط.
-
علاج ضغط الدم المرتفع
من أهم فوائد الكركديه البارد والساخن، إنه بيشتغل على خفض مستويات ضغط الدم المرتفعة، وده في دراسة علمية اتنشرت سنة 2010 في مجلة (Journal of Nutrition)، وصلوا فيها إن شرب الكركديه بيشتغل على خفض مستويات الدم المرتفع، عند الأشخاص المعرضين للإصابة بارتفاع الضغط، أو اللي بيعانوا بالفعل من ارتفاع طفيف في مستويات ضغط الدم.
-
حالات ممنوع فيها شرب الكركديه
- مرض الضغط له نوعين، مرتفع ومنخفض، فلما حد يقول علاج الضغط هو شرب الكركديه، فده للضغط المرتفع بس، أما الضغط المنخفض ففيه خطورة كبيرة جدًا على صاحبه من شرب الكركديه، لإنه ممكن يسبب إغماء ودوخة، وتوصل لا قدر الله لتلف القلب والدماغ، بسبب انخفاض ضفط الدم بشكل حاد.
- مرضى ضغط الدم المرتفع، لو بياخدوا أدوية مدرة للبول، فده بيتعارض تمامًا مع شرب الكركديه، وممكن يتسبب في مشاكل صحية كتيرة برضه.
-
الكركديه والحمل
بعض الحوامل بيصابوا بارتفاع الضغط في الحمل، حتى لو في حياتهم العادية ما عانوش من اضطراب ضغط الدم، فبيفكروا إن الكركديه ممكن يفيدهم، لكن الحقيقة إن الحامل ما ينفعش تشرب كركديه، ليه؟
- مشروب الكركديه عامل زي القرفة، بيساعد على نزول الدورة الشهرية، وده ممكن يسبب إجهاض للحامل وخصوصًا لو في الشهور الأولى.
- لو الحامل ضغطها مش مرتفع وشربت كركديه، ممكن يعملها انخفاض خطير في ضغط الدم، لإن في بعض الحوامل ضغطهم بينخفض في الحمل ومش بيكونوا عارفين.
- الكركديه بيحتوي على الأستروجين النباتي (Phytoestrogen) اللي بيتشابه مع هرمون الأستروجين البشري، بالتالي فإن تناوله بالتزامن مع حبوب منع الحمل، ممكن يخليها مش فعّالة.
علشان كده سواء كنتي حامل، أو مريضة ضغط دم، لازم تستشيري طبيبك المتابع لحالتك، قبل ما تشربي الكركديه أو أي أعشاب تانية، صحيح إنه له فوايد كتير، بس بدون استشارة الطبيب ممكن يتحول لكارثة.
مع تمنايتنا ليكي بالصحة والعافية
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر:
التعليق باستخدام حساب فيس بوك