محتويات المقال
الكركم واحدة من أقدم النباتات المستخدمة على مستوى العلاج، ولحد النهارده، فوائد الكركم كل يوم يبان لها حاجة جديدة. علشان كده، اسمه الذهب البرتقالي، بس لازم تعرفي إن فيه فرق بين الكركم والكاري. الكركم نبات لوحده كده شبه الجنزبيل جدًا، لكنه أرفع ولونه الداخلي برتقالي، والكاري مجموعة توابل للطهي.
الكركم بيتواجد في الأسواق في صورته الطازجة، لكن الأكثر تداول في الاستخدام هو المجفف المطحون، بس مهم جدًا تجيبيه من مصدر موثوق، واللي هيكون غالبًا ماركة توابل انتي بتثقي فيها، طالما مش قادرة توفريه بشكله الطازج أو المجفف وتطحنيه انتي بنفسك، يبقى تجيبه مطحون من مكان كويس وأنا بانصح بلاش العطارين لإن غالبًا بيكون مغشوش، هاتيه معلب.
مافيش حتة في الجسم مش ممكن تستفيد من الكركم، لكن فيه خطأ شائع في استخدامه التجميلي للبشرة لما بيتعمل ماسك عليها، لإن غالبًا اللي بيحصل إنك بعد ما تشيلي الماسك بتلاقي وشك بقى لون الكبسة السعودي، وغالبًا في البيت من باب مراعاة شعورك، هيسموكي القطة المشمشية، وده شيء يا حبذا نتجنبه إننا نعرف استخدامه الصح بيكون ازاي، بيكون بكميات قليلة جدًا وبيتحط على البشرة لوقت قصير ومخلوط مع ألوفيرا أو عسل أو زبادي.
دلوقتي عالجنا أكبر أخطائنا في علاقتنا بالكركم، فتعالي نعرف فوائد الصحية العجيبة فعلًا:
-
مضاد للالتهاب:
من أقوى استخدامات الكركم هو قدرته على مقاومة الالتهابات وخصوصًا المزمنة اللي بدورها بتشكل خطر كبير على الصحة قد يصل للإصابة بأمراض زي السرطان.
اعرفي من هنا فوائد زيت الزيتون.
-
قنبلة مضادات أكسدة:
الكركمين، المركب الأساسي للكركم، يعتبر واحد من أقوى مضادات الأكسدة واللي بدورها بتقوم محاربة الجذور الحرة، اللي بتضر بمركبات الحمض النووي للخلايا وبتسبب مختلف أنواع الأمراض.
-
بيعدل المزاج:
لو انتى من النوع اللي بيعاني من الاكتئاب سواءً بدرجة بسيطة أو حادة، أو بتواجهي صعوبة في التحكم في حالتك المزاجية وبتتقلب بين السعادة والحزن بشكل كبير وسريع، فالأبحاث وجدت إن الانتظام في تناول الكركم أو مركب الكركمين مع العلاجات الموصوفة في حالة وجودها كان ليها دور فعال حقيقي في تعديل الحالة المزاجية، وتقليل نوبات تبدل الحالة المزاجية الحاد.
هنا ممكن تشوفي فوائد أكل الثوم على الريق
-
فوائد الكركم – بيضبط سكر الدم
في حالة الإصابة بمرض سكر الدم سواءً من الدرجة الأولى أو الثانية، فالكركم أثبت كفاءة عالية جدًا في التحكم في ضخ الأنسولين في الدم، وبالتالي الحفاظ على مستواه الطبيعي في الدم. وعلى فكرة، الميزة دي بتساعد على التخسيس لإن طول ما معدل الأنسولين في الدم منخفض بمعنى في معدله الطبيعي استهلاكك للأكل بيكون أقل، أفضل طريقة للاستفادة منه سواءً لمرضى السكر أو التخسيس هو شربه مع الجنزبيل مع بعض وتحليه بمعلقة عسل صغيرة.
-
بيقوّي جهاز المناعة:
في أيامنا دي كلنا بندور على أفضل طرق رفع المناعة خصوصًا الطبيعية، علشان نعزز من قدرة أجسامنا على مقاومة البكتيريا والفيروسات، وده اللي بيعمله الكركم بالظبط. علشان كده، لو شربتي شوربة كريمة بالكركم، أو أضفتيه على شوربة العدس، هتكوني بتشربي صيدلية بحالها، بس ما تنسيش تضيفي شوية فلفل أسود لإنه بيساعد على امتصاص مادة الكركمين أفضل.
-
مهديء للجهاز الهضمي:
من مميزات الكركم إن له قدرة على تخفيف الانتفاخات والغازات في البطن، بس طبعًا لما بيتم استخدامه بشكل صحيح، احنا أحيانًا بنقع في غلط إن علشان نستفيد من شيء، لازم نكتر منه، يعني مثلًا علشان تستفيدي منه للبطن انتي هتحتاجي لربع معلقة ويمكن أقل شوية في حالة إنه مجفف مطحون علشان تحصلي على النتيجة المرجوة، لكن لو حطيتي معلقة صغيرة بحالها فانتي هتعيشي مع حموضة عالمية ومزعجة جدًا. علشان كده، استخدميه صح.
-
فوائد الكركم – تقوية الذاكرة:
حاسة إنك نسيتي الماضي بجد بدون قصد لسماع نصيحة عمرو دياب “بلاش نتكلم في الماضي”، وإن أولادك بجانب من الخداع معتمدين إن ذاكرتك مسافرة جنوب أفريقيا، يبقى هو ده وقت الكركم اللي هيخليكي تفتكري دبة النملة، ده لإن قدرة الكركم على محاربة التهابات الخلايا العصبية مع قدرته المضادة للتأكسد هتساعد على الوصول الأكسجين بشكل أفضل للمخ وبالتالي هتفتكري كل شاردة وواردة.
-
بينيمك أحسن:
لو حسيتي إن عندك بعض اضطرابات النوم، ومحتاجة تحصلي على 7 أو 8 ساعات نوم متواصل (ازاي ما اعرفش) فانتي محتاجة تشربي كركم بالليل مع معلقة عسل، الحلو في المشروب ده إنه مهدئ جدًا وبيساعد على الاسترخاء اللي جسمك محتاجه علشان تعرفي تدخلي في حالة نوم مستقرة.
-
علاج للصداع:
لو كنتي من اللي بيعانوا من الصداع النصفي، فحاولي تتناولي المكملات الغذائية المكونة من الكركم، وده بسبب إن أغلب أسباب الصداع النصفي بتيجي من التهاب الأوعية الدموية للدماغ فقدرة الكركم على مقاومة الالتهاب وخفض ضغط الدم في نفس الوقت هيكون لها تأثير إيجابي على التخلص من الصداع.
-
مقاوم لالتهاب المفاصل:
يمكن من أكبر الشكاوي للأمهات خصوصًا بعد مجهود الحمل والولادة وأوقات زيادة الوزن هي شكاوي آلام المفاصل، وحتى مع تقدم السن، المشكلة دي بتكبر وبتتفاقم. علشان كده، دايمًا بينصح باستخدام الكركم سواءً في النظام الغذائي أو تناوله كمكمل غذائي من قبل المختصين لقدرته على مقاومة الالتهابات المزمنة وبالتالي المساعدة على التخلص منها.
أظن دلوقتي لازم تجيبي كركم وتنظري ليه نظرة المحب والصديق الداعم لصحتك انتي وأفراد أسرتك، زي ما قلت لك لو مش هتقدري توفريه بشكله الطازج أو المجفف الكامل، اشتريه مطحون من ماركة انتي بتثقي في منتجاتها.
التعليق باستخدام حساب فيس بوك