الموز يعتبر واحد من أكتر الفواكه شعبية في أغلب دول العالم. ولما جيت أكتب لك المقال ده، اكتشفت قد إيه هو له فوائد كانت غايبة عني جدًا، وقلت لازم أقول لك على أهم فوائد الموز الصحية وكمان استخدامات وفوائد قشر الموز. فتعالي نعرف إيه هي الفوائد دي.
أهم فوائد الموز
- عناصر الموز الغذائية
من الحاجات الجميلة في الموز إنه غني بالعناصر الغذائية اللي لا غنى عنها لكل شخص كبير أو صغير، حتى الحوامل وبعض أصحاب الأمراض المزمنة. وده بسبب لاحتوائه على البوتاسيوم. الموز يعتبر مصدر رئيسي لفيتامين B6، فيتامين C، المغنسيوم، والكاربوهيدرات، والألياف، وتقريبًا خالي من الدهون. وكل عنصر من دول له فوائد كبيرة ومهمة هاقول لك إيه هي، وهتخليكي تستهلكي على الأقل ثمرة موز في اليوم.
- فوائد الموز للحامل ” فيتامين B6 “
تخيلي إن موزة واحدة تقدر توفر لك ربع احتياجك اليومي من الفيتامين ده اللي له أهمية كبيرة جدًا في إنتاج خلايا الدم الحمراء، ورفع قدرة الجسم على حرق الكربوهيدرات وتحويلها لطاقة بدل ما تتخزن في الجسم في صورة دهون، وتنظيف الكبد والكلى من السموم والمواد الكيميائية. وبيحافظ جدًا على قوة الجهاز العصبي. ده غير فايدته للحوامل لأنه بيعتبر عنصر أساسي في عملية نمو الجنين.
عشان تعرفي فوائد زيت جوز الهند، اعرفي من هنا.
- فوائد الموز للبشرة ” فيتامين C”
ثمرة موز واحد تقدر توفر لك 10% من احتياجك للفيتامين ده، واللي أهميته لا حصر لها، بس هو في الأساس بيستخدم لدعم وتقوية الجهاز المناعي، وحماية خلايا الجسم والأنسجة من التلف، وبيساعد على امتصاص الحديد في الجسم، وبيساعد على إنتاج الكولاجين وهو البروتين المسؤول عن قوة شد البشرة ومرونة الأربطة وكثافة الغضاريف.
- المغنسيوم والبوتاسيوم
تكوينة الموز في ارتفاع البوتاسيوم وانخفاض المغنسيوم تعتبر الأفضل على الإطلاق لأصحاب ضغط الدم المرتفع، لأن لها قدرة عالية على خفضه والحفاظ عليه في معدلاته الطبيعية.
- الموز والنوم
كانت دايمًا من النصائح المتداولة عن الموز هو تناول ثمرة قبل النوم، وده بسبب إنها غنية بالبوتاسيوم القادر على تهدئة الأعصاب قبل النوم، وبالتالي مقاومة الأرق وتهدئة الأعصاب، وبالتالي الحصول على نوم هاديء وسريع.
- فوائد الموز للتخسيس والرجيم:
الموز من الفواكه عديمة الدهون، وغني بنوع من أنواع النشا القادر على رفع معدلات حرق النشا في الجسم ومنعه من التراكم في الجسم في شكل دهون. علشان كده، هتلاقي دايمًا إن متخصصين التغذية والرياضيين دايمًا بينصحوا بتناول موزة قبل بدأ التمرين لقدرتها على توفير الطاقة المطلوبة لبداية التمرين.
دلوقتي خلصنا بعض من فوائد ثمرة الموزة، تعالي بقى نجيب فوائد قشرة الموز اللي بنتخلى عنها بكل سهولة وهي مليانة فوائد غايبة عن كتير مننا.
فوائد قشر الموز
- فوائد قشر الموز للبشرة:أغلب خبراء التجميل بينصحوا بالطرق التالية للاستفادة من قشر الموز:1. وضع قطع من قشر الموز على العين المنتفخة بيقلل من أثر الانتفاخ.
2. لو كنتي صاحبة بشرة جافة، استخدام قشر الموز قبل غسل وجهك بيساعد على الترطيب.
3. لتخفيف أثر الصدفة والأكزيما، وضع بعض قشور الموز على البشرة بيساعد على تخفيف أثرهم على البشرة.
- فوائد قشر الموز للزرع:
لو كنتي من النوع المحب للزراعة المنزلية، فاستخدام قشر الموز بيعتبر واحد من أفضل أنواع السماد العضوى عن طريق تقطيعه لقطع صغيرة ووضعها على سطح تربة النبات. ده بيساعد على تزويد التربة بعناصر غذائية مهمة، وفي نفس الوقت، بتحمي النبات من بعض أنواع الحشرات.
- فوائد قشر الموز لتبييض الأسنان:
في دراسة موسعة تمت في 2015، وجد العلماء إن قشر الموز له قدرة على مقاومة نمو أنواع من البكتيريا تنمو داخل الفم ولها تأثير سلبي على اللثة. وبتنصح الدراسة إن فرك الأسنان بالجزء الداخلي من قشرة الموزة مرتين في الأسبوع بيساعد على مقاومة هذا النوع من البكتيريا. وفي نفس الوقت، له تأثير تبييض على أسنانك.
أعتقد دلوقتي تقدري تاكلي الموز بشكل يومي حرصًا منك على الفوائد العظيمة دي! وهو حقيقي من الأكلات القليلة المفيدة جدًا ولذيذة جدًا في نفس الوقت. نقطة أخيرة: لو بتتضايقي من الموز بسبب الحشرات الطائرة الصغيرة المزعجة اللي بتتجمع على الموز لما ينضج بسرعة، فعندي ليكي وصفة حلوة وسهلة: نص كوباية مياه عليها تلات معالق سكر وسائل غسيل أطباق. اخلطيهم مع بعض وحطيهم على رخامة المطبخ. هتلاقي نفسك تخلصتي منهم في السائل ده بشكل طبيعي ومن غير أي مبيد حشري مضر.
التعليق باستخدام حساب فيس بوك