بذور الشيا جاية لنا من قارة أمريكا الجنوبية، وأكتر ظهور ليها أو يمكن سبب إننا سمعنا عنها كان استخدمها في الدايت وخصوصًا الكيتو دايت. هي كمان موصوفة للناس اللي بتعاني من حساسية الجلوتين أو حساسية الدقيق. كل ده غير إن لها فوائد صحية كتير أهمها إنها مليانة ألياف قابلة للذوبان في المياه وده أهم نوع ألياف بيحتاجه الجسم. وهاشرح لك بالتفصيل معنى النقطة دي. فتعالي معايا نشوف إيه هي فايدة بذور الشيا؟
فوائد بذور الشيا
- قيمة غذائية عالية بسعرات منخفضة
دي من أهم مميزات بذور الشيا، قدرته على تحقيق المعادلة دي، واللي بتعتبر من أهم مشاكلنا في اتباع نظام غذائي متوازن. 28 جرام من حبوب الشيا بيحتوي على 11 جرام من الألياف غير القابلة للذوبان في المياه و4 جرام بيوتين، ودي نسبة عالية جدًا من مصدر نباتي، و9 جرام دهون 5 منهم عبارة عن أوميجا 3. يعني حقيقي مش مبالغة لما نقول عليها super food.
- مليانة مضادات للأكسدة
كلنا عارفين فايدة مضادات الأكسدة، ودي من النقاط اللي بتتألق فيها أهمية بذور الشيا. فالانتظام في تناولها بيساعد على مقاومة الجذور الحرة المسؤولة عن الشيخوخة وأمراضها زي السرطان مثلًا.
- غنية بالألياف
زي ما قلت لك إن 28 جرام من بذور الشيا فيه 12 جرام كربوهيدرات 11 منهم ألياف غير قابلة للذوبان. وهي مفيدة جدًا لصحة الجسم خصوصًا لو بتتبعي نظام غذائي منخفض الكربوهيدرات، حيث إنها عندها قدرة توفر لك الشعور بالشبع، وفي نفس الوقت مفيدة جدًا لصحة القولون، وتعتبر محفز ممتاز لنمو البكتيريا المفيدة في الأمعاء. بجانب إن الألياف دي بتمنع من ارتفاع نسبة السكر في الدم خصوصًا لأصحاب مرض السكر من النوع التاني.
- غني بالبروتين
بذور الشيا بتتميز بإنها غنية بالبروتين، حوالي 14% من وزنها عبارة عن بروتين، ودي نسبة عالية جدًا من مصدر نباتي. وبذور الشيا بتتميز بوجود أحماض أمينية، وهي دي اللي بتساعد الجسم على إنه يستفيد من البروتين اللي في الشيا. وده بيخلي بذور الشيا من الاختيارات الممتازة للأشخاص اللي بيسعوا لخفض أوزانهم.
- بتساعد على خفض الوزن
بذور الشيا بتتميز بمحتوى عالي من الألياف والبروتين، ودول من أهم عناصر المساعدة على إخفاض الوزن لإنهم بيساعدوا على زيادة عدد ساعات الشبع وتقليل كميات الأكل المستهلكة مع سعرات حرارية منخفضة، وده بيفيد اللي ماشيين على دايت أو عندهم سكر من النوع التاني.
- غنية بالأوميجا 3
بذور الشيا زي بذور الكتان محتواها من الأوميجا 3 عالي. حتى إن الشيا بتتفوق على سمك السلمون في محتواها من العنصر ده، علشان كده بينصح بإضافتها على الزبادي والسلطة لزيادة قيمتها الغذائية.
دي شوية من فوائد بذور الشيا الممتازة، ونقدر نستغل إنها وصلت الأسواق المصرية وأصبحت متوفرة في كل هايبر ماركت وكمان عند العطارين. جربيها وهتلاقي إن طعمها حلو، ضيفيها على الزبادي أو السلطة أو حتى على أي سموذي مفضل ليكي، وهتبقي حصلتي على وجبة متكاملة. ده غير إنك هتلاقي وصفات كتير جدًا على النت. قولي لي بتحبي تدخليه في أكل إزاي.
المصادر
www.healthline.com
www.medicalnewstoday.com
www.webmd.com
التعليق باستخدام حساب فيس بوك