محتويات المقال
تعرفي إيه عن خل التفاح؟
الأيام دي من المنتجات اللي عليها كلام بين الناس وبين المهتمين بصحتهم هو خل التفاح. سواء في التخسيس، أو كعلاج مساعد لمرضى السكر من النوع التاني، أو حتى أصحاب الضغط العالي ومرضى القلب، وأوقات السرطان. وعلى الرغم انتشار الكلام عن مدى الفوائد اللي بيحصل عليها المستخدم، إلا إنه فعلًا وعلى حسب رأي العلماء مافيش دراسة رصينة مطولة وعلى شريحة كبيرة بتحكم فعلًا على مدى فوائد وأضرار خل التفاح. وإنه كله بينحصر في إطار التجارب الشخصية وتكهنات العلماء. فتعالي معايا نشوف إيه هي الفوائد وإيه الأضرار اللي ممكن تحصل في وقت استخدام خل التفاح.
فوائد خل التفاح
مبدئيًا يفضل إنك لما تقرري تستخدمي خل التفاح في نظامك الغذائي أو حتى أسلوب حياتك عمومًا، إنك تختاريه من النوع العضوي، لإن الفوائد الموجودة فيه بتكون أفضل، والمركبات الكيميائية فيه أكثر تركيزًا وقدرة على الفائدة. اشترينا خلاص الخل التفاح العضوي؟ تعالي أقول لك على استخداماته المفيدة.
فوائد خل التفاح للتخسيس (حد يرمي له العوامة):
في موقع healthline بيتكلموا على إن تناول خل التفاح قبل الأكل له ميزة إنه بيدي إحساس بالشبع السريع، وده بيساعد على تناول كمية أكل أقل وبالتالي عدد سعرات حرارية أقل، وخصوصًا لو هتتناولي وجبة عالية الكربوهيدرات. وإن أكتر تركيز لفقد الدهون في حالة استخدام خل التفاح للتخسيس هي إزالة دهون البطن. بس طبعًا نظرًا إن مفيش أحلام وردية، ففكرة إن كوباية مياه عليها معلقة أو إتنين خل تفاح هتكون كافية، فالحقيقة ده مش بيحصل. حقيقي خل التفاح جوه بطنك هيحتاج حد يرمي له عوامة تنقذه لو كان نظامك الغذائي مش صحي لأنه هيوقف حائرًا يعمل إيه ولا إيه.
خل التفاح مطهر طبيعي:
تاني فايدة عظيمة لخل التفاح هو إنه قاتل للبكتيريا. فهو من زمان بيستخدم بشكل خارجي على سطح الجلد كواحد من المطهرات القوية والقادرة على قتل البكتيريا اللي بتسبب مثلًا التهاب للأذن أو حتى دمامل على البشرة بس بشكل مخفف، وبيستخدم كمان كمادة حافظة.
خل التفاح خافض لمستوى السكر وضغط الدم:
لو عندك حد عنده مرض السكرى أو ضغط الدم، انصحيه إنه يدخّل خل التفاح في نظامه اليومي وهتكون نصيحة ممتازة. لأن الدراسات أثبتت إن خل التفاح له ميزة مع مرضى السكر من النوع التاني إنه بيساعد خلايا الجسم حساسيتها ناحية الأنسلوين تزيد ومقاومتها تقل. غير إن تناول معلقتين من خل التفاح المخفف في كوب مياه قبل النوم بيساعد على انخفاض معدل سكر الدم في الصباح بنسبة تصل لـ4%.
تحسين وظائف القلب:
مع أسلوب الحياة المعاصر، ومع حبنا للأكل الجاهز والـ fast food فخطر ارتفاع معدلات الكوليسترول في الدم وأثره السلبي جدًا على القلب والشرايين. العلماء والمتخصصين لاقوا إن الانتظام في استخدام خل التفاح كل يوم سواء عن طريق الشرب مخفف في مياه أو حتى في تتبيل الأكل والسلطات كان له نتايج واعدة جدًا فيما يخص تخفيض الكوليسترول في الدم. علشان كده بينصح بيه دايمًا خصوصًا لو أسلوب حياتك بيضطرك تستهلكي الأنواع دي من الأغذية حفاظًا على قلبك.
تحسين صحة الجلد:
من استخدامي الشخصي، لاقيت إن خل التفاح من الحاجات اللي فعلًا بتفرق في نتيجتها مع الانتظام في استخدامها خصوصًا لو عندك إكزيما، لسبب بسيط: خل التفاح عند القدرة على استعادة توازن البشرة خصوصًا إن استخدام صابون اليد العادي والمطهرات وحتى سائل غسيل الأطباق بيكون لها أثر سلبي جدًا على جلدك. علشان كده خل التفاح بيعمل على حماية جلدك وحتى منع أي إصابة بكتيرية بسبب جفاف الجلد لأي سبب.
عمومًا في حالة استخدامك لأي وصفة طبيعية، لازم تكوني حذرة من الإفراط في الاستخدام، لأن رد فعل كل جسم مختلف عن التاني، واللي ممكن يكون مفيد جدًا ليكي ممكن يكون له أثر سلبي على غيرك. ولو قررتي تستخدمي أي وصفة وكنتي بتتناولي عقاقير طبية، استشيري طبيبك. ولو حسيتي خلال استخدام خل التفاح بأي أثر جانبي سلبي، توقفي فورًا واستشيري طبيبك. فعلى قد فوائد خل التفاح وإنه بيستخدم من زمان جدًا، خليكي حريصة على صحتك دايمًا.
المصادر
www.healthline.com
www.webmd.com
www.verywellhealth.com
www.medicalnewstoday.com
التعليق باستخدام حساب فيس بوك