زيت السمسم من الزيوت اللي نقدر نقول عليها إنه امن زيوت العالم القديم، بمعنى إنه بيستخدم من ألاف السنين بس على الرغم من كدة مش واخد نفس مكانة زيت الزيتون مثلا على الرغم من فوائده العظيمة.
زيت السمسم من الزيوت اللي ليها فوائد على كافة أنحاء الجسم، سواء البشرة أو الشعر وحتى تنواله كجزء في نظامك الغذائي اليومي. بصراحة أنا من الناس المحبة جدا جدا لزيت السمسم، وبستخدمه بشكل موضوعي وكمان في الأكل، الفكرة إنه مش بتلاقيه بالساهل بيتباع غير في الماركات المشهورة ببيع الزيوت العطرية والعشبية، بس حقيقي أنا بحب أشتريه من المحلات المخصصة لعمل الطحينة والعسل الأسود، كان زمان أسمها السرجة، ومازالت موجودة في بعض المناطق الشعبية، زيت السمسم بيخرج من السمسم بعد طحنه أو عصره لتكوين الطحينة، واللي على فكرة الطحينة في حد ذاتها فوائدها رائعة هنتكلم فيها مع بعض في مقال تاني، خلينا نتكلم في فوائد زيت السمسم الصحية بشكل مفصل على كل جزء من أجزاء الجسم.
فوائد زيت السمسم الصحية
فوائد زيت السمسم للجسم
من أفضل طرق الحصول على فوائد زيت السمسم للجسم بتيجي من خلال تناوله على الريق، مش معنى لو استخدمتيه بشكل تاني مش هتحصلي على فوائد لا بالعكس، بس الفايدة القصوى هتكون من خلال تناوله على الريق، وهقولك إيه اللي هيحصل لما تلتزمي بيه
تعزيز صحة القلب
من مميزات زيت السمسم احتوائه على الدهون الصحية واللي بدورها بتعمل على تعزيز صحة القلب، وده بسبب إن 82% من الزيت بيحتوي أصلا على الدهون الحمضية الغير مشبعة، وخصوصاالأوميجا 3 و6، واللي الدكاترة ديما بينصحوا بتناول الأحماض دي لأن ليها قدرة على التقليل من خطر الإصابة بأمراض القلب وبالتالي الحفاظ على صحته.
حتى إن فيه دراسة استهدفت 48 مشترك اكتشفت أن اللي دخلوا زيت السمسم بكمية 4 معالق كبيرة يوميا ده أدي إلى إنخفاض مستوى الكوليسترول السيء والدهون الثلاثية مقارنة المجموعة اللي تناولت زيت الزيتون.
بينظم مستوى السكر في الدم
تناول زيت السمسم على الريق وفي أي وقت كمان بيساعد على تنظيم مستويات السكر في الدم واللي يعتبر هدف أساسي لأصحاب مرضى السكري ، واللي يميز زيت السمسم كمان إن تأثيره على تنظيم مستوايات السكر في الدم تأثير طويل المدى يعني مش مرتبط بس بفترة تناوله، إنما بيستمر التأثير لمدة طويلة.
بيقلل من أعراض الالتهاب الروماتويد
الأشخاص اللي بيعانوا من الإصابة بإلتهاب الروماتيد بيواجهوا أعراض مزعجة زي التورم والإحساس بالألم ، علشان كدة شرب زيت السمسم على الريق بيساعد في علاج الأعراض دي، والسبب في ده بيرجع إلى القيم الغذائية اللي بيحتويها وأهمها النحاس.
بيساعد في تحسين حركة الأمعاء
من أهم فوائد شرب زيت السمسم على الريق هي تحسين حركة الأمعاء وبالتالي تجنب الإمساك، ده لأن تناول زيت السمسم بيساعد في ترطيب الأمعاء وتسهيل حركتها وبالتالي التقليل من مشكلة الإمساك، وعلشان تقدري تحصلي على الفايدة دي من لأفضل تناول ملعقة من زيت السمسم الصبح.
غني بمضادات الأكسدة
أهم ميزة بتميز زيت السمسم أنه غني بمضادات الأكسدة خصوصا اللي أسمها السمسمول (Sesamol) والسيسامينول (Sesaminol)، واللي بدورها بتعمل على تحييد الجذور الحرة الضارة في الجسم، واللي تعتبر من أهم الأسباب الإصابة بالأمراض المزمنة والالتهابات.
تقدري تقولي إن دي أهم الفوائد اللي زيت السمسم بيساعد الجسم على الحصول عليها، بس أخر نقطة فيها إن السمسم غني بالكالسيوم، وبالتالي يعتبر واحد من أهم مصادر الحصول عليه بشكل طبيعي، فخلي زيت السمسم جزء أساسي من نظامك الغذائي، استخدميه في الأكل وفي السلطة وحتى مع الجبنة البيضاء هتلاقي فعلا إن طعمه حلو ومميز.
فوائد زيت السمسم للبشرة:
- زيت السمسم بيتمز بقدرته على منع الالتهابات البكتيرية، وبالتالي علاج التهابات الجلد، بجانب سرعة الشفاء من جروح الجلد، ده غير إنه بيستخدم في علاج بعض الأمراض الجلدية زي الصدفية والأكزيما.
- بيحتوي زيت السمسم على خصائص اللزوجة العالية واللي بتقدر على إصلاح الخلايا التالفة، زعلشان كدة فهو من أفضل الزيوت الطبيعية المناسبة للتدليك، لأنه بيعمل على تعزيز الدورة الدموية، ويعتبر مرطب طبيعي للبشرة، وبيساعد على تطهير البشرة.
- له القدرة حقيقية على الإبطاء من علامات الشيخوخة المبكرة في الجلد، وتجديد البشرة وإعادة حيويتها، وده بيرجع لإحتواء زيت السمسم على المواد المضادة للأكسدة، والمفيدة في الحماية من التجاعيد، وتقدري تسخدمي مزيج مكون من زيت اللافندر وزيت السمسم مع بعض على البشرة، مع التدليك في حركات دائرية،وده علشان تنشطي الدورة الدموية وتحاربي أي إلتهابات.
فوائد زيت السمسم للشعر:
بيحارب تساقط الشعر المبكر
أسباب تساقط الشعر المبكر عديدة واللي أوقات بيكون سببهاهي الشيخوخة المبكرة، والمرض، والإجهاد، وحتى أوقات الضغط النفسي القوي. وعموما أغلب الاسباب بتدور حول الأعصاب اللي بتأثر بشكل مباشر على الشعر بجانب طبعا تأثيرها على جودة الدورة الدموية الواصلة للشعر وهنا بيجي دور زيت السمسم الفعال، لأنه قادر على تغذية الأعصاب وتحفيزها بجانب تعزيز الدورة الدموية.
يحارب الشيب المبكر
الأحماض الدهنية والفيتامينات ليها قدرة على منع الشيخوخة المبكرة لبصيلات الشعر، وبالتالي الاحتفاظ بالألوان الطبيعية لشعرك.
ويعتقد أن زيت السمسم قد يساهم في تغميق لون الشعر ودي حاجة أنا مجرباها بشكل شخصي، ولكن من المؤكد أن الأحماض الدهنية والفيتامينات بتساهم وبقوة في استعادة صحة الشعر.
له قدرة على تهدئة فروة الرأس
من فوائد زيت السمسم للشعر قدرته على تهدئة فروة الرأس، خصوصًا اللي بتعاني من التلف بسبب الة تجفيف الشعر ( السشوار) أو نتيجة بعض الأمراض.
زيت السمسم بيشتغل على تهدئالحكة اللي بتيجي مع جفاف الجلد والقشرة ، وده لأن زيت السمسم له خصائص تبريد لأنه بيحبس الرطوبة عند جذور الشعيرات. بجانب مساهمة الأحماض الدهنية في زيت السمسم بعملية قتل الفطريات اللي بتنمو على سطح الرأس فتسبب الحكة ومن ثم القشرة.
بيرطب الشعر وبيمنع الجفاف
زيت السمسم بيقوم بتغليف بصيلات الشعر وده بيساعد على الحفاظ عليها من الجفاف بفعل المنتجات الكيميائية بالإضافة طبعا لتأثير ألات التجفيف المختلفة، علشان كدة لو حسيتي إنك بتعاني من الشعر الجاف، قومي بوضع زيت السمسم على شعرك بليل وسيبيه ليتغذى عليه والصبح اغسليه بالشكل الإعتيادي.
بيحمي من الأشعة فوق البنفسجية
زي ما قولنا قبل كدة إن زيت السمسم بيشكل غلاف حول الشعيرات على طولها، الغلاف ده بيحمي الشعر من التلوث والتأثيرات البيئية الضارة وعلى رأسهاأشعة الشمس الحارقة وتحديدًا الأشعة فوق البنفسجية.
يشجع نمو الشعر الصحي
في الواقع إن دي من أهم فوائد زيت السمسم للشعر لان حقيق له دور في تنشيط الدورة الدموية في فروة الرأس، وبيساهم في إعادة بناء بصيلات وجذور الشعر، ويستطيع الزيت التغلغل في فروة الرأس وتشكيل حماية للبصيلات من المواد الكيميائية اللي بتستخدم في تسريح الشعر، عادة بيسخدم زيت السمسم في حمام الزيت الساخن علشان يهيئ ويتيح عملية الترطيب العميقة.
أتمنى أكون وفرت لك المعلومات اللي كنتي محتاجة تعرفيها عن زيت السمسم، وزي ما قولت لك هو من الزيوت المفضلة ليا على المستوى الشخصي واللي بحب يكون في بيتي أكتر من زيت الزيتون، جربيه فترة ومش هتندمي أبدا.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك