محتويات المقال
زيت اللوز الحلو واحد من الزيوت المشهورة جدًا وكمان مشهور فوائد زيت اللوز الحلو على المستوى التجميلي وتأثيره على البشرة والشعر في حالة الانتظام في استخدامه، وده لأسباب هنتكلم فيها مع بعض هنا، لكن بيحصل أوقات حيرة بين اختيار زيت اللوز الحلو ولا زيت اللوز المر. الحقيقة إن الاتنين بييجوا من مصدرين مختلفين عن بعض: زيت اللوز الحلو بييجي من شجر وردها أبيض وثمرة اللوز فيها طويلة شوية، بينما زيت اللوز المر بيجي من شجرة زهورها وردية وثمارها قصيرة مقارنة بشجرة اللوز الحلو.
في العموم زيت اللوز الحلو بيستخدم لأغراض تجميلية أكتر على البشرة والشعر، وزيت اللوز المر بيستخدم لعلاج بعض المشاكل الصحية مع ضرورة التركيز في نقطة إنك لو استخدمتيه، تتأكدي إن مكتوب عليه إنه صالح للأكل لأنه لو مش كده، هيكون سام. فتعالي دلوقتي نشوف مع بعض إيه اللي هيخلينا ننزل دلوقتي نجيب إزازة زيت لوز حلو ونخليها جنبنا.
فوائد زيت اللوز الحلو للبشرة
-
مطهر
يمكن تستغربي من فكرة إن فيه زيت ممكن يكون مطهر، بس الحقيقة دي واحدة من مميزات زيت اللوز الحلو، ده لإن فيه تركيبات مضادة للبكتيريا بجانب إنه بيحتوي على مرطبات عالية جدًا، يعني يعتبر واحد من أفضل الخيارات لإزالة المكياج حتى آثار الماسكرا زي زيت جوز الهند، شيلي بيه المكياج قبل النوم واصحي من غير أي قلق من الإحساس الزيتي الصباحي ده. بالعكس، هتلاقي بشرة نضيفة ومترطبة كويس.
هنا ممكن تشوفي فوائد أكل الثوم علر الريق
-
تخفيف انتفاخ العيون
مين فينا بعد ليلة طويلة من السهر، أو المرور بفترة ضغط، مش بتصحى تلاقي عينيها منتفخة وتحتها هالات سودا وده حقيقي واحدة من المشاهد الصباحية المحبطة جدًا. علشان كده، كانت إزازة زيت اللوز الحلو هي المنقذ من المشهد ده، قبل النوم، ادهني منها على بشرة العين بشكل خفيف وانتظمي على الموضوع ده أسبوعين، هتلاقي المشكلة دي اتحلت بشكل ملحوظ، فنجان القهوة بيصحيكي لكن زيت اللوز بيخلي شكلك فعلًا صاحي.
-
مرطب
من ضمن المشاكل اللي بنواجهها خصوصًا مع أسلوب حياة غير صحي ومرهق في نفس الوقت، هو إجهاد البشرة وفقدها لرطوبتها الطبيعية وخصوصًا مع تقدم السن، كثافة الكولاجين اللي بيحافظ على نضارة البشرة بتقل وبالتالي تبدأ التجاعيد والبقع في الظهور على البشرة، وده بيدي شكلنا سن أكبر من سننا الحقيقي. علشان كده، استخدام زيت اللوز الحلو على البشرة بمكوناته من فيتامين “أ” و”هـ” اللي هم أساس نضارة البشرة مع مواد مضادة للتأكسد يكاد يكون هو الحل الفعال والحقيقي للمشكلة دي. كل اللي هتحتاجيه هو الانتظام في شرب المياه وتدليك بشرتك بزيت اللوز الحلو يوميًا مساءً، خلال شهر، هتلاقي وشك اللي تعرفيه رجع تاني.
-
مناسب للبشرة الدهنية:
الطبيعي إن البشرة بتفرز مادة زيتية بيكون هدفها حماية البشرة وترطيبها بشكل خارجي، لكن اللي بيحصل مع أصحاب البشرة الدهنية إن المادة دي بيكون إنتاجها زايد جدًا واللي بدوره بيكون بيئة مناسبة جدًا للبكتيريا. وبالتالي ظهور حب الشباب، علشان كده، مع زيت اللوز الحلو ومع روتين العناية اليومي للبشرة بتاعك هتلاقي إن بشرتك إفراز الدهون فيها قل، وحب الشباب بيتعالج في نفس الوقت.
-
مناسب للبشرة الجافة:
لو انتي من أصحاب البشرة الجافة، فانتي بتعيشي معاناة مستمرة في ترطيب البشرة. الموضوع مش محتاج منك بحث كتير ولا شراء منتجات غالية، أوقات مش بتجيب النتيجة اللي محتاجة لها، مجرد مساج بيه بشكل يومي هيفرق معاكي ويجنّبك مشاكل البشرة الجافة الاعتيادية.
ده بالنسبة للبشرة، بس لازم تاخدي بالك إن الزيت ده لا يستخدم في النهار أو فترات التعرض للحرارة، لإن أي منتج فيه فيتامين “أ” و”هـ” بيكونوا حساسين جدًا ناحية الشمس أو الضوء، وممكن يسببوا إسمرار للبشرة. علشان كده، دايمًا استخدميه بالليل وخصوصًا قبل النوم لأقصى استفادة منه.
فوائد زيت اللوز للشعر:
الفائدة الرئيسية لزيت اللوز الحلو للشعر بتيجي من قدرة الزيت ده على ترطيب جلد فروة الرأس اللي على الرغم من إننا مش بنشوفها إلا إنها في حاجة للترطيب زي أي جزء من جلدك، ومع قدراته المطهرة بيقدر يمنع انتشار القشرة في شعرك. بس طبعًا لو انتي بتعاني من القشرة، مهم تعرفي نوع القشرة اللي عندك علشان تعرفي طريقة علاجها الصحيحة.
دي كانت فوائد زيت اللوز الحلو لبشرتك وشعرك، وحقيقي مفروض ما تحرميش نفسك منها، أهم حاجة تيجي من مصدر موثوق علشان تحصلي على نتايج فعالة وفي نفس الوقت استخدميه بالليل مش بالنهار.
المصادر
www.healthline.com
www.nectarusa.com
www.sevenminerals.com
التعليق باستخدام حساب فيس بوك