زيت جوز الهند من أكتر الزيوت انتشارًا في العالم، واستخدامه مش بس على نطاق البشرة والجمال، ده كمان بيدخل في الأكل وفيه مطابخ كاملة بتقوم على زيت جوز الهند زي المطابخ الآسيوية. ودايمًا هتلاقي إن خبراء الصحة بينصحوا إن ثلاثي زيت جوز الهند وزيت بذر الكتان وزيت الزيتون بفضلوا موجودين دايمًا في البيت. وده بسبب فوايدهم الغير عادية في كل جوانب حياتنا اليومية. بس كلامنا النهارده عن فوائد زيت جوز الهند للبشرة والشعر والصحة اللي هتخليكي دايمًا حريصة على وجوده في بيتك.
-
بيحتوي على أحماض دهنية صحية:
زيت جوز الهند بيتم الترويج له لاحتوائه على زيوت مشبعة اللي لها تأثيرات صحية ومفيدة جدًا لصحة الإنسان. فالأحماض الدهنية دي عندها قدرة على زيادة حرق الدهون المتراكمة في جسم الإنسان. وتوفير طاقة عالية جدًا للجسم والمخ. وبرضه بترفع من معدل الكوليسترول المفيد في الجسم hdl وده بيقلل التعرض لأمراض القلب.
-
قدرته على تعزيز صحة القلب:
الأحماض الدهنية اللي موجودة في جوز الهند لوحظ إن لها فوائد مباشرة على صحة القلب. فعلى الرغم من إن جوز الهند مالوش شعبية كبيرة في مطبخنا العربي واللي بيستهلكه هم بس الناس اللي بتهتم بالأكل الصحي، إلا إن منظمة الصحة العالمية وجدت عن طريق الرصد إن الدول اللي بيعتبر جوز الهند جزء أساسي من أكلهم ومصدر حصولهم على الطاقة معدلات الإصابة بأمراض القلب كانت أقل بنحو 60%.
-
بيساعد على حرق الدهون:
السمنة هي فعلًا مرض العصر ومنتشرة في كافة أنحاء العالم. الموضوع ده بيحكمه مع أسلوب حياة غير صحي عوامل جينية وهرمونية واختيار سيء للدهون المستخدمة. فعلى الرغم من إن زيت جوز الهند محتواه الحراري عالي، لكن تركيبته أثبتت قدرتها على حرق الدهون المتراكمة في الجسم بشكل فعال في ظل نظام غذائي متوازن.
-
مضاد للبكتيريا:
نص الأحماض الدهنية الموجودة في جوز الهند هي حمض اسمه اللوريك Lauric acid واللي بيتميز إن لما جسم الإنسان يهضمه، بيتحول لمركب اسمه monolaurin وده العلماء لقوا إن له قدرة على مقاومة الالتهابات الداخلية في الجسم ومقاومة البكتيريا والفطريات والفيروسات.
-
قادر على تقليل الإحساس بالجوع:
من الأمور المميزة في الأحماض الدهنية اللي موجودة في زيت جوز الهند هي قدرتها على زيادة الشعور بالشبع وده بيساعد على استهلاك أقل للسعرات الحرارية وبالتالي إنقاص الوزن الزايد.
-
مفيد للبشرة والشعر والأسنان:
زي ما قلت لك زيت جوز الهند له استخدامات خارجية على البشرة والشعر والأسنان لأغراض تجميلية، زي إنه يعتبر من أفضل الزيوت لترطيب البشرة الجافة وتخفيف أعراض الإكزيما. وبيستخدم على الشعر في الأساس لحمايته من الآشعة فوق البنفسجية، أشبه بواقي ضد الشمس. وبالنسبة للأسنان، فلو استخدمتيه في غسيل أسنانك أو المضمضة، له قدرة على القضاء على البكتيريا المسببة للرائحة الكريهة.
-
بيساعد على القضاء على دهون البطن:
الباحثين لقوا إن تناول معلقة من زيت جوز الهند الصبح كجزء من روتين فطارك اليومي، له دور كبير في المساعدة على حرق دهون البطن المتراكمة في محيط الخصر وبين الأعضاء الداخلية للجسم، لأنه بيحتوي على أحماض دهنية بتساعد على زيادة الإحساس بالشبع وبتعلى من حرق الدهون في الجسم.
آخر حاجة هقولها لك إن زيت جوز الهند محتواه الحراري عالي يعني الإفراط في استخدامه ممكن يكون له أثر سلبي لو قررتي تدخليه في نظامك الغذائي. علشان كده مهم جدًا تحرصي إنه يكون نظام غذائي متوازن الدهون وتستخدمي زيت جوز الهند كبديل صحي ومفيد عن أي دهون تانية غير مشبعة.
التعليق باستخدام حساب فيس بوك