محتويات المقال
إيه هو سيروم الهايالورونيك أو Hyaluronic Acid؟ ده اللي هنعرفك عليه من خلال الإجابة على الأسئلة دي
إيه هو سيروم الهايالورونيك؟
أول ما نسمع كلمة حمض أو Acid، بنتخض جامد. اللي هو إزاي حمض وهنحطه على بشرتنا؟ لكن في الحقيقة Hyaluronic Acid عبارة عن مادة زي الجيلي، وله قدرة متميزة في الاحتفاظ بالرطوبة. في الحقيقة، المركب ده بتنتجه أجسامنا في البشرة والعين والعضلات الضامة. وبيقل الإنتاج طبعًا مع مرور الزمن، وده اللي بيخلي الجفاف يظهر على بشرتنا. والتيبس في العضلات والمفاصل. علشان كده، المادة دي تعتبر عنصر أساسي في المنتجات المقاومة لعلامات تقدم السن والشيخوخة. لأنه عنده قدرة على الاحتفاظ بكمية مياه أعلى من وزنه بـ1000 مرة.
إيه فوائد سيروم الهايالورونيك للبشرة؟
- الترطيب العميق للبشرة.
- عنده قدرة عالية على مقاومة علامات تقدم السن والشيخوخة بسبب قدرته على الاحتفاظ بالمياه في البشرة. لأنه بيحافظ على رطوبة وبالتالي بيقدر يملا التجاعيد.
- له قدرة على المساعدة على شفاء الجروح لأنه بيقدر يقلل من حجم الجروح السطحية على الجلد بجانب تقليل الألم في المنطقة المصابة.
- مضاد للأكسدة ممتاز، وبالتالي الحفاظ على البشرة نقية وموحدة اللون.
دلوقتي قبل ما نكمل لازم نقول نقطة مهمة: أي مركب للبشرة مهما كانت قوته أو تركيزه أو حتى معروف عنه النتائج الفورية، مش هيجيب نتيجة إلا لو إنتي ملتزمة بروتين عناية بالبشرة بشكل يومي صباحًا ومساءً.
روتين العناية بالبشرة
صباحًا
- تغسلي وشك كويس لإزالة أي أتربة تراكمت على بشرتك في فترة النوم. والاستعداد ليوم جديد. استخدمي غسول مناسب لنوع بشرتك عميق المفعول.
- بعد ما تجففي بشرتك، استخدمي تونر لمزيد من التأكيد على نضافة سطح البشرة.
- استخدمي مرطب بيكون جزء من تركيبته سيروم الهايالورونيك Hyaluronic Acid.
- وبعد كده، الخطوة اللي ما تنسيش أبدًا تعمليها، حتى لو مش هتخرجي بره في اليوم ده، إنك تحطي كريم واقي من الشمس بمعامل مقاومة عالي لمقاومة التجاعيد وتلف سطح البشرة والتصبغات.
مساءً
- لازم قبل النوم وضروري جدًا تشيلي المكياج. مافيش أي عذر لإهمال النقطة دي لأن أثرها السلبي كبير جدًا.
- بعد إزالة المكياج، استخدمي منظف مناسب لبشرتك مخصص للمساء وتقدري تستخدمي قطنة محطوط فيها لبن لو بشرتك حساسة. هتقدري تحصلي على نضافة وترطيب في نفس الوقت.
- استخدمي تونر قابض للمسام. وحطي كريم للعين مقاوم للتجاعيد. لأن ده أفضل وقت لكريم العين.
- وفي الآخر حطي كريم مرطب بيحتوي على سيروم الهايالورونيك Hyaluronic Acid.
طيب سيروم الهايالورونيك ممكن يستخدم في إيه تاني؟
- بيستخدم في الاضطرابات اللي ممكن تصيب المفاصل
- في بعض عمليات التجميل زي حشو الشفاه.
- بيستخدم كمركب لترطيب العين اللي بتعاني من الجفاف في القطرات المستخدمة للهدف ده.
هل لسيروم الهاليورونيك آثار جانبية؟
يعتبر المركب ده آمن في استخدامه إلا بعض الآثار البسيطة المبلغ عنها. ولأن الجسم بينتج الحمض ده بشكل طبيعي، فظهور رد الفعل التحسسي بيكون نادر.
الدراسات اللي أجريت على إستخدامه في علاج هشاشة العظام بشكل يومي ما ذكرتش ظهور أي أثر جانبي للعلاج ده. لكن مافيش دلوقتي دراسات أكيدة على تأثيره على الحمل والرضاعة وأصحاب مرض السرطان أو من لديهم تاريخ سابق مع المرض ده.
أسعاره إيه في مصر؟
بتتروح أسعاره من 135 جنيه مصري لمرطب من شركة AVON لـ 500 جنيه مرطب من شركة نيتروجينا. وتقدري تلاقيه بسهولة أونلاين عن طريق مواقع التسوق زي سوق دوت كوم وجوميا وبيتوفر فيهم أنواع مستوردة من برة مصر.
في الآخر، نقدر نقول إن مركب Hyaluronic Acid آمن في استخدامه سواءً كمكمل غذائي أو علاج مشاكل الجلد أو هشاشة العظام أو حتى جفاف العين. فمتحرميش نفسك من استخدام مستحضرات للبشرة تحتوي على الحمض ده واستشيري طبيبك في حالة أخذه كمكمل غذائي.
1 comment
مقال رائع شكرا لكِ