فوائد عسل النحل الذهبية

عسل النحل: السائل الدهبي بكل درجاته وألوانه اللي بتحسي إنه عبارة عن بهجة وصحة في برطمان، أقدم المحليات في التاريخ واللي فوائده الطبية والغذائية لايمكن أبدًا إنكارها اللي بنستخدمها من 4000 سنة ولحد النهارده.

الحلو في عسل النحل إنك تحسي مش بس إن طعمه حلو ومفيد إنما كمان بتحسي إن دي حلاوة الورد الحقيقية وإن نوع طعمه مختلف لأن وردته مختلفة، سواء كان من زهور الموالح، ولا حبة البركة، ولا الربيع أو حتى صحراوي، أنواع كتيرة جدًا بس كلها بتتفق على حلاوة طعمها.

مهم جدًا إنك علشان تحصلي على الفايدة اللي عايزاها من العسل إنك تجيبيه من مصادر موثوق فيها ومعروف عنها إن منتجها طبيعي زي مثلًا امتنان وأبو عوف وأصيل.

عرفتي تجيبيه منين. هنقول لك دلوقتي على فوايده، بس قبل الفوايد دي جهزي مقادير طريقة عمل البان كيك بالعسل علشان تاكلي وتنبسطي بعد المقال ده.

فوائد العسل

• عسل النحل مغذي

مليان معادن وفيتامينات وسكر طبيعي بتختلف على حسب نوع الزهور اللي اتغذى منها النحل.

• عسل النحل الأصلي مضاد للأكسدة

بيحتوي العسل الأصلي على العديد من مضادات الأكسدة المهمة. وبتشمل أحماض عضوية والمركبات زي الفلافونويد flavonoids، اللي بيشوفها العلماء إنها بتقلل من مخاطر الإصابة بالسكتات الدماغية والقلبية وبتعزز من صحة العين.

• العسل أقل ضررًا لمرضى السكر

العسل له قدرة على خفض الكليسترول الضار اللي بيكون ملازم لمريض السكر من النوع التاني، وبيرفع في نفس الوقت من معدلات الكليسترول المفيد.

وعلى الرغم إن تناول العسل لمريض السكر أكيد بيرفع من معدل الأنسولين في الدم، بس ضرره لا يقارن بالسكر الأبيض المكرر، علشان كده من المهم الحذر في تناوله على إنه لا يزيد عن معلقتين صغيرين منه في اليوم.

• بيخفض من ضغط الدم

لأن العسل معروف باحتواءه على نسبة عالية جدًا من مضادات الأكسدة، فالعلماء ربطوها بالقدرة على خفض ضغط الدم واللي بيعتبر عامل شديد الخطورة على صحة القلب.

• بيساعد على التئام الجروح والحروق

يعتبر استخدام العسل بشكل ظاهري واحدة من أقدم أساليب العلاج، لأنهم لاقوا إنه عنده قدرة على مقاومة تلوث الجروح وبالتالي سهولة شفائها.

وحتى إنه أثبت قدرتها العالية جدًا على علاج القدم السكري اللي بيسبب في أوقات كتير بتر للقدم، وده بسببه مقاومته للالتهاب والبكتيريا، وفيه كمان أمراض جلدية تانية بيستخدم العسل كجزء من العلاج زي الصدفية والهربس.

• بيخفف من كحة الأطفال

الأطفال اللي بيعانوا من حساسية أو عدوى الجهاز التنفسي العلوي بيعانوا من الكحة وأسلوب حياتهم بيتغير بسببها. حتى إن الأدوية المستخدمة بتدي أوقات كتير حل مؤقت ليها، علشان كده، استخدمي العسل كجزء أساسي في علاج طفلك مع الدواء الموصوف له لأنه هيفرق معاه جدًا وتريحه وتساعده ينام بعمق، بس ما تنسيش ماينفعش أبدا تدي طفلك عسل قبل بلوغه سنة من عمره علشان ما يتعرضش لخطر التسمم الغذائي.

كمان من فوايد عسل النحل إنه:

• حلو بس عالي السعرات

العسل يعتبر أفضل بديل صحي للسكر الأبيض، بس علشان تحصلي على أفضل نتائج، لازم زي ما قولنا لك قبل كده شرائه من مكان موثوق. ما تنسيش السعرات الحرارية للعسل عالية لكن الفرق بينه وبين السكر إن الأول فعلًا مفيد وإن التاني هو ضرر بالكامل.

وفي الآخر، علشان نكون غطينا كل جوانب حياتك، اعملي ماسك الكركم والعسل والليمون علشان تفتحي بشرتك وتتشد وتتخلصي من حب الشباب والبقع الغامقة حقيقي يعتبر ماسك ذهبي مش بس في لونه وإنما كمان في فوائده.

ولو جربتي العسل مع الكركم كمشروب لوحده أو مع اللبن، هيكون مشروب لذيذ جدًا ومغذي وهيدفيكي جدًا انتي وأسرتك في الشتاء.

راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.

المصادر
www.benefits-of-honey.com
www.boileddinner.com
www.healthline.com