سمعنا عن فوايد زيت جوز الهند، لكن قليلين يعرفوا فوايد لبن جوز الهند واللي بيعتبر من أفيد أنواع الألبان النباتية، ممكن نعتبره سائل سحري، تمنه رخيص وفايدته عظيمة وطريقة تحضيره سهلة جدًا، أما فوايده فكتير جدًا، مش بس للصحة وكمان للبشرة والشعر والجسم، قررنا النهارده نتكلم معاكم عن جزء صغير من فوايد لبن جوز الهند للبشرة هيخليكي ما تقطعيهوش من البيت أبدًا.
لبن جوز الهند مش مقصود بيه المياه الشفافة اللي بتكون جوه ثمرة جوزة الهند، لكن مقصود بيه لبن بطريقة تحضير معينة أو حتى معلب جاهز من خلال طحن وعصر جوز الهند عشان يطلع منه لبن جوز الهند واللي بيتكون على وشه لما بيبرد زبدة جوز الهند اللي كلنا نعرفها.
مرطب طبيعي للبشرة
فاكرين حمام كليوباترا من اللبن والعسل؟ في الواقع ولزمن طويل، الحليب بأنواعه بيعتبر واحد من أنواع المرطبات للبشرة واستخدامه في الحمامات استمر لقرون، سواءً للعرايس أو الأطفال اللي لسه مولودين، حليب جوز الهند بيرطب البشرة ويخليها ناعمة ونضرة، كمان بيقلل الجفاف والحكة والتورم والاحمرار، باختصار بيهدي البشرة وبيخليها صحية ومتوهجة، اقري كمان: بدائل الحليب النباتية ..5 بدائل صحية للحليب البقري
وصفة حمام حليب جوز الهند: هتضيفي كوباية من حليب جوز الهند على نص كوباية من مياه الورد، مع كوباية من بتلات الورد على مياه الاستحمام الدافية والنتيجة هتبهرك جدًا.
بيعالج حروق الشمس
حليب جوز الهند فيه خصائص مضادة للالتهابات، لذلك واحدة من أهم فوايد حليب جوز الهند للجلد هو إنه بيعالج حروق الشمس بشكل فعال، كمان الدهون الموجودة على وش حليب جوز الهند “زبدة جوز الهند” بتقلل من الألم والاحمرار والتورم في الجلد.
طريقة الاستخدام: هتحطي طبقة رقيقة من حليب جوز الهند على المنطقة المصابة بالليل قبل النوم وتشطفيها الصبح وكلمينا عن النتايج الخرافية، اقري كمان: دليلك للوقاية وعلاج حروق الشمس منزليًا وبأشهر الكريمات
بيمنع الشيخوخة المبكرة
حليب جوز الهند مليان بفيتامين سي وبالنحاس وده بيساعد على الحفاظ على الجلد مرن وصحي وشكله شباب، من خلال وصفة خاصة أساسها هو حليب جوز الهند.
الطريقة: هتعملي عجيبنة من قطرات من حليب جوز الهند مع عدد 7 لوزات مقشرين ومطحونين، ونحطهم كقناع لمدة 15 دقيقة، بعدها تغسليه بالمية الباردة، ممكن تكرر الماسك مرتين لتلات مرات أسبوعين وهتنبهري من تقليل علامات الشخيخوخة بشكل فعال.
بيعالج الأمراض الجلدية
ناس كتير بتعتقد إن حليب جوز الهند ممكن يزود مشاكل الجلد في البشرة الدهنية وبالتالي يزود الحبوب، لكن المفاجأة إن استخدام حليب جوز الهند على الجلد بيساهم في تقليل ومنع حب الشباب لأنه فيه خصائص مضادة للميكروبات والدهون الموجودة فيه بتمنع انسداد المسام.
مزيل مكياج ممتاز
في نهاية كل يوم، بتستخدمي مزيلات المكياج الغالية جدًا، وبيخطر على بالك: يا ترى فيه طريقة طبيعية ومفيدة ممكن تزيلي بيها الميكاج؟ الحقيقة إن لبن جوز الهند من أكتر مزيلات المكياج الفعالة، خاصةً لو خلطتيه مع عنصر تاني مفيد وصحي، وبنرشح لك الوصفة دي: اخلطي مقدارين من زيت الزيتون ومقدار واحد من حليب جوز الهند وامسحي وشك بالراحة، مش بس هيتشال المكياج لكن كمان هيغذي بشرتك بعمق.
بيقشر بشرتك
يعتبر حليب جوز الهند من أفضل الطرق وأكثرها طبيعية لتقشير البشرة، من خلال الوصفة دي: اخلطي شوفان مطحون مع حليب جوز الهند واستخدميه كمقشر مرة لمرتين في الأسبوع عشان تحققي أفضل النتايج.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك