محتويات المقال
مياه الورد واحد من أقدم منتجات العناية بالبشرة في التاريخ. مفيش تقريبًا واحدة فينا ما سمعتش عن فوائده وتأثيره الحلو على البشرة والشعر، وإن السائل صاحب الريحة العطرية الخفيفة دي – اللي بتحسي لما تشميها إنك حاطة بوكيه ورد في إزازة – أغلبنا عارف إنه بيستخدم أكتر للبشرة الدهنية علشان هو بيقلل من إفراز الدهون. بس الحقيقة إن كل أنواع البشرة تقدر تستفيد منه مش بس للترطيب إنما لحاجات تانية كتير هنقولك عليها. فتعالي شوفيها معانا.
فوائد ماء الورد
- تخفيف تهيج الجلد.
- مضادات الأكسدة.
- علاج الحروق والجروح.
- توازن البشرة.
- مقاومة القشرة.
- المساعدة على النوم.
- التخلص من حب الشباب.
-
بيساعد على تخفيف تهيج الجلد
من أجمل وأقوى خصائص ماء الورد إنه مضاد للالتهاب. فلو انتي أو أي حد تعرفيه بيعاني من تهيج في البشرة واحمرار بسبب الإكزيما مثلًا أو حتى التهاب حب الشباب، فأحسن حاجة تستخدميها هي مياه الورد لأنها فعلًا قادرة على تهدئة الاحمرار ده.
-
بتحتوي على مضادات أكسدة
من الأمور اللي تم اكتشافها في ماء الورد إنه مضاد قوي للأكسدة إن استخدامه على البشرة له قدرة على مقاومة تلف الخلايا والحفاظ على صحة نموها وتجديدها.
-
بيعالج الجروح وأثر الحروق
لإن ماء الورد فيه مواد مضاد للالتهابات والبكتيريا تم استخدامه كواحدة من العلاجات في حالة الإصابة بجروح لأنه بيساعد جدًا على التئام الأنسجة وبالتالي سرعة الشفاء. وبالمثل في حالة الإصابة بحروق يعتبر واحدة من أفضل العلاجات المنزلية.
-
بيساعد على الحفاظ على توزان وترطيب البشرة
الاستخدام المستمر لماء الورد في روتين العناية بالبشرة بيساعد على اكتسابك لمظهر منتعش دايمًا وبشرة مشدودة وصحية وفي نفس الوقت محتفظة برطوبتها ومرونتها في نفس الوقت.
-
مقاومة القشرة
الخصائص المرطبة لماء الورد لها تأثير حلو جدًا على البشرة، فهو بيساعد على إكساب الشعر لمعان وبرضه قادر على علاج الالتهابات الخفيفة اللي ممكن تصيب فروة الراس وعلى مقاومة قشرة الشعر.
-
بيساعد على النوم
لو قمتي برش شوية مياه ورد على مخدتك قبل النوم، فالرائحة الهادية والرقيقة لماء الورد هتساعد على استرخاء أعصابك ومساعدتك في الدخول في النوم بشكل أسرع وبالتالي تحصلي على نوم أفضل وتصحي نشيطة.
-
مقاوم لحب الشباب
زي ما قلنا لك قبل كده، الخصائص المقاومة لالتهاب البكتيريا الموجودة في مياه الورد بتساعد على مقاومة حب الشباب وفي نفس الوقت على نظافة المسام وغلقها علشان تقلل من فرص الإصابة بحب الشباب.
دي أهم فوائد لماء الورد اللي ممكن كتير مننا ما يعرفش عنها حاجة. بس قبل ما نخلص المقال ده، هنقول لك على استخدامات سريعة له هتخلي إزازة مياه الورد موجودة دايمًا في بيتك.
استخدامات ماء الورد
- استخدميه بعد المكياج كمثبت. الحلو فيه إنه بيساعد على إعطاء مكياجك شكل منتعش.
- لو شعرك جاف ومتطاير بكل بساطة، هاتي قطنة حطي فيها مزيح من ماء الورد وجلسرين وادعكي بيها فروة راسك بشكل خفيف وسيبيها نص ساعة. وبعد كده، اغسليها بالشكل الاعتيادي هتلاقي نتيجة ممتازة.
- استخدمي مياه الورد كمنظف للبشرة. شوية مياه ورد في قطنة وتمسحي بيها بشرتك. هيوفر لك النضافة اللي عايزاها وهيقفل لك المسام المفتوحة.
- لو صاحية عينك منفوخة، بكل بساطة قطنة في مياه ورد ساقعة وحطيها على عينك ربع ساعة وهتلاقي انتفاخ العين قل جدًا وأي احمرار اختفى.
- استخدميه في إزالة المكياج، فعال جدًا ماء الورد في إزالة المكياج وترطيبها في نفس الوقت.
- استخدمي خليط ماء الورد مع مع زيت اللوز أو أي كريم ترطيب بتستخدميه وخصصي المكون ده لبشرة جسمك. ادهنيه بعد الاستحمام وتجفيف جسمك كويس جدًا. هتلاقي إن بشرتك بتتنفس ومنتعشة وريحتها حلوة جدًا.
أعتقد بعد كل المعلومات دي ما ينفعش ما يكونش في بيتك إزازة مياة ورد وعلاقتك بيها تبدأ تبقى أقوى. لو انتي ليكي استخدامات تانية لماء الورد، اكتبيها لنا في الكومنتس تحت.
التعليق باستخدام حساب فيس بوك