ستات كتير بيتجنبوا ممارسة الرياضة في وقت الدورة الشهرية، لإن في اعتقاد سائد إن الرياضة مضرة لصحة الست في أيام الدورة الشهرية، لكن الطب له رأي تاني مختلف خالص عن الاعتقاد ده، لإن ممارسة الرياضة أثناء الدورة الشهرية لها فوائد كتير لصحة السيدات، وفي المقال ده هنقولك على الفوائد دي، وعلى بعض النصايح اللي هتفيدك في ممارسة الرياضة أثناء الدورة الشهرية:
فوائد ممارسة الرياضة أثناء الدورة الشهرية
-
تخفيف آلام الدورة الشهرية
ودي أهم نقطة عكس المعتاد، لإن الرياضة وخصوصًا المشي بتساعد على تخفيف آلام وأعراض متلازمة ما قبل الحيض، واللي بينتج عنها وجع في منطقة الحوض، وبرضه لو السيدة بتعاني من “عسر الطمث” فالرياضة بتخفف جدًا من نسبة الإصابة بيه.
-
تحسين المزاج
وطبعًا كلنا كستات عارفين مزاجنا بيكون عامل ازاي أثناء الفترة الشهرية، والحقيقة إن الرياضة بتخفف جدًا من أعراض المزاج السيء اللي بنمر بيه، زي الاكتئاب والحزن والضيق.
-
تقليل الشعور بالإرهاق
مع تغير الهرمونات في جسم السيدات أثناء الدورة الشهرية، بيحصل إحساس وشعور بالإرهاق، لكن ممارسة الرياضة، بيعمل زيادة لنسبة الطاقة في الجسم، وده بيخفف جدًا من الشعور بالإرهاق.
-
نصائح لممارسة الرياضة أثناء الدورة الشهرية
- اشربي مياه كويس: والنصيحة دي مهمة للأيام العادية، وأهم في أيام الدورة الشهرية، لإنه هيساعدك على التخلص من “النفخة” والإمساك، والشعور بالعطش الشديد أثناء ممارسة التمارين الرياضية.
- استعملي المسكنات: بس بدون إفراط، خدي حاجات خفيفة زي البارسيتامول، وده هيساعدك على التخلص من الصداع، والتشنجات أو التقلصات.
- تغيير الفوط الصحية: مهم جدًا تستعملي فوطة صحية نضيفة قبل ممارسة الرياضة على طول، ولو حصل تدفق أثناء ممارسة الرياضة، غيري الفوطة تاني، علشان تحافظي على المكان جاف ونضيف، تجنبًا للالتهابات والحكة والروائح الكريهة.
- مارسي رياضة مناسبة: وابعدي عن التمارين العنيفة، أو التمارين اللي بتشتغل على منطقة الحوض.
ودي مجموعة مقالات هتفيدك عن الدورة الشهرية
- إزاي اكلم ابني الولد عن البيريود (الدورة الشهرية)
- 5 طرق تخلصك من آلام الدورة الشهرية الحادة
- هل الرجالة كمان بيحصل لهم أعراض زي الدورة الشهرية PMSING
- أسباب غزارة الدورة الشهرية بعد الولادة القيصرية
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك