اتكلمنا في مقال سابق عن فوائد ممارسة العلاقة الحميمة، ودلوقتي هنتكلم عن فوائد ممارسة العلاقة الحميمة صباحًا. يا ترى ممكن يكون فيه أسباب تخلينا نفضّل ممارسة الجنس صباحًا؟ تعالي نشوف مع بعض 6 فوائد لممارسة العلاقة الزوجية بدري للاستمتاع بحياة جنسية مثيرة ومتجددة.
أولًا: بداية يوم جميلة
مش حابة تعملي تمارين رياضية الصبح؟ ممارسة العلاقة الحميمة هتديكي فوائد التمارين الرياضية وأكتر، لأنها هتزود هرمونات الإندورفين المقاومة للألم والمحفزة للمود (المزاج) الحلو. يعني لو رايحة الشغل أو حتى قاعدة في البيت، ابدأي يومك بمود حلو وتمرين خفيف ولذيذ.
ثانيًا: امسحي الضغط
من فوائد ممارسة العلاقة الحميمة بدري، مش بس إنها بتساعد في خفض ضغط الدم، إنما كمان الضغط العصبي. لو عندك يوم صعب، عندك انترفيو قالقك، أو اجتماع كبير، أو هتقضي اليوم مع الولاد ومحتاجة أعصاب مش مضغوطة ومسترخية، يبقى ممارسة الجماع هي وسيلة رائعة لتخفيف الضغط ده من عليكي.
ثالثًا: مفيش ولاد
سواء بدري قوي قبل ما الولاد يصحوا أو بدري برضه بعد ما ينزلوا للباص وقبل ما تروحوا شغلكم، يعني مفيش أي إزعاج ولا أي إحراج من أي نوع. خدوا راحتكم.
رابعًا: مفيش تعب
معظم الوقت، بعد يوم العمل الطويل وشغل البيت ومذاكرة الولاد، بتكوني تعبانة ومرهقة ومودك مش حلو. هنا تظهر فايدة عظيمة لممارسة العلاقة الحميمة الصبح، لأنك لسه ما تعبتيش وفرهدتي من الجري والشغل.
خامسًا: الحاسة السادسة
لا مش لدرجة حاسة سادسة بجد، بس العلاقة الحميمة بتساعد جدًا في تحسين العمليات الإدراكية والذاكرة، فتخيلي الصبح بقى تاخدي الدفعة القوية دي قبل ما تنزلي الشغل، هتفضلي طول اليوم مركزة ومصحصحة ومش هتحتاجي تشربي قهوة كتير كده.
سادسًا: النضارة
مش النضارة بتاعة النظر، لا نضارة البشرة. ممارسة الجنس الصبح هتديكي مظهر نضارة وإشراق ومش هتحتاجي مكياج. مستوى الأستروجين اللي الجسم هيفرزه مش هيخليكي محتاجة مكياج، لأنه هيديكي لمعة طبيعية في بشرتك وشعرك.
أما بقى لو كنتي من النوع اللي بيبرد جدًا أو ما تحبيش تلبسي لانجيري، فمن ألطف فوائد ممارسة الجنس الصبح هو إنك بالفعل دفيانة ومش هتضطري تلبسي حاجة مش مريحة ليكي. ودي فايدة زيادة حبينا نضيفها لك.
التعليق باستخدام حساب فيس بوك