محتويات المقال
لو كتبتي كلمة فيتامين بس على جوجل، أول حاجة هتظهر لك هي فيتامين د. فيتامين د بقى مشهور أكتر بكتير من أي فيتامين تاني، رغم إن كلهم مكافحين وذاكروا سوا ونجحوا وربنا وفقهم، لكن فيتامين د يظل على قائمة الأعلى شهرة وتلميعًا ما بين الفيتامينات التانية الغلبانة. وكلنا سمعنا على مدار السنين الأخيرة فوائد فيتامين د للجسم والشعر والبشرة والعضم والتنحيف، وجلب الحبيب في خلال 6 ساعات. في المقال ده، هنكلمك عن فيتامين د؛ الفيتامين العجيب الخارق اللي ناقص من جسم ستات مصر كلها ده، واللي نقصه بيسبب مشاكل صحية، وهنقول لك فوايده، ونسبته الطبيعية وإزاي تعالجي نقصه.
ما هو فيتامين د؟
قبل أي حاجة، خلينا نعرف إيه هو فيتامين د عشان نفهم هو ليه مهم وبييجي منين. فيتامين د هو الفيتامين اللي الجسم بيشربه من تفاعل الجلد مع آشعة الشمس، ووجوده في الجسم هو اللي بيخلي الكالسيوم يقعد جوا العضم. عشان كده حتى لو نسبة الكالسيوم في جسمك كويسة، ممكن تحسي إن عضمك ضعيف وده هيكون راجع لإن فيتامين د مش بالنسبة الكافية في الجسم وعشان كده، العضم مش واصل له الكالسيوم بالشكل الكافي.
أهمية فيتامين د
طيب دلوقتي خلاص عرفنا إيه هو فيتامين د، خلينا نعرف بقى هل هو فعلًا مهم قوي كده؟ تعالي نقرا مع بعض فوايد فيتامين د.
فوائد فيتامين د للعظام
فيتامين د بيقوي العضم وده بيخلي عضمك أصعب إنه يتكسر في حالة أي وقوع أو حادثة لا قدر الله. وكمان بيحمي الأطفال من لين العظام اللي سببه الرئيسي هو قلة فيتامين د في الجسم.
فوائد فيتامين د للجسم
امتصاص الكالسيوم هو أهم فايدة من فوائد فيتامين د للجسم. قلة فيتامين د بيخلي الجسم ما يمتصش الكالسيوم. وده بيخلي كثافة العضم أقل وده بيسبب شروخ العظام.
فوائد فيتامين د للشعر والأظافر
بما إننا اتكلمنا عن قد إيه فيتامين د بيفيد العضم وبيساعد في امتصاص الكالسيوم في الجسم، فمفهوم طبعًا بالتبعية إن الشعر والضوافر كمان هيستفيدوا بوجود فيتامين د.
أعراض نقص فيتامين د
- وجع العضم
- وجع المفاصل
- ضعف العضلات
- تقلصات العضلات
- الإرهاق الشديد المستمر
- سوء الحالة المزاجية
المعدل الطبيعي لفيتامين د
لإن الأعراض دي ممكن تتكرر في أمراض تانية، فعشان تتأكدي، لازم تعملي اختبار دم. نسبة فيتامين د الطبيعية هي من 20 – 50 نانوجرام في الميلليلتر. أقل من 12 يعتبر نقص فيتامين دال شديد.
علاج نقص فيتامين د
طيب لو بعد التحليل، اكتشفتي إن نسبة فيتامين د فعلًا قليلة في الدم، تعملي إيه؟ تاخدي الحاجات الجاية دي:
- فيتامين د اللي بيتباع في الصيدليات.
- الأكل الغني بفيتامين د: الأسماك الغنية بالدهون، الكبد البقري، البيض، اللبن، منتجات الألبان.
نصائح عامة
- لو انتي vegan يعني ما تاكليش أي لحوم ولا منتجات ألبان ولا بيض، فانتي محتاجة تاخدي فيتامين د من أي مصدر تاني، ممكن أقراص الدوا تفيدك.
- اتعرضي للشمس بشكل كافي، حاولي قبل الساعة 10 الصبح وبعد 3 أو 4 بعد العصر تتشمسي كفاية.
- خدي بالك من وزنك. لأن الدهون بتمتص فيتامين د فهتقلل نسبته في الدم لو زادت عن اللزوم.
التعليق باستخدام حساب فيس بوك