على الرغم من إن جياني ماريا فيرزاتشي، اتولد في قرية إيطالية فقيرة على البحر لكنه كان قارئ نهم، ومبهور بالتاريخ وخصوصا التاريخ الإغريقي، والدته كانت خياطة وكان عندها بوتيك، وكان بيتعلم منها بالتوازي مع دراسته لحد لما أخد الثانوية اشتغل في محل والدته لكن طموحه كان أكبر فبدأ ينتقل بين أتيليهات إيطالية مختلفة لأسماء كبيرة في عالم الأزياء والتصميم زي Genny و Compliceو Mario Valentino و Callaghan لحد لما قرر يفتح شركته الخاصة ونظم أول عرض أزياء سنة1978، وفي شركته الجديدة قرر يخلي أخوه سانتو الرئيس التنفيذي، وأخته دوناتيلا مصممة ونائب رئيس الشركة.
من اللحظة دي اتحول جياني من مصمم أزياء إيطالي شاطر لأيقونة عالمية في مجال الموضة والأزياء بعد ما نجح إنه يؤسس علامة فيرزاتشي التجارية العالمية اللي انطلق كبيت أزياء بينتج أكسسوارات، و برفانات و ميكاب و مفروشات منزلية وملابس، و تألقه موقفش عند علامته التجارية لكنه كمان كان بيصمم الأزياء في عدد من المسرحيات والأفلام.
تأثر شركة فيرزاتشي بالأساطير الإغريقية
جياني كان متأثر جدا بالحضارة اليونانية والأساطير الإغريقية بداية من شعار العلامة التجارية لشركته واللي على هيئة رأس ميدوسا، والحقيقة إن ناس كتير بتشوف إنه الشعار دا شرير جدا لأن ميدوسا رمز للشر الأنثوي وفي الأساطيرالإغريقية هي كانت بنت جميلة جدا لحد لما غلطت غلطة كبيرة اتحولت من بعدها لوحش دميم الشكل، لكن التحدي اللي أخده جيوفاني إنه يحول الرأس الدميم اللي طالع منها ثعابين كتير، لرمز في عالم الجمال مخالبها وثعابينها مرصعة بالأحجار الكريمة والألماس.
تأثر شركة فيرزاتشي بالأساطير الإغريقية موقفش عند حدود ميدوسا ولا النقوش اللي جاية من قصور وأثر الحضارة الإغريقية القديمة لكنه كمان ابتدى يستلهم أسامي مجموعات المجموهرات من بقية أبطال الأساطير دي، على سبيل المثال المجموعة Gorgon Claw اللي بترمز لقوة وبأس الغورغون، وهو مخلوق أسطوري عاش في أساطير الإغريق.
من أبرز الأيقونات اللي استلهما جياني هو المفتاح الأيقوني عند اليونانيين، عمله من الذهب البراق مع نهاية مدببة مرصع بالأحجار الكريمة زي العقيق والجمشت والسترين، ودا ظهر جدا في مجموعة Virya أما مجموعة Iconic Limited Edition فجمعت بين الذهب من عيار 18 مع الألماس بالإضافة لرمز ميدوسا.
جياني كان عنده وجهة نظر بتقول إن الفستان نفسه شكل بيختلف من وسيدة للتانية لأن لكل ست جاذبيتها وجمالها، ويمكن دا السبب اللي خلى الأميرة ديانا تلجأ له في الفترة الأخيرة من حياتها عشان تعيد اكتشف جمالها، غير نجمات تانين كتير كانوا بيعشقوا تصميماته زي ناعومي كامبل و كارلا براوني، وإليزابيث هيرلي، وسلمى حايك، وجينفير لوبيز.
رغم شهرته الواسعة وثروته العظيمة، جيوفاني اتوفى عن عمر 50 سنة بعد ما اتعرض للقتل على باب قصره، لكن الشيء الملفت إن العلامة التجارية مكملة بنفس النجاح والتميز، وبتطور نفس المنبع من الأفكار ودا اللي بيثبت إنها مكانتش مجرد علامة قايمة على شخص لكن مؤسسة ليها رؤية قواعد واضحة ومكملة، ودلوقتي هانسيبكم مع مجموعة من أجمل تصميمات الفساتين من العلامة التجارية فيرزاتشي.
التعليق باستخدام حساب فيس بوك