دلوقتي كلنا حاسين بقلق كبير بسبب فيروس كورونا وأعراضه، وطول الوقت بنحاول نطهر ونعقم بيوتنا وأطفالنا، وبقينا حريصين جدًا في نوعيات الأكل اللي بنأكلها لهم، نفس الحاجة بتفكر فيها الأم الحامل، وقلقانة من الرضاعة الطبيعية، سواء طفلها حديث الولادة أو رضيع، والقلق ده بيزيد لأن مرض كورونا جديد ولسه مفيش تطعيمات له ولا أدوية محددة تقضي على الفيروس. ورغم كده إلا إن في تعليمات ونصايح الأطباء قادرين يقولوها لنا علشان نقدر ناخد بكل الأسباب للوقاية من فيروس كورونا (covid-19). وفي المقال ده، هنجاوب للأم المرضع أو الحامل اللي على وشك الولادة على كل التساؤلات الخاصة بالرضاعة الطبيعية:
لو الأم مصابة بفيروس كورونا، هل تقدر ترضع طفلها طبيعي؟
منظمة الصحة العالمية قالت آه تقدر بس لازم تعمل شوية حاجات علشان تحمي طفلها:
- ممارسة النظافة التنفسية أثناء الرضاعة، يعني لا تكح ولا تعطس في وش الطفل وهي بترضعه.
- لبس الكمامة على قد ما تقدر.
- غسل اليدين قبل وبعد لمس الطفل.
- تنظيف وتطهير الأسطح بشكل روتيني.
هل تسبب الرضاعة الطبيعية للأم المصابة بفيروس كورونا في نقل المرض إلى الطفل؟
مرض كورونا بيتنقل من شخص للتاني عن طريق رذاذ الجهاز التنفسي اللي بيطلع عند الكحة والعطس، والمعلومات المتوفرة بتقول إن مفيش أي دليل إن الفيروس بيتنقل عن طريق لبن الأم، بالعكس ده ممكن يكون فيه أجسام مضاده له في اللبن زي ما حصل مع فيروس “سارس”.
وبنفكرك دايمًا إنك لازم ترجعي لدكتورك في كل الأحوال لأنه هو الأدرى بحالتك وحالة طفلك، مع تمنياتنا ليكي ولطفلك بالصحة والسلامة.
التعليق باستخدام حساب فيس بوك