محتويات المقال
من أكتر المشاكل اللي بتواجهنا الأيام دي في فترة العزل الصحي في البيت هي جفاف اليد وخصوصًا بسبب إننا بقينا بنستهلك بكميات كتيرة الكحول والمنتجات اللي بيبقى فيها كحول زي معقم اليدين والكحول وكولونيا 555، ده غير طبعًا الكلور اللي بقينا تقريبًا بنضف بيه كل حاجة وللأسف ناس كتير بقت بتخففه بميه وبقت تعقم بيه إيدها وكمان بتستخدمه كبخاخة تعقم بيها الجو وفي المقال ده هنقولك استخدام الكلور المضبوط وإزاي تحافظي على ايدك من الجفاف.
استخدام الكلور على اليدين
يعتبر الكلور من أحسن المواد الفعالة اللي بتقضي على البكتريا والفيروسات عشان كده بقينا بنلجأ ليه في التعقيم، لكن بعض السيدات بقوا بيستخدموه في تعقيم اليدين وبالفعل سبب ليهم مشاكل زي الجفاف الشديد والحكة والاكزيما. وحذرالأستاذ الدكتور هاني الناظر الرئيس السابق للمركز القومي للبحوث على حسابه الرسمي على الفيسبوك من استخدام الكلور لتعقيم اليدين والوجه أو حتى كبخاخ في الهوا أو على الأسطح المختلفة في البيت طالما مش بيدخله البيت حد غريب ومش بيترش في كل مكان.
الطرق الصحيحة لاستخدام الكلور
- عشان تقدري تستخدمي الكلور في التعقيم بطريقة صحيحة لازم تخففيه بالنسب الصحيحة بالميه فقط ومتخلطيهوش مع أي سوايل تانية نهائي.
- أنواع الكلور بتخالف من نوع للتاني وفيه بعض الأنواع بتكون مركزة فلازم تقري الإرشادات اللي موجودة على العبوة عشان تقدري تستخدميه صح.
- طبعًا مينفعش تستخدمي الكلور على إيدك ولو هتستخدميه في التنضيف، مهم جدًا إنك تلبسي جوانتي.
- ابعدي عن استخدامه على أسطح البيت والعفش واستخدميه في تعقيم التواليت وتنظيف الأرضيات ونعال الأحذية.
- بنفكرك إن الكلور ممكن يبوظ المفروشات والهدوم ويغير لونها، وإنتي بتستخدميه ابعديه عن لبسك والمفروشات والسجاجيد.
- حطي الكلور في مكان آمن وبعيد عن متناول إيد الأطفال.
إزاي احافظ على إيدي في الفترة دي؟
طبعًا الفترة دي صعبة لإن كل شوية لازم نغسل إيدنا بالميه والصابون وننضف ونطهر إيدنا بالكحول، وكتر استخدام معقم اليدين والكحول ممكن يسبب جفاف عشان كده حاولي تعملي شوية الخطوات دي عشان تحافظي على إيدك من الجفاف:
- خلي الكحول وإنتي في الشارع لو اضطريتي تنزلي للشغل أو أي مشوار ضروري أو بعد ما تمسكي العملات الورقية، مش لازم وانتي قاعدة في البيت تستخدمي الكحول كل شوية لانه كفاية تغسلي ايدك بالميه والصابون لمدة 20 ثانية.
- نفس الفكرة مع المعقمات، خلي إستخدامك ليها مقتصر على لضرورة القصوى فقط لما ما تلاقيش مكان تغسلي فيه ايدك لان كتر إستخدامها ممكن يسبب لبعض الناس حساسية.
- استخدمي الميه الفاترة في غسيل الايد وحاولي تبعدي عن الميه السخنة.
- استخدمي الجوانتي في غسيل الحوض أو التنضيف وخصوصًا لو هتستخدمي كلور.
- استخدمي الكريمات المرطبة أو الجليسرين كل فترة عشان تحافظي على ترتطيب ايدك.
المصدر:
التعليق باستخدام حساب فيس بوك