محتويات المقال
في شهر مارس، مكاتب الصحة الموجودة في أنحاء الجمهورية بتقدم تطعيم الحصبة للأطفال، وأمهات كتير كانوا مقررين يطعّموا أطفالهم، بس بعد وجود فيروس كورونا في مصر، بدأت الأمهات تسأل أسئلة خاصة بتطعيم الحصبة علشان يضمنوا منتهى الأمان الصحي لولادهم. وقبل ما نجاوب على الأسئلة الخاصة بالتطعيم، لازم تعرفي الأول إيه هو مرض الحصبة.
الحصبة مرض فيروسي وممكن يسبب مضاعفات خطيرة والوقاية منه ممكن تكون عن طريق التطعيم. المرض بيتنقل بين الأفراد عن طريق استنشاق الرذاذ الحامل للمرض. بيصيب الجهاز التنفسي وييتنقل لباقي أعضاء الجسم وفترة حضانة المرض غالبًا بتكون من 10 لـ 14 يوم. وأعراضه هي:
- ارتفاع درجة الحرارة.
- طفح جلدي على شكل بقع حمراء.
- زكام.
- التهاب حلق.
- وفي الحالات الشديدة ممكن يسبّب التهاب رئوي.
جمعنا لك كل أسئلة أمهات راحة بالي عن تطعيم الحصبة وسألناها للدكتور محمد جميل، استشاري طب الأطفال وكانت إجاباته كالتالي:
أطعم ابني تطعيم الحصبة ولا لأ؟
الجرعة الحالية جرعة إضافية منشطة مش أساسية، وأغلب أطباء الأطفال ما بيفضّلوش حاليًا مع انتشار فيروس كورونا إن الأطفال تروح تتطعم في مكاتب الصحة علشان الزحام اللي هو سبب أساسي في انتشار مرض الكورونا.
هل التطعيم بيأثر على مناعة الطفل فيزود فرص إصابته بفيروس كورونا؟
المعلومة دي غير صحيحة. التعب والحرارة اللي بتيجي للطفل بعد التطعيم هي دليل على تعرّف وتجاوب الجسم مع التطعيم مش ضعف مناعة.
لو قررت أطعم ابني آخد احتياطاتي إزاي؟
- روحي في وقت مش زحام.
- البسي الكمامة انتِ وطفلك وما تخلعيهاش نهائي.
- ما تلمسيش أي حاجة هناك وأول ما ترجعي، اغسلي إيديك وإيد طفلك كويس جدًا.
هل مكاتب الصحة بتكون متعقمة كويس؟
بيعقّموا على قد ما يقدروا، بس فيه حاجات خارجة عن السيطرة زي العدوى اللي بتنتشر في الزحام.
تطعيم الحصبة نقاط ولا حقن؟
حقن، ومش بتسبب أي تورم في أغلب الحالات.
لو شكيت إن ابني جاله فيروس كورونا أعمل إيه؟
تسألي الدكتور المتابع له وتوصفي له الأعراض وهو هيقرر تعملي إيه، وما تروحيش مستشفى الحميات (اللي بتقدّم اختبار فيروس كورونا) من غير استشارة دكتورك، لإنهم مش بيعملوا اختبار الكورونا غير للأشخاص اللي جايين من السفر أو اللي اختلطوا بأشخاص مرضى بفيروس كورونا.
ولحسن الحظ إن الأطفال من سن يوم واحد لحد 12 سنة، مناعتهم هتفيدهم جدًا ضد فيروس كورونا، وده اللي يخلي الأمهات تطمن أكتر مع أخد كافة الاحتياطات المعروفة.
التعليق باستخدام حساب فيس بوك