“أنا حامل في الشهر الثاني وعندي فيروس cmv. هل هو مرض خطير؟” ده يعتبر واحد من أكتر الأسئلة اللي بتتكرر خلال فترة الحمل من سيدات مروا بالتجربة وبيدوروا هل في تحليل cmv وهل فيروس cmv له نسبة طبيعية ونسبة مش طبيعية، كل الأسئلة دي وأكتر عن صحة الأم والجنين المصابين بالنوع ده من الفيروسات حبينا نجاوب عليها من خلال المقال ده.
إيه هو فيروس الـ CMV
اسمه الفيروس المضخم للخلايا، وهو شكل من أشكال فيروس الهربس، بيكون موجود جوه أجسامنا مدى الحياة بعد إصابة واحدة بس بيه، خاصة إنه فيروس شائع جدًا، لكن مش مؤثر في الناس اللي مناعتها وصحتها كويسة، في المقابل الفيروس ده ممكن يهاجم الجسم بسهولة لو الست حامل أو جهازها المناعي ضعيف. المشكلة في الإصابة بالفيروس أثناء الحمل إن العدوى ممكن توصل للجنين اللي ممكن يعاني فيما بعد من الأعراض، والمشكلة الحقيقية في المرض ده لو جه لحد عامل زراعة لعضو أو خلايا جذعية أو نخاع، وقتها بيكون قاتل. خلينا نقول إن لو 100 أم حامل جالهم الفيروس ده، 40 أم منهم هتنقل الفيروس للجنين من خلال الدم الواصل في المشيمة.
أعراض فيروس الـ CMV
عادة الفيروس ده مش بيكون له أعراض واضحة. لكن في أحيان أخرى، ومع وجود مناعة قليلة، بنشوف أعراض زي:
- سخونية
- تورم في الغدد
- كحة
- زكام
أعراض إصابة الجنين بفيروس CMV
لو الجنين اتعدى من الأم، بيكون سهل يتعرف الإصابة من خلال تحليل مياه السائل الأمينوسي المحيط بالبيبي، وده من خلال إبرة موجهة بالموجات فوق الصوتية لداخل الكيس.
العلاج من فيروس CMV
حاليًا مفيش علاج لفيروس CMV أثناء الحمل، لكن لو ثبت إن الجنين مصاب بالفيروس ممكن ياخد مضادات فيروسات بعد الولادة على طول.
مضاعفات فيروس CMV على المواليد
يبقى السؤال: يا ترى لو بيبي جاله الفيروس وهو في بطن مامته، هيحصل له إيه؟ وهل ده هيؤثر عليه بعد الولادة ولا لأ؟ الدراسات بتقول إن 80 لـ 90% من الأجنة اللي جالهم الفيروس هيتولدوا كويسين وما فيهمش أي حاجة. غير إنهم هيكونوا أخدوا مناعة من الفيروس، فمش هيجي لهم باقي حياتهم، إلا لو مناعتهم انخفضت بشكل ملحوظ في مرحلة ما، لكن تبقى نسبة خطر لحوالي 10 لـ 20% من المواليد واللي هيعانوا من مضاعفات ممكن تكون خطيرة، ومالهاش علاج برضو بسبب الفيروس زي:
- فقدان البصر أو السمع.
- انخفاض الوزن عند الولادة.
- صغر الرأس (Microcephaly).
- تضرر الكبد والطحال والرئة.
- النوبات.
- اليرقان.
- الطفح الجلدي.
- الإعاقة الذهنية.
وللأسف الشديد، عدم ظهور أعراض بعد الولادة مش ضمان إن الطفل هيفضل كده على طول، لإن فيه نسبة قليلة جدًا من المواليد بتظهر عليهم الأعراض خلال السنين الأولى من عمرهم.
بالفيديو أهم فحوصات تكشف عن تشوه الجنين
المصادر:
CDC
Mayo Clinic
التعليق باستخدام حساب فيس بوك