أيام زمان في العيد وأيام التلفزيون الملون الجديد اللي كان لسه ظهر في وقتها، طل علينا أوبريت كله عرايس ماريونيت ورقص ومزيكا بهياخدك لعالم خيال ويعرفك كل تفاصيل المولد الشعبي.. الاوبريت الجميل ده اللي اتربينا عليه وكنا بنشوفه في التليفزيون ويا سلام لو كان حد فينا محظوظ وراح بنفسه شاف الأوبريت في مسرح العرايس اوبريت الليلة الكبيرة.. بس الايام اللي فاتت رجع الاوبريت للساحة الفنية بخبر جميل هنتكلم عنه هنا في المقال ده بس قبل ما نحكي عنه مين فينا مش بيغني دلوقتي حالًا في سره أشهر جزء “الليلة الكبيرة يا عمي والعالم كتيرة. ماليين الشوادر يابا من الريف والبنادر” 🙂
اوبريت الليلة الكبيرة زمان
اوبريت الليلة الكبيرة يعتبر من تراثنا الشعبي ومن أشهر المسارح اللي اتقدمت على مسرح القاهرة للعرايس اللي بيصورلنا حكاوي المولد الشعبي والحارة المصرية بأسلوب محبب للصغار والكبار، الاوبريت فيه كل شخصيات المولد الشعبي زي الأطفال وبياع البخت والحمص ومدرب الأسود والرقاصة، الاوبريت من كلمات العظيم صلاح جاهين وألحان سيد مكاوي واخراج صلاح السقا.
فيلم الليلة الكبيرة
ودلوقتي اعلنت شركة Giraffics في إعلان تشويقي “Trailer” عن فيلم رسوم متحركة مصري مستوحي من اوبريت الليلة الكبيرة هيتم عرضه في 2022 ومراحل تطويره استغرقت أكتر من سنتين وشارك فيه أكتر من 40 فنان ومستشارين انتجوا مجموعة من أشهر أفلام الرسوم المتحركة العالمية زي Frozen و The Lion King، وفي الاعلان التشويقي بتظهر بطلة الفيلم ليلى وجدها اللي بيقوم بصوته الفنان القدير عبد الرحمن أبو زهرة اللي بيحكيلها عن الحكاوتي الشاطر اللي لازم يبقى عنده طريقة يوري الناس حكايته وميقولهاش 🙂
لو متشوقة ومستنية تتفرجي على الفيلم زينا كده، قوليلنا في كومنت إيه أكتر جزء بتحبيه في الاوبريت.
التعليق باستخدام حساب فيس بوك