في كل عيد حب، أول حد بييجي على بالنا هو شريك الحياة، سواء متجوزين أو في طريقنا للجواز. وبنفضل ندوّر على هدايا وحاجات نقضي بيها عيد الحب بأجمل صورة رومانسية. بس النهارده فيه راجل وبطل مهم جدًا في حياتك لازم تفتكريه في عيد الحب 2022: بابا، واللي مهما قولنا له بحبك أو شكرًا، مش هتوفي لحظة واحدة من حياتنا معاه. تعالي نفتكر مع بعض ليه “بابا” هو أول راجل يستحق مننا كلمة “بحبك”، في عيد الحب وفي كل يوم.
من أول يوم في حياتي
من أول لحظة ليا في الدنيا، كان بابا أول هو أول حد شالني ودمع دموع الفرح لمجيئي، وحس بإن حب الدنيا كلها اتصب في قلبه ناحيتي، صحيح ممكن ما عبّرش عن ده بالكلام، بس كان باين في كل أفعاله وفي نظراته ليا.
أما أول خطوة خطيتها وكل العيلة عمالين يصقفوا ويقولولي “تاتا تاتا” بصوت مزعج وعالي، كان بابا هو اللي واقف قدامي وفاتح حضنه ومستنيني أوصل لعنده، وفعلًا أول لما وصلت لقيتني مش عارفة أكمل خطواتي واستسلمت بين إيديه.
بابا وأول يوم مدرسة
هاقول إيه عن أول يوم مدرسة وهو ماسك إيدي جامد، كإنه بيطمني، صحيح كانت ماما بتعبر عن مشاعرها أكتر وعمّالة تحضني وتعيط، لكن بابا كان مبتسم وبيشجعني، ومشاعره متلخبطة ما بين إنه فرحان بيا إني كبرت وداخلة المدرسة، وما بين إنه هيشتاق لي في أول يوم هابعد عنهم فيه.
بابا وأول عريس يتقدملي
ومرّت بينا الحياة، ما بين أيام حلوة وأيام صعبة وكلها كان بابا واقف جنبي فيهم، لحد ما جه اليوم اللي اتقدم لي فيه شاب مناسب، كانت أول مرة من زمان أشوف دموع بابا بالوضوح ده، وقال لي “لو كان عليّا مش هاوافق أبدًا إنك تبعدي عني، لكن مش هاقدر أمنعك من حياتك”، وراح حاضني ودموعه ما وقفتش.
كان طول وقت الخطوبة عاوز يفرحني بكل حاجة، مادية ومعنوية، وكنت عارفة إن مش كل حاجة كانت في إمكانياته المادية، بس كان بيعملهالي بكل رضى، ويقولي أنا ما عنديش أغلى منك.
بابا في يوم فرحي
ولما جه يوم الزفاف، كان أصعب يوم على بابا، بنته اللي رباها وكبّرها، هييجي واحد ياخدها منه طول العمر، ولما اشتغلت أغنية “كبرت البنوتة، كبرت ست الكل” في الفرح، بابا كان بيخبي نفسه مني، علشان ما يبوظش عليّا فرحتي ولو للحظات.
في عيد الحب قولي بحبك لـ باباكي
ودارت الدنيا وجه ميعاد ولادتي ببنتي، وجوزي حسّ ناحيتها بكل اللي بابا حسّ بيه تجاهي، بس بابا يوم الولادة حبه ليا ما اتقسمش بيني وبين بنتي، لكن اتضاعف وكإنه عاوز كمان قلب على قلبه علشان يكفي كل الحب اللي جواه عشان يحبني أنا وبنتي.
دور الأب في الولادة .. أكتر من مجرد حضور
وفي عيد الحب يا بابا، عاوزه أقولك بحبك يا أول راجل وبطل وفارس في حياتي.
التعليق باستخدام حساب فيس بوك