بابا النهاردة يوم الأب العالمي 21 يونيو.. مش عايزاك تشوف التايم لاين مليان بوستات حلوة عن الأبهات وما تشوفش نفسك موجود معاهم.. لإنك يا بابا تستاهل أكتبلك النهاردة وأكتبلك كل يوم وكل ساعة..
مرة قرأت كتاب نفسي مهم جدا كان بيقول إنه أول كام ذكرى بتفتكرهم في حياتك هيشكلوا معنى حياتك إللي جاية.. لدرجة إنه المعالج النفسي اللي كتب الكتاب ده كان بيخلي الناس يحكوا له أول 3 ذكريات وعلى الأساس ده، بيعرف يعالجهم بـ الذكريات دي.
أنا تاني ذكرى في حياتي يابابا كانت ذكرى ليك.. أول حاجة ممكن افتكرها لما حد يقولي: إيه هي أول ذكريات طفولتك؟ هو إنت!
فاكراك وانت قاعد جنبي في السرير قبل ما أنام وبتغنيلي أغنية “علي بابا” وبتلعب في شعري.. تقريبا كان عندي سنتين ..
يا سادة كان يا مكان
في سالف الأزمان
راجل فقير غلبان
اسمه علي بابا.. اسمه على بابا
أول ذكريات حياتي كانت ذكريات ليا وإنت بتمنحني الحب بكل حنية وبتغنيلي..
وكبرت يا بابا.. وكبرت معايا الذكرى.. وعشت أدور على حنيتك بين وشوش الناس..
كبرت يا بابا وأنا بدور على فارس الأحلام إللي هيديني الحنية والحب الجميل المجاني بتاعك إللي ما بيتدفعلوش تمن..
كبرت يا بابا وأنا عايشة فاكراك ملاك ما ينفعش يغلط.. وفضلت كدة سنين لحد ما نضجت.. وعرفت إنك مش ملاك إنك إنسان زيي.. ساعات ممكن تغلط وساعات مش بتبقى مثالي..
واتعلمت أحبك وأقبلك يابابا كلك على بعضك بمميزاتك وعيوبك وغلطاتك..
واتعلمت أسامح.. أسامح على أي حاجة حصلت بينا ما كنتش عاجباني..
ولما قبلتك كلك على بعضك وسامحتك .. ارتحت.. وعرفت معنى السعادة من تاني وحياتي نورت..
واتعلمت درس كبير قوي يا بابا من طبيبي النفسي.. اتعلمت إني ما أروحش ادور على حنيتك في أحضان الناس.. اتعلمت أرجع آخدها منك تاني زي ما كنت باخدها زمان وانا عيلة..
إنت عارف أنا نفسي في إيه يابابا؟
نفسي تاخدني تفطرّني برة.. ناكل ونشرب سوا.. أنا وإنت لوحدنا.. أشبع من الكلام معاك.. آخد منك دروس الحياة إللي محتاجة أسمعها منك علشان اعرف أكمل في الحياة دي..
خليك فاكر كلامي يابابا وما تنساهوش: إنت أول راجل في حياتي.. أول إنسان علمني معنى الحب والمودة والرحمة..
أنا كلي إنت يابابا.. وملامح وشك وصوتك وكل ذكرى ما بينا محفورة جوايا وهتفضل جوايا.. وفيه نسخة منك عايشة فيا بتونسني وهتفضل تونسني كل ما بخاف من الدنيا..
بحبك يابابا وكل سنة وإنت طيب
التعليق باستخدام حساب فيس بوك