محتويات المقال
لو إنتي من عشاق الأفلام والـMovie Nights فأكيد الموضوع ده هيزيد مع الحمل وخصوصًا لو أول حمل ليكي، وقت الحمل الهرمونات حرفيًا بتتشقلب كل يوم أو كل ساعة تقريبًا وساعات كده بييجي على بالك تتفرجي على فيلم كله أطفال، أو أمهات حوامل وتشوفي الحياة بتبقى عاملة إزاي وتقعدي تضحكي أو تعيطي على حسب هرموناتك ساعتها يا ست الكل 😀 .. وهنا جمعنا ليكي قائمة بالأفلام اللي بتتكلم عن رحلة الحمل، فلو إنتي زهقانة وعايزة تتفرجي على فيلم يغير مودك، اختاري واحد من القايمة دي أكيد هيعجبك.
الحفيد
من كلاسيكيات الأفلام اللي بتتكلم عن رحلة الحمل وحتى الولادة وليوم السبوع كمان، الفيلم هياخدك في رحلة كوميدية لعيلة مصرية بسيطة في السبعينات، الأب عبد المنعم مدبولي والأم زينب كريمة مختار اللي حققت جزء من أحلامها وجوزت بناتها لنبيلة وأحلام، وحلمها هيكتمل مع أول حفيد أبن أحلام وبتحاول تقنتع بنتها نبيلة هي كمان إنها تخلف وتجيب عيال ومتسمعش كلام جوزها شفيق.. أحداث الفيلم بتدور وبنشوف دور الأم في دعم بناتها الحوامل وكمان الأب الشقيان اللي كان فاكر إن دوره انتهى لما جوز بناته بس معلوماتك غلط يا جدو D:
What to expect when you are expecting
الفيلم بيحكي رحلة حمل لخمسة من الأزواج بمختلف الأعمار والخلفيات الاجتماعية، اللي بتشتغل في مجال الاعلام واللي اتأخرت في الخلفة واللي حامل في توأم واللي قررت تتجه للتبني.. الفيلم كوميدي ودمه خفيف وبيصورلك رحلة الحمل بحلوها ومرها.
Nine Months
لما صامويل بيكتشف إن ريبيكا حامل دنيته بتتشقلب وبيترعب من المسئولية والالتزام، بس مع مرور الوقت ومع أول صورة للبيبي بتاعه على السونار بيقرر يبقى أب مسئول وياخد باله من ريبيكا في رحلة حمله.
Father of the Bride II
فرحة أبو العروسة الجديدة هتكمل لما يعرف إن بنته حامل في أول حفيد، طيب تخيلوا بقا لما يعرف كمان إن مراته حامل هي كمان في نفس الوقت وهيقابل حفيده وآخر العنقود في نفس التوقيت.
Baby Mama
كيتي نفسها تكون أم وللأسف راحت عند دكاترة كتير واجمعوا إنها مش هتقدر تخلف، فبتقرر إنها تستعين ب انجي Surrogate Mother عشان تحقق حلمها، وبنشوف مواقفهم الكوميدية لما بيتنقلوا يعيشوا مع بعض.
Waitress
جينا بتشتغل سغل في مطعم بسيط وغير سعيدة في حياتها الزوجية بسبب تسلط جوزها، لما بتعرف إنها حامل كل حياتها بتتغير وهنتفرج إزاي هتتعامل مع حملها في كل الظروف المحيطة بيها.
التعليق باستخدام حساب فيس بوك