محتويات المقال
رمضان 2020 خلاص على الأبواب: أحلى وأجمل شهر في السنة. كبير وصغير بيستناه، وأول ما بنسمع أغاني رمضان شغالة في كل مكان والشوارع اتملت بالفوانيس، والمحلات بتعرض المنتجات الرمضانية الجميلة زي الياميش والمكسرات، قلوبنا بترقص من الفرحة وبنفتكر أحلى الذكريات وبتصيبنا حالة من البهجة بحلول الشهر الكريم. وقرب شهر رمضان، بنلاقي دايمًا كل الأسواق والمحلات زحمة والستات كلها تبدأ تجهز وتحضّر مشترواتها استعدادًا للشهر الكريم. الحقيقة، أنا ضد جدًا إننا نشتري كميات ومخزون كبير من جميع أنواع السلع الغذائية ونخزنها، لإن شهر رمضان من الأولى إن ما يكونش فيه أي تبذير في الأكل والشرب، ويكون زيه زي أي شهر في السنة.
ما اعرفش ليه إحنا كمصريين دايمًا بنحب نشتري حاجتنا على آخر لحظة، وغالبًا بتبقى الأسعار كلها غالية ومُبالغ فيها عن المعتاد، مع إننا لو استنينا لحد أول يومين تلاتة من رمضان يعدوا، هتكون الزحمة قلت والأسعار نزلت شوية. عشان كده، أحب أقول لك ما تقلقيش خالص لو اتأخرتي في شراء طلباتك، لإن ده أحسن بكتير. ولإن فيه بعض سلع ومنتجات استثنائية بنحب نشتريها في الشهر ده بالذات عشان نحضّر أكلات معروف إنها ما بتحلاش غير في رمضان. ولإنه شهر الكرم والعزومات، جمعت لك النهارده قائمة مشتريات رمضان 2020 وهي شوية سلع ومنتجات دايمًا بنحتاج نشتريها مع حلول شهر رمضان، عشان نوفر وقت المشاوير والنزول واحنا صايمين ونوفر مجهودنا لمهام تانية كتير. أهم نصيحة أقدر أقدمها لك هي إنك تراعي دايمًا الكميات اللي بتشتريها، بدون إسراف أو تبذير ما يليقش خالص على الشهر الكريم.
الياميش
الياميش يا جماعة من أهم المنتجات الرمضانية الجميلة وغالبًا حتى البيت اللي طول السنة ما بيشتريش مكسرات ولا فواكه مجففة، هتلاقيه في رمضان بيشتري ولو بكميات بسيطة جدًا. الياميش يشمل المشمشية والقراصيا والزبيب والتين المجفف والتمر بكل أنواعه وكمان المكسرات المتنوعة. أهم حاجة وانتي بتشتريه تتأكدي من طزاجته وإنه مش مخزون عند التجار من موسم قديم. تتأكدي إزاي؟ دوقي. اعملي حسابك وانتي بتشتري الياميش إنك هتتسلّي. ولو اشتريتي خلال رمضان، انزلي بعد الفطار وحلّي بالياميش. ولإن الياميش وخصوصًا المكسرات من المنتجات الغالية، يُفضّل إنك تشتري كميات بسيطة على قد احتياجاتك، وبعدين ماله الفول السوداني؟ من أوفر أنواع المكسرات وبيدّي طعم روعة في حلويات كتير، مش لازم يعني الفسدق واللوز والصنوبر.
عجينة الكنافة والقطايف وجميع عجائن المقبلات الرمضانية
الكنافة من الحاجات اللي تقبل جدًا إنها تتشال في الفريزر وخصوصًا لو مش متوفر جنبك أماكن بتبيعها. أما بالنسبة لعجينة القطايف، أفضل حل ليها هو إنك تشتريها طازة وتحشيها بالحشوة المفضلة ليكي وبعدين تفرزنيها، لإنك لو شيلتيها في الفريزر زي ما هي من غير ما تحشيها، مش هتعرفي تحشيها بعد كده، ومش هتتقفل معاكي كويس. الكل بيحب المقبلات على سفرة رمضان عشان كده تقدري تشتري عجينة السمبوسك والجلاش والسبرينج رولز كمان بحيث تعملي نوعك المفضل من المقبلات وقت ما تحبي.
خضار موسمي
تقدري تشتري الخضار اللي في الموسم بتاعه وتنضفيه وتشيليه في الفريزر كنوع من أنواع التجهيز لرمضان. ستات كتير بيلاقوا إن الطريقة دي أفضل وأوفر لهم من إنهم يشتروا خضار مجمد جاهز وخصوصًا الطماطم اللي بيرتفع سعرها جدًا، فالأفضل شراها قبل رمضان وتعملي منها عصير أو تعملي تسبيكة كاملة وتشيليها في الفريزر هتسهل عليكي وتوفر وقتك جدًا.
اللحوم والفراخ
اشتريها قبل رمضان بمدة كافية قبل ما ترتفع أسعارها، اللحمة المفرومة ممكن تشتريها وتشيليها متعصجة في الفريزر، بتنقذ مواقف كتير قوي وكمان صدور الفراخ المتبلة أو معمولة بانية ومتجمدة في الفريزر، بتكون هايلة لو جالك ضيوف مفاجأة على الفطار أو حتى في يوم مزحوم ومفيش وقت ولا جهد لوقفة المطبخ.
مستلزمات العصاير
العصاير الرمضانية البيتي لا يعلى عليها: الكركديه والخروب والتمر هندي، وطبعًا كل ده هتحتاجي تشتريه قبل رمضان لو كنتي من اللي بيحبوا يحضروا العصاير البيتي، أنا شخصيًا ليلة رمضان باحضّر نوعين تلاتة من العصاير عشان يكفوا احتياجات البيت أول أسبوع من رمضان.
زينة رمضان
من أكتر الحاجات المبهجة هي الفوانيس والزينة والأنوار اللي بتزين بلكونات ومداخل البيوت المصرية. ما تنسيش كمان تشتري فوانيس لأولادك. خليها دايمًا عادة جميلة فرحيهم بيها. الزينة دلوقتي ما بقيتش مقتصرة على الأنوار والفوانيس، بقى فيه حاجات تانية كتير ديكورية بتدّي للبيوت روح وجو رمضاني وشرقي جميل زي المفارش الخيامية والمفروشات اللي عليها بوجي وطمطم، اختاري كام قطعة لبيتك وزينيه وفرحي عيلتك.
التعليق باستخدام حساب فيس بوك