محتويات المقال
الولادة القيصرية عملية جراحية كبرى، مش مجرد عملية بسيطة وسريعة التعافي، وعلى الرغم إنها شائعة جدًا دلوقتي، وأوقات كتير بيكون اللجوء لها ضرورة للحفاظ على حياة الأم والجنين، إلا إن ده مش هيلغي إنها عملية مش سهلة. التعافي بعد الولادة القيصرية بياخد وقت، وعلشان التعافي ده يكون سريع، لازم له شوية نصائح وتعليمات التزامك بيها هيفرق معاكي.
الأطباء بيقولوا إنك تقدري تتحركي بشكل طبيعي بعد أسبوعين، تتحركي ده مش معناه إنك ترجعي لسابق نشاطك قبل الولادة. كمان بيقولوا إن التعافي الكامل بيحتاج من 4 لـ6 أسابيع، ده غير إنه ممنوع عنك قيادة السيارة على الأقل في الأسبوع أو العشر أيام الأولى من العملية.
هنا حالات تستدعي الولادة القيصرية .. 4 أسباب مهمة
أهم النصائح للتعافي بسرعة بعد الولادة القيصرية
- نصائح قبل الولادة.
- نصائح قبل الخروج من المستشفى.
- نصائح للرضاعة الطبيعية.
- نصائح بعد الخروج من المستشفى.
- نصائح للنوم الصحيح.
- مراجعة طبيبك.
نصائح قبل الولادة القيصرية
- حددي المستشفى اللي هتولدي فيها.
- جهزي شنطة الولادة من نص الشهر الثامن من الحمل، وجهزي فيها اللبس اللي يناسب مولودك حسب الموسم اللي مولود فيه سواء صيف أو شتاء أو الخريف.
- حددي مكان إقامتك بعد الولادة هيكون فين، سواءً في بيتك أو بيت مامتك.
- اطلبي مساعدة متخصصة لتنضيف بيتك تنضيف عميق قبل الولادة، ما تقوميش انتي بالمجهود ده أبدًا.
- لو هتخرجي من المستشفى على بيتك، جهزي أكل في الفريزر يساعدك على عدم التفكير في النقطة دي بعد الولادة.
- جهزي مكان قعدتك ونومك انتي ومولودك بحيث تكون كل حاجة هتحتاجيها تكون جنبك وقريبة منك.
- لو عندك أطفال أكبر، حددي لهم مكان إقامة آمن لهم بحيث يكونوا تحت رعاية ومتابعة في يومين المستشفى.
- لو سنهم كبير شوية، فهميهم إنك هتكوني تعبانة بعد لما البيبي يجي، وإنك هتحتاجي حبهم ومساعدتهم.
مهم تعرفي أفضل وقت لعمل تمارين البطن بعد الولادة القيصرية
نصائح قبل الخروج من المستشفى بعد الولادة القيصرية
- تناولي مسكنات الألم اللي هيوصفها لك الطبيب علشان تخفف عنك، ممكن تتفقي مع الطبيب إنك تستخدمي مسكنات زي الـpca.
- لازم تقومي من على السرير في أقرب وقت ممكن علشان تحمي نفسك من أي جلطات وعلشان أمعائك ترجع تتحرك من تاني وبالتالي تقدري تاكلي.
- في حالة إن الطبيب مش مانع عنك الاكل لأي سبب طبي، وأمعائك رجعت تتحرك تاني وخرجت الغاز اللي اتحبس فيها في وقت العملية فتقدري تاكل وتشربي على طول.
- خلّي القسطرة البولية متركبة على الأقل أول 24 ساعة، وده بسبب إن الأم بتكون لسة تعبانة جدًا إنها تقوم تدخل الحمام، ده غير إن الجزء السفلي منها لسه واقع تحت التخدير فشعورها بالرغبة في التبول قد يكون ضعيف.
- خليكي حريصة على إن الجرح يكون متغطي وغير معرض للهواء أو لو قومتي استحميتي بمساعدة واحدة من الممرضات إن الجرح يتعرض للمياه، لازم تفضل الضمادة عليه مهما كنتي مش حباها.
نصائح للرضاعة الطبيعية بعد الولادة القيصرية
تقدري ترضعي طبيعي بعد الولادة مباشرة، لإن ولادتك قيصري مش بتختلف عن الولادة الطبيعية في جزئية تكوّن اللبن في الثدي، دي عملية بتبدأ بمجرد خروج الجنين من الرحم، وبما إنك شخصيًا خارجة من عملية، فهتحتاجي إنك تاخدي أكتر وضع مريح ممكن، بحيث ما يزودش الألم عليكي ولا يضغط على جرحك، هو بطبيعة الحال مع الرضاعة الطبيعية هتحسي بتقلصات في الرحم، لإن الرضاعة بتساعد على سرعة رجوع الرحم لوضعه الطبيعي.
استشيري الطبيب في أنسب وضع ليكي، يساعدك على إنك تمسكي رضيعك وتقدري ترضعيه.
نصائح بعد الخروج من المستشفى
دلوقتي بعد خروجك من المستشفى بالسلامة إنتي ومولودك، لازم تعرفي تتعاملي ازاي مع الوضع الجديد:
- ممنوع تمامًا تشيلي أي حاجة تقيلة مهما حصل، أقصى وزن مسموح هو وزن الرضيع.
- تجنبي ممارسة الرياضة العنيفة من منطلق إنك عايزة تنزّلي بطن القيصرية، أقصى حاجة مسموحة هو المشي داخل البيت، بحيث تساعدي الجرح على الشفاء، وتكوني تحت الملاحظة لو احتاجتي لمساعدة.
- التغذية السليمة، وده بيعني شرب مياه كتير، تناول الخضروات، تناول البروتين الصحي، تقليل النشويات وتجنب السكريات والمخللات والبهارات في الاكل.
- حاولي تنامي على قد ما تقدري، لأن النوم هيساعد جسمك على التعافي.
- خدي مسكنات الآلام اللي سمح بيها طبيبك علشان تقدري تقومي بالمهام بتاعتك وتقدري تعدّي الفترة الأولى اللي بتكون صعبة.
- لاحظي النزيف المهبلي اللي بيحصل بعد الولادة، لو حسيتي إنه زيادة ومش بيقل بشكل تدريجي لازم ترجعي للطبيب.
- اهتمي بجرحك، وإنك تاخدي الأدوية الموصوفة لك بانتظام.
نصائح لأوضاع النوم الصحيح بعد الولادة القيصرية
- النوم على الظهر: من أكثر الأوضاع راحة للجرح لإنك مش بتكوني ضاغطة عليه، لكن لو كنتي بتعاني من ارتفاع في ضغط الدم، فوضع النوم ده هيكون غير مريح ليكي بالمرة.
- النوم على أحد الجانبين: من الأوضاع المريحة وخصوصًا لو نمتي على جنبك الشمال، هيخفف من ضغط الدم والضغط على الجرح خصوصًا لو حاطة وسادة تسند بطنك، وبتساعدك على تحسين الهضم، وبالتالي تجنب حدوث إمساك.
- النوم بوضعية الجلوس: فيه أمهات بتعتبر إن النوم بوضع الجلوس وهي رافعة رجليها في مستوى قاعدتها أريح لها وبيساعدها تقوم أسهل وتمسك رضيعها أسهل علشان الرضاعة.
- النوم على الوسائد: وده بتكوني نايمة على ضهرك بس رافعة الجزء السفلي من جسمك بمخدات، أو تكوني ساندة كل جسمك بمجموعة مخدات تساعدك على إنك تقوم من على السرير بسهولة.
هنا ممكن تشوفي بالتفصيل طريقة النوم الصحيحة بعد الولادة القيصرية وأهم النصائح
مراجعة طبيبك
من المهم جدًا تزوري طبيبك في الوقت اللي هو محدده، حتى لو حسيتي إنك بتتحسني، لازم تروحي علشان تطمني على صحتك وصحة طفلك، وتقيسي ضغط دمك.
لو حسيتي بأي أعراض ممكن تسبب لك أي قلق، من الضروري جدًا ترجعي لطبيبك مباشرة ما تنتظريش الزيارة اللي جاية.
دلوقتي لو حطيتي النصائح دي في الاعتبار والتزمتي بيها، فترة التعافي هتمشي بسلام وبوتيرة سريعة. مهم جدًا تهتمي بنفسك وتطلبي المساعدة، لإنك في الفترة دي بتكوني في حالة ضعف، وأي محاولة منك للضغط على نفسك هتأثر عليكي بالسلب، وحمد الله على سلامتك انتي والمولود.
المصادر:
Webteb
Planned Parenthood
WebMD
التعليق باستخدام حساب فيس بوك