كلنا شوفنا الفيديو المنتشر الأيام اللي فاتت عن قرار ديزني الجديد بنشر الشخصيات المثلية لما المسؤولة صرحت في شركة ديزني عن نية الشركة الاستعانة بقصص أبطال مثليين. ومن بعدها فيه حالة ذعر وسيل من الأسئلة اتبعتت لي عن التصرف الصح في الموقف ده. وإيه اللي ممكن نعمله نفهّم بيه ولادنا. والسؤال الأهم ابدأ أنا أفتح كلام معاهم في الموضوع ده؟ ولّا استنّاهم يسألوا؟ في مقال النهارده هاجاوبك على كل الأسئلة دي بالتفصيل.
بعد قرار ديزني الجديد .. نفتح احنا كلام مع ولادنا ولّا نستني يسألوا؟
الحقيقة أنا دايمًا باشجع في التربية الجنسية إننا نتابع أسئلة وفضول الطفل ونكون مستعدين بإجابات لكل أسئلة الأطفال الغريبة، مع مراعاة طبعًا إن فيه حاجة اسمها التربية الجنسية للمراهقين ما ينفعش يكونوا هيبلغوا ولسه ما يعرفوش الأساسيات.
لكن في الحالة دي، وبعد قرار ديزني الجديد، الشركة المشهورة بأفلام كرتون للأطفال، فيه احتمالية كبيرة لظهور مشاهد تثير فضول ولادنا في أفلام الكرتون. فمهم مني أنا، لو ولادي صغيرين لحد سن 9 سنين مثلًا، أقدر أستنى وما افتحش الموضوع غير لو سألوا. أما قرب سن البلوغ وبالحديث عن البلوغ وعملية الزواج بعدها، فهيبقى سهل أتكلم في الموضوع وأنا عارفة إن طفلي قادر يفهم بشكل أعمق. وكمان وقتها سنهم هيسمح إني اتكلم بأريحية في الحرام والحلال لو أنا عايزة أفتح الموضوع من ناحية الدين.
طيب نجاوب إزاي على أسئلة الأطفال الغربية زي؟
“هو يعني إيه Gay؟”
“ليه فيه اتنين رجالة متجوزين!”
“ليه ولد يبوس ولد؟” / “ليه بنت تبوس بنت؟”
“يعني إيه مثليين؟”
إيه الحل مع أسئلة الأطفال الغربية؟
- ردود أفعال الأباء والأمهات الأولى ناحية أسئلة ولادنا المخيفة لينا هي أول خطوة نحدد بيها قوة علاقتنا بولادنا ودرجة لجوءهم لينا في كل حاجة، ودي من أكتر الحاجات اللي هتحميهم بعد كده.
- لو اتخضينا وزعقنا وقلنا بلاش قلة أدب، هيبطلوا يتكلموا معانا وهيدوروا علي إجابات لأسئلتهم بره.
- فمهم إننا نشكرهم على أسئلتهم بابتسامة لطيفة. ولو مش قادرين نجاوب وقتها نقول لهم هاشوف إجابة المناسبة لسنك وأرجع لك.
ازاي أرد على أسئلة الأطفال الغربية؟
الخطوة الأولى: الرد العلمي زي “درس الـ Science”
- في المواضيع الحساسة اللي زي دي، بنتسند قوي في كلامنا على العلم، وبعد كده الدين للسن الأكبر.
- نبدأ كلامنا بإننا نشرح لهم طريقة التزاوج بين النباتات وازاي ربنا خلق جزء ذكر بيلقح الجزء الأنثوي (ودي حاجة سهل كل أم وأب يقروا فيها عشان يشرحوها بدقة وبساطة للطفل).
- وبعدها ندخل على الحيوانات وازاي كل المخلوقات بيكونوا عبارة عن ذكر وأنثى بيتحدوا ويجيبوا بيبي زي البشر. فالشكل المعتاد للأسرة راجل وست وطفل فبديهي يكون اللي شايفينه أو سمعوا عنه في كارتون ده مش المعتاد.
الخطوة التانية: احكي قصة
بعده نقدر نستعين بإننا نحكي له قصة قوم لوط، وإنهم كانوا بيمارسوا العلاقات بطريقة مختلفة عن الطريقة المعتادة اللي ربنا خلقها في آدم وحوا. عشان كده، بيتقال كلمة “الشذوذ الجنسي” بمعنى المختلف عن المعتاد لأن المعتاد هي العلاقة بين الراجل والست وشكل الأسرة المعتاد في مخلوقات ربنا هو أب وأم وأطفال، مش راجل وراجل أو ست مع ست.
الخطوة التالتة: وجهة نظر الدين
لازم نعرّف ولادنا موقف الدين من المثلية والقيم والمباديء اللي معتنقينها في بيتنا ورفضه للفعل ده.
الخطوة الرابعة: الخصوصية والتربية الجنسية
- مهم إننا نأكد على ولادنا خصوصية الكلام والحوار بيننا. وإن دي وظيفة الأهل في كل بيت. إنهم يجاوبوا على أسئلة ولادهم عشان ما يروحوش يحكوا لأطفال تانية يمكن لسه مش مستعدين.
- وأساسي نبدأ تربية جنسية مع ولادنا بالتدريج من سنتين ونعرف إنها مش حاجة عيب أو حرام لكنها عملية تعليم مستمرة بتفضل سنين مش كلمتين وبس.
نتابع التلفزيون والميديا
- أساسي المتابعة المستمرة على كل حاجة بتوصل لولادنا من الميديا وحديثًا من أفلام شركة ديزني. لو فيه فيلم جديد، مهم نشوفه الأول ونتأكد من القيم اللي بتوصل من الفيلم قبل ما نعرضه على ولادنا.
- لأن دورنا الأول هو الحفاظ عليهم والتركيز على المحتوى اللي ولادنا بيتفرجوا عليه من الإنترنت والتلفزيون وبعدين إني أكون جاهز بإجابة “حقيقية” أرد بيها على ابني.
- الأهم إني أكون أنا في البيت المصدر الصح والمريح للتربية الجنسية لطفلي طول الوقت.
- احنا لا هنعرف نخبّي ولادنا ولا نغمّي عينيهم عن اللي بيحصل حواليهم للأسف.
- لكن نعرف نقويهم بمعلومات صح وزرع قيم ودين من صغرهم يسندهم ويعينهم علي الاختيار.
التعليق باستخدام حساب فيس بوك